ಹೈದರಾಬಾದ್: ಇಲ್ಲಿನ ಕಾಚಿಗುಡ ರೈಲು ನಿಲ್ಡಾಣದಲ್ಲಿ ಸೋಮವಾರ ಬೆಳಿಗ್ಗೆ ಎರಡು ರೈಲುಗಳು ಡಿಕ್ಕಿ ಹೊಡೆದಿದ್ದು, ಲೋಕೊ ಪೈಲಟ್ ಸಹಿತ 13 ಮಂದಿಗಾಯಗೊಂಡಿದ್ದಾರೆ.ಗಾಯಾಳುಗಳನ್ನು ಒಸ್ಮಾನಿಯಾ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಲಿಂಗಂಪಲ್ಲಿ– ಫಾಲಕ್ನೂಮ ಉಪನಗರ ರೈಲು ಮತ್ತು ಕರ್ನೂಲ್– ಸಿಕಂದರಾಬಾದ್ ಎಕ್ಸ್ಪ್ರೆಸ್ ರೈಲುಗಳು ಮುಖಾಮುಖಿ ಡಿಕ್ಕಿ ಹೊಡೆದಿವೆ. ಉಪನಗರ ರೈಲಿನ ಲೋಕೊ ಪೈಲಟ್ ಇದ್ದ ‘ಕ್ಯಾಬಿನ್’ ನಜ್ಜುಗುಜ್ಜಾಗಿದೆ.
ಉಪನಗರ ರೈಲು ಸಿಗ್ನಲ್ ದಾಟಿರುವುದೇ ಅಪಘಾತಕ್ಕೆ ಕಾರಣವಾಗಿದೆ ಎಂದು ದಕ್ಷಿಣ ಮಧ್ಯ ರೈಲ್ವೆ ವಲಯದ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಸಣ್ಣ ಪ್ರಮಾಣದಲ್ಲಿ ಗಾಯಗೊಂಡ ಪ್ರಯಾಣಿಕರಿಗೆ ₹ 5,000 ಮತ್ತು ತೀವ್ರ ಗಾಯಗೊಂಡವರಿಗೆ ₹ 25,000 ಪರಿಹಾರವನ್ನುರೈಲ್ವೆ ಸಚಿವಾಲಯ ಘೋಷಿಸಿದೆ.