ಕಡಿಮೆ ಎತ್ತರ: ಡಿಆರ್‌ಎಫ್‌ಒ ಮನೆಗೆ

2017–18ರಲ್ಲಿ 329 ಅಭ್ಯರ್ಥಿಗಳುನೇರ ನೇಮಕಾತಿಯಲ್ಲಿ ಆಯ್ಕೆಯಾಗಿದ್ದರು. ಇವರನ್ನು ತರಬೇತಿಗಾಗಿ ಇಲ್ಲಿನ ಗುಂಗರಗಟ್ಟಿಯಲ್ಲಿರುವ ಅರಣ್ಯ ಅಕಾಡೆಮಿಗೆ ನಿಯೋಜನೆಗೊಳಿಸಲಾಗಿತ್ತು. ಉಪವಲಯ ಅರಣ್ಯಾಧಿಕಾರಿ ಹುದ್ದೆಗಾಗಿ ಪುರುಷರಿಗೆ ಕನಿಷ್ಠ 163 ಸೆಂ.ಮೀ ಹಾಗೂ ಮಹಿಳೆಯರಿಗೆ ಕನಿಷ್ಠ 150ಸೆಂ.ಮೀ ಎತ್ತರವನ್ನು ನಿಗದಿಪಡಿಸಲಾಗಿತ್ತು. ಆದರೆ ಕೆಲ ಅಭ್ಯರ್ಥಿಗಳು ನಿಗದಿತ ಎತ್ತರಕ್ಕಿಂತ ಕಡಿಮೆ ಇರುವುದನ್ನು ಇಲ್ಲಿ ಅಧಿಕಾರಿಗಳು ಪತ್ತೆ ಮಾಡಿದ್ದರು.

ಮೈಸೂರು ವೃತ್ತದ ಬಿ.ಗಣೇಶ ಎಂಬುವವರು 161 ಸೆಂ.ಮೀ, ಮಂಗಳೂರು ವೃತ್ತದ ಬಿ.ಎ.ವೃಂದಾ 149 ಸೆಂ.ಮೀ, ಕೆನರಾ ವೃತ್ತದ ಪಿ.ಗಂಗಾ 149 ಸೆಂ.ಮೀ ಮತ್ತು ಎಸ್‌.ಟಿ.ಈರಮ್ಮಾ 149.5 ಸೆಂ.ಮೀ ಎತ್ತರ ಇದ್ದಾರೆ. ಇವರನ್ನು ಜೂನ್ 21ರಂದು ತರಬೇತಿಯಿಂದ ಬಿಡುಗಡೆಗೊಳಿಸಲಾಗಿದೆ.

ಈ ಕುರಿತು ಪ್ರತಿಕ್ರಿಯಿಸಿದ ಹೆಚ್ಚುವರಿ ಪ್ರಧಾನ ಮುಖ್ಯ ಅರಣ್ಯ ಸಂರಕ್ಷಣಾಧಿಕಾರಿ(ಮಾನವ ಸಂಪನ್ಮೂಲ) ಎ.ರಾಧಾದೇವಿ, ‘ಜೂನ್‌ 10ರಂದು ತರಬೇತಿಗೆ ಹಾಜರಾದರು. ಇವರ ಎತ್ತರ ನಿಗದಿಗಿಂತ ಕಡಿಮೆ ಇರುವುದು ಮೇಲ್ನೋಟಕ್ಕೆ ಕಂಡುಬಂತು. ಹೀಗಾಗಿ ಇವರನ್ನು ಜಿಲ್ಲಾ ಆಸ್ಪತ್ರೆಗೆ ಕಳುಹಿಸಿಕೊಟ್ಟು ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸಿದೆವು. ವೈದ್ಯರು ನೀಡಿದ ವರದಿ ಆಧರಿಸಿ ಪ್ರಧಾನ ಮುಖ್ಯ ಅರಣ್ಯ ಸಂರಕ್ಷಣಾಧಿಕಾರಿಗೆ ಪತ್ರ ಬರೆದು, ಪ್ರಶಿಕ್ಷಣಾರ್ಥಿಗಳನ್ನು ಕಳುಹಿಸಿಕೊಡಲಾಗಿದೆ’ ಎಂದು ಹೇಳಿದರು.