ವಾಷಿಂಗ್ಟನ್: ‘ಅಮೆರಿಕ ಹೊಸ ಎತ್ತರಕ್ಕೆ ಬೆಳೆಯುತ್ತಿದೆ. ಭಯದ ಬದಲು ಭರವಸೆ, ಸುಳ್ಳಿನ ಬದಲಾಗಿ ಸತ್ಯವನ್ನು ಹಾಗೂ ಕತ್ತಲೆಯನ್ನು ಬಿಟ್ಟು ಬೆಳಕನ್ನು ಆಯ್ಮೆ ಮಾಡಿಕೊಂಡು ಮುನ್ನಡೆಯುತ್ತಿದೆ’ ಎಂದು ಅಮೆರಿಕದ ಅಧ್ಯಕ್ಷ ಜೋ ಬೈಡನ್ ಹೇಳಿದರು.
ಸಂಸತ್ನ ಜಂಟಿ ಅಧಿವೇಶವನ್ನು ಉದ್ದೇಶಿಸಿ ಮಾತನಾಡಿದ ಅವರು, ‘ಅಧ್ಯಕ್ಷನಾಗಿ ಅಧಿಕಾರ ವಹಿಸಿಕೊಂಡು 100 ದಿನಗಳು ಸಂದಿವೆ. ಶತಮಾನದಲ್ಲಿಯೇ ಭಯಾನಕ ಎನಿಸಿದ ಕೋವಿಡ್ ಪಿಡುಗು, ಈ ದಶಕದಲ್ಲಿಯೇ ಸಂಕಷ್ಟದಿಂದ ಕೂಡಿದ ಆರ್ಥಿಕತೆಯನ್ನು ಎದುರಿಸಬೇಕಾಯಿತು’ ಎಂದರು.
‘ಇಂಥ ಗಂಡಾಂತರವನ್ನು ಹೊಸ ಸಾಧ್ಯತೆಯಾಗಿ, ಸಂಕಷ್ಟವನ್ನು ಅವಕಾಶವನ್ನಾಗಿ ಹಾಗೂ ಹಿನ್ನಡೆಯನ್ನೇ ಶಕ್ತಿಯನ್ನಾಗಿ ಮಾಡಿಕೊಂಡು ಅಮೆರಿಕದ ಪುಟಿದೇಳುತ್ತಿದೆ’ ಎಂದರು.
‘ಅಮೆರಿಕ ಮತ್ತೆ ಪುಟಿದೇಳುತ್ತಿದೆ. ಆದರೆ ಈ ಪುನರುತ್ಥಾನ ಎಷ್ಟು ದಿನಗಳ ವರೆಗೆ ಇರಲಿದೆ ಎಂಬ ಮಾತುಗಳನ್ನು ಅನೇಕ ವಿಶ್ವನಾಯಕರು ಹೇಳುತ್ತಿರುವುದನ್ನು ನಾನು ಕೇಳಿದ್ದೇನೆ. ಆದರೆ, ಈ ಪ್ರಕ್ರಿಯೆ ತಾತ್ಕಾಲಿಕವಲ್ಲ. ಮತ್ತಷ್ಟು ಸದೃಢ ರಾಷ್ಟ್ರವಾಗಿ ಅಮೆರಿಕ ಹೊರಹೊಮ್ಮಲಿದೆ ಎಂಬುದನ್ನು ಜಗತ್ತಿಗೆ ನಾವು ತೋರಿಸಿ ಕೊಡಬೇಕಿದೆ’ ಎಂದೂ ಬೈಡನ್ ಹೇಳಿದರು.