ಅಯೋಧ್ಯೆ: ಉತ್ತರ ಪ್ರದೇಶದ ಅಯೋಧ್ಯದಲ್ಲಿರುವ ರಾಮ ಮಂದಿರವನ್ನು ಎರಡು ತಿಂಗಳ ನಂತರ ಸೋಮವಾರ ತೆರೆಯಲಾಯಿತು.
ಪ್ರತಿದಿನ ಒಟ್ಟು ಎಂಟು ಗಂಟೆಗಳ ಕಾಲ ದರ್ಶನವಿರುತ್ತದೆ. ಬೆಳಿಗ್ಗೆ 8 ರಿಂದ ಮಧ್ಯಾಹ್ನ 1 ಮತ್ತು ಮಧ್ಯಾಹ್ನ 3ರಿಂದ 6 ಗಂಟೆಯವರೆಗೆ ಭಕ್ತರು ದರ್ಶನ ಪಡೆಯಲು ಅವಕಾಶ ಕಲ್ಪಿಸಲಾಗಿದೆ.
ಮುಖ್ಯ ಅರ್ಚಕ ಆಚಾರ್ಯ ಸತ್ಯೇಂದ್ರ ದಾಸ್‌ ಹೇಳುವಂತೆ, ‘ಒಂದು ಬಾರಿಗೆ ಐದು ಮಂದಿಗೆ ಮಾತ್ರ ದೇವರ ಮೂರ್ತಿಯಿಂದ 15 ಮೀಟರ್‌ ಅಂತರದಲ್ಲಿ ನಮಿಸಲು ಅವಕಾಶವಿರುತ್ತದೆ. ಪ್ರಸಾದ ನೀಡುವುದಿಲ್ಲ’ ಎಂದು ತಿಳಿಸಿದ್ದಾರೆ.
