ಚೀನಾ ಹೆಣೆದ ಸಂಘರ್ಷದ ಬಲೆ

ಬೀಜಿಂಗ್: ತಣ್ಣನೆಯ ಹಿಮಾಲಯದ ಕಣಿವೆಗಳಿಂದ ಉಷ್ಣವಲಯದ ದ್ವೀಪಗಳವರೆಗೆ, ಅಕ್ಕಪಕ್ಕದ ರಾಷ್ಟ್ರಗಳಿಂದ ದೂರದಲ್ಲಿರುವ ಪಶ್ಚಿಮದ ರಾಜಧಾನಿಗಳವರೆಗೆ ಚೀನಾ ಪ್ರಪಂಚದಾದ್ಯಂತ ಹಲವು ಸಂಘರ್ಷಗಳಿಗೆ ಮುಖಾಮುಖಿ ಆಗುತ್ತಿದೆ.

. ಅತ್ತ ಅಮೆರಿಕವು ಅಷ್ಟಷ್ಟೇ ಹಿಂದೆ ಸರಿದಷ್ಟು ಇತ್ತ ಚೀನಾ ಅಷ್ಟೇ ದೃಢವಾದ ಹೆಜ್ಜೆಯೊಂದಿಗೆ ಮುನ್ನುಗ್ಗುತ್ತಿದೆ.

. ಪಶ್ಚಿಮದ ದೇಶಗಳ ಕಟು ಟೀಕೆಗಳ ಹೊರತಾಗಿಯೂ ವಿವಾದಾತ್ಮಕ ಭದ್ರತಾ ಕಾನೂನನ್ನು ಹಾಂಗ್ಕಾಂಗ್ನಲ್ಲಿ ಜಾರಿಗೆ ತಂದಿರುವುದು, ಚೀನಾ ದೇಶವೀಗ ಜಾಗತಿಕ ‘ಸೂಪರ್ಪವರ್’ ಆಗಿ ಬೆಳೆಯುತ್ತಿರುವುದಕ್ಕೆ ಮತ್ತೊಂದು ಉದಾಹರಣೆ.

. ಒಂದೊಮ್ಮೆ ದುರ್ಬಲವಾಗಿದ್ದ ಚೀನಾವನ್ನು ಮತ್ತೆ ವಿಶ್ವದ ಮುಂಚೂಣಿ ಸ್ಥಾನದಲ್ಲಿ ಪ್ರತಿಷ್ಠಾಪಿಸಲು ಅಧ್ಯಕ್ಷ ಷಿ ಜಿನ್ಪಿಂಗ್ ಅವರ ಕಾರ್ಯತಂತ್ರದ ಭಾಗವಾಗಿ ಈ ಘರ್ಷಣೆಗಳು ಕಂಡುಬರುತ್ತಿವೆ. ‘ಅಮೆರಿಕ ಫಸ್ಟ್’ ನೀತಿಯೊಂದಿಗೆ ಮಿತ್ರ ರಾಷ್ಟ್ರಗಳನ್ನೇ ದೂರ ಸರಿಸುತ್ತಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು, ಚೀನಾದೊಂದಿಗೆ ವಾಣಿಜ್ಯ ಸಮರಕ್ಕೂ ಇಳಿದಿರುವ ಈ ಸನ್ನಿವೇಶದಲ್ಲಿ ಘರ್ಷಣೆಗಳು ತೀವ್ರ ಸ್ವರೂಪ ಪಡೆಯುತ್ತಿವೆ.

. ‘ಚೀನಾ ಮತ್ತೆ ಹೊಳೆಯುವಂತಹ ದಿನಗಳು ಬರುತ್ತಿವೆ’ ಎನ್ನುತ್ತಾರೆ ಲಂಡನ್ನಿನ ಓರಿಯಂಟಲ್ ಅಂಡ್ ಆಫ್ರಿಕನ್ ಸ್ಟಡೀಸ್ ಸ್ಕೂಲ್ನ ಚೀನಾ ವಿಭಾಗದ ನಿರ್ದೇಶಕ ಸ್ಟೀವ್ ತ್ಸಾಂಗ್. ‘ಇದರರ್ಥ ಖಡ್ಗವನ್ನು ಝಳಪಿಸಲು ಜಿನ್ಪಿಂಗ್ ನೀಡಿರುವ ಕರೆಯನ್ನು ಪೂರೈಸುವುದೇ ಆಗಿದೆ’ ಎಂದು ತ್ಸಾಂಗ್ ಹೇಳುತ್ತಾರೆ.

. ಹಿಮಾಲಯದ ಕಣಿವೆಯಲ್ಲಿ ಚೀನಾ, ಭಾರತೀಯ ಸೈನಿಕರೊಂದಿಗೆ ಹಿಂಸಾತ್ಮಕವಾದ ಸಂಘರ್ಷ ನಡೆಸಿದೆ. ಕಳೆದ ತಿಂಗಳು ನಡೆದ ಈ ಸಂಘರ್ಷದಲ್ಲಿ ಭಾರತದ 20 ಸೈನಿಕರು ಮೃತಪಟ್ಟಿದ್ದರು. ಘಟನೆ ಕುರಿತಂತೆ ಎರಡೂ ದೇಶಗಳು ಪರಸ್ಪರ ಆರೋಪ ಮಾಡುತ್ತಿದ್ದು, ರಾಜತಾಂತ್ರಿಕ ಸಂಬಂಧ ಸಹ ಕುಸಿಯುತ್ತಿದೆ.

. ದಕ್ಷಿಣ ಚೀನಾ ಸಮುದ್ರದಲ್ಲಿ ಕೃತಕ ದ್ವೀಪಗಳನ್ನು ಸೃಷ್ಟಿಸುತ್ತಾ, ಅಲ್ಲಿ ಮಿಲಿಟರಿ ನೆಲೆಗಳನ್ನು ಸ್ಥಾಪಿಸುತ್ತಿರುವುದು ಚೀನಾ ಇತ್ತೀಚಿನ ವರ್ಷಗಳಲ್ಲಿ ತೋರಿದ ಹೊಸ ವರಸೆ. ಚೀನಾದ ನೌಕಾಪಡೆ ಇದೇ ವಾರ ಪಾರೆಸೆಲ್ಸ್ ದ್ವೀಪಸಮೂಹದಲ್ಲಿ ಮಿಲಿಟರಿ ಕವಾಯತು ನಡೆಸಿದೆ. ವಿಯಟ್ನಾಂ ಮತ್ತು ತೈವಾನ್ ದೇಶಗಳು, ಈ ದ್ವೀಪ ಸಮೂಹವು ತಮ್ಮ ಸರಹದ್ದಿನಲ್ಲಿದೆ ಎಂದು ವಾದಿಸುತ್ತಿವೆ.

. ‘ಗುರುವಾರ ನಡೆಸಲಾದ ಮಿಲಿಟರಿ ಕವಾಯತು ಏಷ್ಯಾ ವಲಯದ ಪರಿಸ್ಥಿತಿಯನ್ನು ಇನ್ನಷ್ಟು ಅಸ್ಥಿರಗೊಳಿಸಲಿದೆ’ ಎಂದು ಅಮೆರಿಕ ಸೇನೆ ಧ್ವನಿ ಎತ್ತಿದೆ. ವಿಯಟ್ನಾಂ ಅಂತೂ ಚೀನಾ ವಿರುದ್ಧ ರಾಜತಾಂತ್ರಿಕ ಪ್ರತಿಭಟನೆಯನ್ನೂ ದಾಖಲಿಸಿದೆ.

. ಅತ್ತ ಪೂರ್ವ ಚೀನಾ ಸಮುದ್ರದಲ್ಲೂ ವಿವಾದದ ಸುಳಿಗಳು ಎದ್ದಿವೆ. ಚೀನಾದ ಬಾಂಬರ್ಗಳು ಅಲ್ಲಿನ ನಿರ್ಜನ ದ್ವೀಪಗಳಲ್ಲಿ ಹಾರಾಟ ನಡೆಸುತ್ತಿವೆ ಎಂದು ಜಪಾನ್ ದೂರಿದೆ. ಆ ದ್ವೀಪಗಳ ಮೇಲೆ ಎರಡೂ ದೇಶಗಳು ಹಕ್ಕು ಸ್ಥಾಪನೆಗಾಗಿ ಜಿದ್ದಿಗೆ ಬಿದ್ದಿವೆ.

. ಪಶ್ಚಿಮದ ದೇಶಗಳೊಂದಿಗೆ ಚೀನಾದ ಸಂಬಂಧ ಕುಸಿಯುತ್ತಿದೆ. ಹೀಗಿದ್ದೂ ಆ ದೇಶ ಕಠಿಣ ರಾಜತಾಂತ್ರಿಕ ತಂತ್ರಗಳನ್ನೇ ಅನುಸರಿಸುತ್ತಿದೆ. ಕೊರೊನಾ ಸೋಂಕಿನ ಕಾರಣದಿಂದ ಆರಂಭದಲ್ಲಿ ಚೀನಾ ರಾಜತಾಂತ್ರಿಕವಾಗಿ ಮೂಲೆಗೆ ತಳ್ಳಲ್ಪಟ್ಟಂತೆ ತೋರಿತ್ತು. ತನ್ನ ದೇಶದ ವುಹಾನ್ನಲ್ಲಿ ಈ ಸೋಂಕು ಮೊದಲ ಬಾರಿಗೆ ಕಾಣಿಸಿಕೊಂಡಿದ್ದರಿಂದ ಎದುರಾದ ಆಪಾದನೆಗಳ ವಿರುದ್ಧ ಅದು ಹೋರಾಟವನ್ನೂ ನಡೆಸಬೇಕಾಯಿತು.

. ದಿನಗಳು ಕಳೆದಂತೆ ಪಶ್ಚಿಮದ ದೇಶಗಳು ಸೋಂಕನ್ನು ನಿಯಂತ್ರಿಸುವಲ್ಲಿ ವಿಫಲವಾಗಿ, ಅದರ ವಿರುದ್ಧ ಹೋರಾಟ ನಡೆಸುವಲ್ಲಿಯೇ ಹೈರಾಣಾದವು. ಆ ವೇಳೆಗೆ ರಕ್ಷಣಾತ್ಮಕ ‘ಆಟ’ ಆರಂಭಿಸಿದ ಚೀನಾ, ಆಸ್ಟ್ರೇಲಿಯಾವನ್ನು ತನ್ನ ಆಕ್ರೋಶದ ಮುಖ್ಯ ಗುರಿಯನ್ನಾಗಿಸಿಕೊಂಡಿತು.

. ಸೋಂಕಿನ ಮೂಲದ ಕುರಿತು ತನಿಖೆ ನಡೆಸುವಂತೆ ಅಮೆರಿಕದ ಬೆಂಬಲದೊಂದಿಗೆ ಆಸ್ಟ್ರೇಲಿಯಾವು ಪಟ್ಟು ಹಿಡಿದಿದ್ದುದು, ತನ್ನ ವಿಶ್ವಾಸಾರ್ಹತೆಗೆ ಕುಂದು ತರುವ ಪ್ರಯತ್ನವಾಗಿ ಬೀಜಿಂಗ್ಗೆ ಗೋಚರಿಸಿತು. ಪ್ರತಿಯಾಗಿ, ಆಸ್ಟ್ರೇಲಿಯಾದ ಸರಕುಗಳ ಮೇಲೆ ಚೀನಾ ವ್ಯಾಪಾರ ನಿರ್ಬಂಧಗಳನ್ನು ವಿಧಿಸಿತು.

. ಕೆನಡಾದ ಇಬ್ಬರು ಪ್ರಜೆಗಳನ್ನು ವಶಕ್ಕೆ ಪಡೆದು ಒಂದು ವರ್ಷದ ಬಳಿಕ ಅವರ ಮೇಲೆ ಗೂಢಚರ್ಯೆಯ ಆರೋಪವನ್ನು ಹೊರಿಸಿದೆ ಚೀನಾ. ತನ್ನ ದೇಶದ ಟೆಲಿಕಾಮ್ ದೈತ್ಯ ಹುವೈನ ಹಿರಿಯ ಅಧಿಕಾರಿಯನ್ನು ವ್ಯಾಂಕೋವರ್ನಲ್ಲಿ ಬಂಧಿಸಿದ್ದಕ್ಕೆ ಪ್ರತೀಕಾರವಾಗಿ ಚೀನಾ ಈ ಕ್ರಮ ಕೈಗೊಂಡಿರುವುದು ಮೇಲ್ನೋಟಕ್ಕೆ ಗೋಚರವಾಗುತ್ತದೆ.

. ಹಾಂಗ್ಕಾಂಗ್ನಲ್ಲಿ ಮಾನವ ಹಕ್ಕುಗಳ ದಮನವಾಗುತ್ತಿದೆ ಎಂದು ಅಮೆರಿಕ, ಇಂಗ್ಲೆಂಡ್ ಸೇರಿದಂತೆ ಹಲವು ದೇಶಗಳು ದೂರುತ್ತಿವೆ. ಆದರೆ, ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಪರಿಷತ್ತಿನಲ್ಲಿ 50 ದೇಶಗಳ ಬೆಂಬಲ ಪಡೆಯುವಲ್ಲಿ ಚೀನಾ ಯಶಸ್ವಿಯಾಗಿದೆ. ಅದರ ವಿರುದ್ಧ ನಿಂತಿದ್ದು 27 ದೇಶಗಳು ಮಾತ್ರ.

. ಕಳೆದ ವರ್ಷ, ಷಿನ್ ಜಿಯಾಂಗ್ ಪ್ರದೇಶದಲ್ಲಿ ಮುಸ್ಲಿಮರಿಗೆ ಪ್ರವೇಶ ನಿರ್ಬಂಧಿಸಿದ್ದನ್ನು 22 ರಾಷ್ಟ್ರಗಳು ಕಟುವಾಗಿ ಟೀಕಿಸಿದ್ದವು. ತನ್ನ ‘ಭಯೋತ್ಪಾದನಾ-ವಿರೋಧಿ’ ಕಾರ್ಯತಂತ್ರವನ್ನು ಬೆಂಬಲಿಸುವ 37 ದೇಶಗಳ ಪಟ್ಟಿಯೊಂದಿಗೆ ಬೀಜಿಂಗ್ ಪ್ರತಿಕ್ರಿಯಿಸಿತ್ತು.

. ‘ಚೀನಿಯರು ತಮ್ಮ ಬದುಕಿಗಾಗಿ ಇತರರ ಆಶಯಗಳನ್ನು ಅವಲಂಬಿಸುವ ದಿನಗಳು ಮುಗಿದಿವೆ’ ಎನ್ನುತ್ತಾರೆ ಹಾಂಗ್ಕಾಂಗ್ ವ್ಯವಹಾರಗಳ ಉಪ ನಿರ್ದೇಶಕ ಝಾಂಗ್ ಷಿಯಾಮಿಂಗ್.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಚೀನಾ ಹೆಣೆದ ಸಂಘರ್ಷದ ಬಲೆ

ಚಿನಕುರುಳಿ | 05 ಜುಲೈ 2025, ಶನಿವಾರ

ಚುರುಮುರಿ | ಮೌಂಟನ್ ಮೀಟಿಂಗ್!

ಅರಣ್ಯ ‌ಇಲಾಖೆಯಲ್ಲಿ ಖಾಲಿ ಇರುವ 6000 ಹುದ್ದೆಗಳ ನೇಮಕ: ಸಚಿವ ಈಶ್ವರ ಬಿ.ಖಂಡ್ರೆ

ಮಂಗಳೂರು: ಬಾಲೆಯ ಚಿಕಿತ್ಸೆಗೆ 15 ಗಂಟೆಯಲ್ಲಿ ₹75 ಲಕ್ಷ ಸಂಗ್ರಹ

ಚಿನ್ನ ಗೆದ್ದ ನೀರಜ್ ಚೋಪ್ರಾ: ಜಾವೆಲಿನ್ ಥ್ರೋ ಹಬ್ಬದಲ್ಲಿ ಸಂಭ್ರಮಿಸಿದ ಬೆಂಗಳೂರು

IND vs ENG U19: ಸೂರ್ಯವಂಶಿ ಮತ್ತೆ ‘ವೈಭವ’

ಕೆನಡಾ ಓಪನ್‌: ಸೆಮಿಫೈನಲ್‌ಗೆ ಶ್ರೀಕಾಂತ್

Wimbledon: ಸಬಲೆಂಕಾ, ಸಿನ್ನರ್‌ ಮುನ್ನಡೆ

ಒಳನೋಟ: ಸೋರುವ ಕೊಠಡಿಯಲ್ಲೇ ಕಲಿಕೆ!

ಒಳನೋಟ: ಹದಗೆಟ್ಟ ಹಾಸ್ಟೆಲ್‌ ‘ಆರೋಗ್ಯ’.. ಸರಿಯಾಗದ SC, ST, OBC ವಸತಿಶಾಲೆಗಳು

ಒಳನೋಟ | ರಾಜ್ಯದಲ್ಲಿ ವಿದೇಶಿ ಹಣ್ಣುಗಳ ದಿಬ್ಬಣ

ಒಳನೋಟ | ಕಾಲ್ತುಳಿತ ಪ್ರಕರಣ: ಸಾವಿನ ಮನೆ ಬಾಗಿಲು ತೆರೆದವರಾರು?

ಚಿನಕುರುಳಿ | 05 ಜುಲೈ 2025, ಶನಿವಾರ

ಚುರುಮುರಿ | ಮೌಂಟನ್ ಮೀಟಿಂಗ್!

ಅರಣ್ಯ ‌ಇಲಾಖೆಯಲ್ಲಿ ಖಾಲಿ ಇರುವ 6000 ಹುದ್ದೆಗಳ ನೇಮಕ: ಸಚಿವ ಈಶ್ವರ ಬಿ.ಖಂಡ್ರೆ

ಮಂಗಳೂರು: ಬಾಲೆಯ ಚಿಕಿತ್ಸೆಗೆ 15 ಗಂಟೆಯಲ್ಲಿ ₹75 ಲಕ್ಷ ಸಂಗ್ರಹ