ಹಾಪ್‍ಕಾಮ್ಸ್ ಅಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡ ತೋಟಗಾರಿಕೆ ಸಚಿವ ನಾರಾಯಣ ಗೌಡ

ರೈತರಿಂದ ಗ್ರಾಹಕರಿಗೆ ಹಣ್ಣು ತರಕಾರಿ ಪೂರೈಕೆಯಾಗುವ ಕುರಿತು ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ನೇತೃತ್ವದಲ್ಲಿ ಬುದವಾರ ನಡೆದ ಸಭೆ ಬಳಿಕ ನಗರದ ವಿವಿಧ ಹಾಪ್‍ಕಾಮ್ಸ್ ಮಳಿಗೆಗಳಿಗೆ ಅವರು ದಿಢೀರ್ ಭೇಟಿ ನೀಡಿದರು. ಮಳಿಗೆಗಳಲ್ಲಿರುವ ಪೂರೈಕೆ ಪ್ರಮಾಣದ ಬಗ್ಗೆ ಪರಿಶೀಲಿಸಿ, ಕೆಲ ಮಳಿಗೆಯಲ್ಲಿ ಸರಿಯಾದ ನಿರ್ವಹಣೆ ಇಲ್ಲದಿರುವುದನ್ನು ಕಂಡು ಅಸಮಾಧಾನ ವ್ಯಕ್ತಪಡಿಸಿದರು.

'ಲಾಕ್‍ಡೌನ್ ವೇಳೆ ಹಾಪ್‍ಕಾಮ್ಸ್ ಜವಾಬ್ದಾರಿ ಮಹತ್ತರವಾದುದು. ಮಳಿಗೆಗಳಲ್ಲಿ ಕೇವಲ ಮಾರಾಟ ಮಾಡಿದರೆ ಸಾಲದು. ಇಂತಹ ಸಂದರ್ಭದಲ್ಲಿ ಗ್ರಾಹಕರಿಗೆ ಹಣ್ಣು, ತರಕಾರಿ, ಮೊಟ್ಟೆ ಎಲ್ಲವೂ ಸುಲಭವಾಗಿ ಸಿಗುವಂತಾಗಬೇಕು. ನಗರದ ಎಲ್ಲ ಬಡಾವಣೆಗಳಿಗೆ ವಾಹನಗಳಲ್ಲಿ ತೆರಳಿ ಹಣ್ಣು, ತರಕಾರಿಗಳನ್ನು ಮಾರಾಟ ಮಾಡಬೇಕು. ರೈತರು ಬೆಳೆದ ಬೆಳೆಯನ್ನು ರಸ್ತೆಬದಿ ಬಿಸಾಡುವಂತಾಗಬಾರದು. ರೈತರಿಂದ ಹಣ್ಣು-ತರಕಾರಿ ಖರೀದಿಸಿ, ಮಳಿಗೆಗಳಲ್ಲಿ ಸಾಕಷ್ಟು ಪೂರೈಕೆ ಇರುವಂತೆ ಎಚ್ಚರ ವಹಿಸಬೇಕು' ಎಂದು ಸೂಚಿಸಿದರು.