ಪಟ್ನಾ: ಕಳೆದ 24 ಗಂಟೆಗಳಲ್ಲಿ ಬಿಸಿಗಾಳಿ ಬಿಹಾರದ 77 ಜೀವಗಳನ್ನು ಬಲಿ ಪಡೆದಿದೆ. ಈ ಮೂಲಕ ಕಳೆದ ಎರಡು ದಿನಗಳಲ್ಲಿ ಬಿಸಿಲ ಝಳಕ್ಕೆ 129 ಮಂದಿ ಮೃತಪಟ್ಟಿದ್ದಾರೆ.
ಔರಂಗಾಬಾದ್, ಗಯಾ ಮತ್ತು ನವಾಡ ಜಿಲ್ಲೆಗಳಲ್ಲಿ ಉಷ್ಣಾಂಶ 45 ಡಿಗ್ರಿ ಸೆಲ್ಸಿಯಸ್ ದಾಖಲಾಗಿದೆ. ಶನಿವಾರ ಈ ಮೂರು ಜಿಲ್ಲೆಗಳಲ್ಲಿ 52 ಮಂದಿ ಸಾವಿಗೀಡಾಗಿದ್ದರು. ಇದೀಗಪಟ್ನಾ, ಬುಕ್ಸಾರ್, ಆರಾ ಜಿಲ್ಲೆಗಳಲ್ಲೂ ತಾಪಕ್ಕೆ ಜನರು ಬಲಿಯಾಗುತ್ತಿದ್ದಾರೆ.
ಹವಾಮಾನ ಇಲಾಖೆ ಈ ವೇಳೆ ಆಶಾದಾಯಕ ಸುದ್ದಿ ನೀಡಿದ್ದು, ಇದೇ 22ರಿಂದ ಸಾಧಾರಣ ಮಳೆ ಆಗಲಿದೆ ಎಂದಿದೆ.
ಶಾಲೆಗಳಿಗೆ ರಜೆ: ರಾಜ್ಯ ಸರ್ಕಾರವು ಶಾಲಾ–ಕಾಲೇಜುಗಳಿಗೆ ಜೂನ್ 23ರವರೆಗೆ ರಜೆ ಘೋಷಿಸಿದೆ. ಗಯಾ ಜಿಲ್ಲಾಡಳಿತ ಸೆಕ್ಷನ್ 144ರ ಅಡಿ ನಿಷೇಧಾಜ್ಞೆ ಜಾರಿ ಮಾಡಿದ್ದು, ನರೇಗಾ ಯೋಜನೆ ಮತ್ತು ಕಟ್ಟಡ ಕಾಮಗಾರಿ ನಡೆಸದಂತೆ ಜಿಲ್ಲಾಧಿಕಾರಿ ಅಭಿಷೇಕ್ ಸಿಂಗ್ ಆದೇಶ ಹೊರಡಿಸಿದ್ದಾರೆ.