ನಿಕರಾಗುವಾದಲ್ಲಿ ಸ್ಥಳೀಯ ಸಮುದಾಯಗಳ ಮೇಲೆ ದಾಳಿ; 12 ಮಂದಿ ಸಾವು

ಈ ಪ್ರದೇಶದಲ್ಲಿ ಅಕ್ರಮ ಗಣಿಗಾರಿಕೆ ಮತ್ತು ಮರ ಕಡಿಯುವಿಕೆಯಂತಹ ಸಮಸ್ಯೆಗಳೂ ಇವೆ.

‘ವಲಸೆಗಾರರು ಸ್ಥಳೀಯ ನಿವಾಸಿಗಳ ಪ್ರದೇಶದ ಮೇಲೆ ದಾಳಿ ನಡೆಸಿದ್ದಾರೆ. ಇದೊಂದು ಹತ್ಯಾಕಾಂಡ. ಈ ದಾಳಿಯಲ್ಲಿ ಮಿಸ್ಕಿಟೊ ಸಮುದಾಯದ 9 ಮತ್ತು ಮಯಾಂಗ್ನಾನ ಸಮುದಾಯದ ಮೂವರು ಮೃತಪಟ್ಟಿರುವುದಾಗಿ ಸ್ಥಳೀಯರು ದೃಢೀಕರಿಸಿದ್ದಾರೆ’ ಎಂದು ಪರಿಸರವಾದಿ ಅಮರು ರೂಯಿಜ್ ಆರೋಪಿಸಿದ್ದಾರೆ.

‘ಸ್ಥಳೀಯ ನಿವಾಸಿಗಳ ಮೇಲೆ ಮಾರಕಾಸ್ತ್ರಗಳು ಮತ್ತು ಬಂದೂಕುಗಳ ಮೂಲಕ ದಾಳಿ ನಡೆಸಲಾಗಿದೆ. ಅವರಿಗೆ ಹಿಂಸೆ ನೀಡಲಾಗಿದೆ. ಅಷ್ಟೇ ಅಲ್ಲದೆ ಅವರ ಮೃತ ದೇಹಗಳನ್ನು ಮರಗಳಿಗೆ ನೇಣು ಹಾಕಲಾಗಿದೆ’ ಎಂದು ಸ್ಥಳೀಯರಿಗೆ ಕಾನೂನು ನೆರವು ಒದಗಿಸುವ ಕೇಂದ್ರವೊಂದು ತಿಳಿಸಿದೆ. ಆದರೆ ಈ ಬಗ್ಗೆ ನಿಕರಾಗುವಾ ಸರ್ಕಾರವು ದೃಢಪಡಿಸಿಲ್ಲ.

ನಾವು ದಾಳಿ ಬಗ್ಗೆ ಪೊಲೀಸರು ಮತ್ತು ಸೇನೆಗೆ ತಿಳಿಸಿದ್ದೆವು. ಆದರೆ ಯಾರು ಪ್ರತಿಕ್ರಿಯಿಸಿಲ್ಲ ಎಂಬುದಾಗಿ ಸ್ಥಳೀಯ ನಿವಾಸಿಯೊಬ್ಬರು ಪ್ರಾದೇಶಿಕ ರೇಡಿಯೊ ಸ್ಟೇಷನ್‌ಗೆ ತಿಳಿಸಿದ್ದಾರೆ.

‘ಅಧ್ಯಕ್ಷ ಡೇನಿಯಲ್‌ ಒರ್ಟೆಗಾ ನೇತೃತ್ವದ ಸರ್ಕಾರವು ಕರಾವಳಿ ಪ್ರದೇಶದ ಜನರ ಸಮಸ್ಯೆಗಳನ್ನು ಬಗೆಹರಿಸಲು ಯಾವುದೇ ಕ್ರಮಕೈಗೊಂಡಿಲ್ಲ’ ಎಂದು ಸ್ಥಳೀಯ ಹೋರಾಟಗಾರರು ದೂರಿದ್ದಾರೆ.

‘ಇದುಈ ವರ್ಷ ಬೋಸವಾಸ್ ಪ್ರದೇಶದಲ್ಲಿ ಸ್ಥಳೀಯ ಗುಂಪುಗಳ ಮೇಲೆ ನಡೆದ ನಾಲ್ಕನೇ ದಾಳಿಯಾಗಿದೆ’ ಎಂದು ಮಾನವ ಹಕ್ಕುಗಳ ವಕೀಲೆ ಮರಿಯಾ ಲೂಯಿಸಾ ಅಕೋಸ್ಟಾ ಮಾಹಿತಿ ನೀಡಿದ್ದಾರೆ.

‘ಜನವರಿಯಿಂದ ಕನಿಷ್ಠ 49 ಸ್ಥಳೀಯ ನಿವಾಸಿಗಳನ್ನು ವಲಸೆಗಾರರು ಹತ್ಯೆ ಮಾಡಿದ್ದಾರೆ. ಅನೇಕರು ಹೆದರಿ, ಅಲ್ಲಿಂದ ಪಲಾಯನ ಮಾಡಿದ್ದಾರೆ’ ಎಂದು ಅಟ್ಲಾಂಟಿಕ್ ಕರಾವಳಿಯಲ್ಲಿರುವ ನ್ಯಾಯ ಮತ್ತು ಮಾನವ ಹಕ್ಕುಗಳ ಕೇಂದ್ರ ಹೇಳಿದೆ.