ಕೀವ್‌ (ಎಪಿ): ರಷ್ಯಾ ಸೇನೆಗೆ ಯೋಧರ ನೇಮಕಾತಿ ವೇಳೆಯುವಕನೊಬ್ಬ ಸೇನಾಧಿಕಾರಿಗೆ ತುಂಬಾ ಹತ್ತಿರದಿಂದ ಗುಂಡು ಹಾರಿಸಿರುವ ಘಟನೆ ಸೋಮವಾರ ನೇಮಕಾತಿ ಕಚೇರಿ ಬಳಿ ನಡೆದಿದೆ.
ಉಕ್ರೇನ್ ವಿರುದ್ಧ ನಡೆಯುತ್ತಿರುವ ಯುದ್ಧಕ್ಕೆ ಲಕ್ಷಾಂತರ ಪುರುಷರನ್ನು ಸಜ್ಜುಗೊಳಿಸುವ ರಷ್ಯಾದ ನಾಯಕತ್ವದ ಪ್ರಯತ್ನಗಳಿಗೆ ಪ್ರತಿರೋಧವಾಗಿ ಯುವಕ ‘ನಾವು ಯಾರೊಬ್ಬರು ಯುದ್ಧ ಮಾಡಲು ಉಕ್ರೇನ್‌ಗೆ ಹೋಗುವುದಿಲ್ಲ. ನಾವೆಲ್ಲರೂ ಮನೆಗೆ ಹೋಗುತ್ತೇವೆ’ ಎಂದು ಕೂಗುತ್ತಾ ಈ ಕೃತ್ಯ ಎಸಗಿದ್ದಾನೆ.
ಸೈಬೀರಿಯಾದ ಉಸ್ತ್‌– ಇಲಿಮ್‌ಸ್ಕ್‌ ನಗರದಲ್ಲಿ ಈ ಘಟನೆ ನಡೆದಿದೆ. ಗುಂಡಿನ ದಾಳಿ ಮಾಡಿದ ಸ್ಥಳೀಯ ಯುವಕ ರಸ್ಲಾನ್‌ ಜಿನಿನ್‌ (25) ಎಂಬಾತನನ್ನು ಬಂಧಿಸಲಾಗಿದೆ. ಗಾಯಗೊಂಡ ಸೇನಾಧಿಕಾರಿ ತೀವ್ರ ನಿಗಾ ಘಟಕದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
