ಕ್ಯಾಲಿಫೋರ್ನಿಯಾ: ಇಲಾನ್‌ ಮಸ್ಕ್ ಅವರ ಸ್ಪೇಸ್ ಎಕ್ಸ್ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯು ಹಾರಿಸಿದ ಫಾಲ್ಕನ್ 9 ರಾಕೇಟ್, ಭೂಮಿ ಸುತ್ತುವರಿದಿರುವ ಅಯನೋಸ್ಪಿಯರ್ ಅನ್ನು ಚುಂಬಿಸಿ ಭೂಮಿಗೆ ಮರಳಿದೆ.
ಇಲ್ಲಿನ ವ್ಯಾಂಡೆನ್‌ಬರ್ಗ್ ಸ್ಪೇಸ್ ಫೋರ್ಸ್‌ ನೆಲೆಯಿಂದ ಜುಲೈ 19ರಂದು ನಭಕ್ಕೆ ಚಿಮ್ಮಿದ ಎರಡು ಹಂತದ ರಾಕೇಟ್, ಸುರಕ್ಷಿತವಾಗಿ ಮರಳಿ ಲ್ಯಾಂಡ್ ಆಗಿದೆ. ಹೀಗಾಗಿ ಫಾಲ್ಕನ್ 9 ರಾಕೇಟ್ ಈವರೆಗೂ 240 ಬಾರಿ ಉಡ್ಡಯನಗೊಂಡು 198 ಬಾರಿ ಲ್ಯಾಂಡ್ ಮಾಡಿದೆ ಎಂದು ಸ್ಪೇಸ್ ಎಕ್ಸ್ ತನ್ನ ಜಾಲತಾಣದಲ್ಲಿ ಹೇಳಿಕೊಂಡಿದೆ.
ಬಾಹ್ಯಾಕಾಶ ಕ್ಷೇತ್ರದಲ್ಲಿ ರಾಕೇಟ್ ಸಿದ್ಧತೆಯೇ ಅತಿ ಹೆಚ್ಚಿನ ಖರ್ಚಿನ ವಿಭಾಗ. ಆದರೆ ಪುನರ್‌ಬಳಕೆಯ ರಾಕೇಟ್‌ನಿಂದಾಗಿ ಈ ಖರ್ಚು ಗಣನೀಯವಾಗಿ ತಗ್ಗಲಿದೆ ಎಂದು ಹೇಳಿದೆ.
ಸ್ಪೇಸ್ ಎಕ್ಸ್‌ನ ಈ ಪ್ರಯೋಗ ಕುರಿತು ಬೋಸ್ಟನ್‌ ವಿಶ್ವವಿದ್ಯಾಲಯದ ಭೌತವಿಜ್ಞಾನಿ ಜೆಫ್‌ ಬೌಮ್‌ಗಾರ್ಡನೆರ್‌ ಅವರು ಪ್ರತಿಕ್ರಿಯಿಸಿ, ‘ಜುಲೈ 19ರಂದು ನಡೆದ ಉಡ್ಡಯನದಿಂದ ಕೆಂಪು ಬಣ್ಣದ ಕಲೆಯು ಗೋಚರಿಸುತ್ತಿದೆ. ಇದು ಅಯನೋಸ್ಪಿಯರ್‌ನಲ್ಲಿ ಆಗಿರುವ ರಂಧ್ರವನ್ನು ಸೂಚಿಸುತ್ತದೆ’ ಎಂದಿದ್ದಾರೆ.
