ಬೆಳಗಾವಿ: ನಗರದಲ್ಲಿ ಮಂಗಳವಾರ ಸಂಜೆ ಒಂದೂವರೆ ತಾಸಿಗೂ ಹೆಚ್ಚು ಕಾಲ ಭಾರಿ ಗುಡುಗು–ಗಾಳಿ ಸಹಿತ ಸುರಿದ ಜೋರು ಮಳೆ, ಬಿಸಿಲಿನಿಂದ ಬಸವಳಿದಿದ್ದ ಜನರಿಗೆ ತಂಪೆರೆಯಿತು.
ಸಂಜೆ 4ರ ಸುಮಾರಿಗೆ ಸಾಧಾರಣ ಮಳೆ ಆರಂಭವಾಯಿತು. ಬಳಿಕ ಜೋರಾಯಿತು. ಗುಡುಗಿನ ಮೊರೆತವೂ ಹೆಚ್ಚಾಗಿತ್ತು. ಕೊರೊನಾ ವೈರಾಣು ಸೋಂಕು ಹರಡುವ ಭೀತಿಯ ನಡುವೆಯೂ ರಸ್ತೆಗಳಲ್ಲಿ ಓಡಾಡುತ್ತಿದ್ದವರಿಗೆ ಮಳೆ ‘ಬ್ರೇಕ್’ ಹಾಕಿತು.
ಗಾಳಿ, ಮಳೆಯ ರಭಸಕ್ಕೆ ಶಾಹೂನಗರ ಮುಖ್ಯರಸ್ತೆಯ ಮೆಡಿಕಲ್‌ ಸ್ಟೋರ್‌ ಬಳಿ ಮರದ ದೊಡ್ಡ ಕೊಂಬೆಯೊಂದು ಮುರಿದುಬಿದ್ದಿತು. ಅದೇ ಬಡಾವಣೆಯ ಮನೆಯೊಂದರ ಮುಂದಿದ್ದ ದೊಡ್ಡ ಮರ ಉರುಳಿಬಿದ್ದಿದ್ದರಿಂದ ದ್ವಿಚಕ್ರವಾಹನ ಹಾಗೂ ಕಾರು ಜಖಂಗೊಂಡಿತು. ಜನಸಂಚಾರ ಇರಲಿಲ್ಲವಾದ್ದರಿಂದ ಪ್ರಣಾಪಾಯ ಸಂಭವಿಸಿಲ್ಲ.
