ಹುಬ್ಬಿಗೊಂದು ಚಳವಳಿ

ಇದೀಗ ಈಕೆ ಸುದ್ದಿಯಲ್ಲಿರುವುದು ‘ಯೂನಿಬ್ರೊ’ ಮೂವ್‍ಮೆಂಟ್‍ನಿಂದ. ಅಂದರೆ ಹುಬ್ಬಿನ ಕುರಿತ ಚಳವಳಿಯಿಂದ. ಮುಖದ ಸೌಂದರ್ಯದಲ್ಲಿ ತೀಡಿದ ಹುಬ್ಬಿಗೇ ಪ್ರಾಮುಖ್ಯ. ಅದನ್ನು ತಿದ್ದಿ ತೀಡಿದರೇನೇ ಮುಖಕ್ಕೆ ಕಳೆ ಎಂಬುದು ಎಷ್ಟೋ ಸೌಂದರ್ಯ ತಜ್ಞರ ಅಭಿಪ್ರಾಯ. ಜೊತೆಗೆ ಕೂಡಿಕೊಂಡಿರುವ ಹುಬ್ಬುಗಳನ್ನು ಹೊಂದಿದವರು ಸುಂದರವಾಗಿ ಕಾಣುವುದಿಲ್ಲ ಎಂಬ ಒಂದು ಅಪವಾದವೂ ಇದೆ.

ಆದರೆ ಸೋಫಿಯಾ ಅದಕ್ಕೆ ತಿರುಗೇಟು ನೀಡಿದ್ದಾರೆ. ಹುಬ್ಬಿನ ಕೂದಲನ್ನು ಹಾಗೇ ನೈಸರ್ಗಿಕವಾಗಿರಲು ಬಿಟ್ಟರೆ ಸೌಂದರ್ಯವೂ ನೈಸರ್ಗಿಕವಾಗಿಯೇ ಇರುತ್ತದೆ ಎಂಬುದನ್ನು ಸಾರಲೆಂದೇ ಈ ಅಭಿಯಾನವನ್ನು ಕೈಗೊಂಡಿದ್ದಂತೆ ಸೋಫಿಯಾ. 15ನೇ ವಯಸ್ಸಿಗೇ ಇಟಾಲಿಯನ್ ವೋಗ್ ವೆಬ್‍ಸೈಟ್‍ನಲ್ಲಿ ಕಾಣಿಸಿಕೊಂಡು ಸಂಚಲನ ಮೂಡಿಸಿದ್ದ ಸೋಫಿಯಾ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಸುದ್ದಿಯಾಗುತ್ತಿರುವುದು ಇದೇ ಅಭಿಯಾನದಿಂದಲೇ.

ಹೀಗೆ ಒಮ್ಮೆ ಹುಬ್ಬು ತೀಡಲೂ ಸಮಯವಿಲ್ಲದಷ್ಟು ಬಿಜಿಯಿದ್ದ ಸೋಫಿಯಾ, ಅಜ್ಜಿ ಮನೆಗೆ ಬಂದಿದ್ದರು. ಆಗ ಅಜ್ಜಿ, "ನೀನೆಷ್ಟು ಮುದ್ದಾಗಿ ಕಾಣ್ತಿದ್ದೀಯ. ಯಾವತ್ತೂ ನೈಸರ್ಗಿಕವಾಗಿರುವುದೇ ಹೆಚ್ಚು ಸುಂದರವಾಗಿ ಕಾಣುವುದು' ಎಂದು ಹೊಗಳಿದ್ದರಂತೆ. ಅದೇ ಸೋಫಿಯಾ ಮನದಲ್ಲಿ ಮತ್ತೆ ಮತ್ತೆ ಅನುರಣಿಸುವಂತೆ ಮಾಡಿದ್ದು. ಮತ್ತೆ ಎಂದಿಗೂ ಹುಬ್ಬನ್ನು ತೀಡಲೇ ಇಲ್ಲ, ಆದರೆ ವೃತ್ತಿಪರವಾಗಿ ರೂಪದರ್ಶಿಯಾದ್ದರಿಂದ ಇದಕ್ಕೆ ಸಾಕಷ್ಟು ಅವಕಾಶಗಳೂ ದೂರವಾದವು. ಆದರೆ ತನ್ನ ನಿಲುವನ್ನು ಬಿಡಲು ಒಪ್ಪಲಿಲ್ಲ. ಅದನ್ನೇ ಒಂದು ಅಭಿಯಾನದಂತೆ ಕೈಗೊಂಡರು.

‘ಪ್ರಕೃತಿ ಕೊಟ್ಟ ಸಹಜ ಸೌಂದರ್ಯವನ್ನು ತಿದ್ದಿ ತೀಡಲು ನಾವ್ಯಾರು? ಅದನ್ನೇ ಏಕೆ ಸಹಜ ಸುಂದರ ಎಂದುಕೊಳ್ಳಬಾರದು? ಸೌಂದರ್ಯ ಇರುವುದು ನಮ್ಮ ದೃಷ್ಟಿಕೋನದಲ್ಲಿ’ ಎಂದು ಮಾಡೆಲಿಂಗ್ ಲೋಕಕ್ಕೇ ಸೌಂದರ್ಯದ ಹೊಸ ವ್ಯಾಖ್ಯಾನ ಕೊಡಲು ಮುಂದಾಗಿದ್ದಾರೆ.

ಕೂಡಿಕೊಂಡಿರುವ ಹುಬ್ಬನ್ನು ತೀಡಿಸದೇ ದಟ್ಟವಾಗಿ ಬಿಡುವ ಮೂಲಕ ಅಭಿಯಾನ ಕೈಗೊಂಡಿದ್ದಾರಂತೆ. ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿರುವ ಸೋಫಿಯಾಗೆ ಇದರಿಂದ ಸಾಕಷ್ಟು ಟೀಕೆಗಳೂ ಬರುತ್ತಿವೆಯಂತೆ. ಆದರೂ ‘ನನ್ನ ನಿಲುವು ಗಟ್ಟಿಯಾಗಿಯೇ ಇದೆ. ಪರ್ಫೆಕ್ಟ್ ಲುಕ್ ಪಡೆಯಲು ಸೌಂದರ್ಯದ ಹಿಂದೆ ಓಡುವ ಎಲ್ಲರೂ ಕೇಳಿಸಿಕೊಳ್ಳಿ, ಯಾವತ್ತೂ ಸಹಜವೇ ಸುಂದರ’ ಎಂದೂ ಒತ್ತಿ ಹೇಳಿದ್ದಾರೆ. ಈಗಾಗಲೇ ಈ ಅಭಿಯಾನಕ್ಕೆ 1,78,000 ಅಭಿಮಾನಿಗಳೂ ಜೊತೆಯಾಗಿದ್ದಾರೆ.