ತೆಂಗಿನಲ್ಲಿ ಮಿಶ್ರಬೆಳೆಯಾಗಿ...

ದೈನಂದಿನ ಬದುಕಿನಲ್ಲಿ ಬಳಕೆಯಲ್ಲಿರುವ ತೆಂಗು ಆಹಾರ, ಔಷಧಿ, ವಸತಿ, ಉರುವಲು, ಮರಮುಟ್ಟು, ನಾರು ಮತ್ತಿತರೆ ಉಪಯೋಗಗಳನ್ನು ಹೊಂದಿದೆ. 7.5 ಮೀ ಅಂತರದ ವಯಸ್ಕ ತೆಂಗಿನಮರದ ಬೇರುಗಳು ಸುಮಾರು ಶೇಕಡ 22.3 ರಷ್ಟು ಭೂ ಪ್ರದೇಶವನ್ನು ಹಾಗೂ ಶೇಕಡ 30 ರಷ್ಟು ಭೂ ಮೇಲ್ಬಾಗವನ್ನು ಬಳಸಿಕೊಳ್ಳಬಲ್ಲವು.

ಹಾಗಾಗಿ ತೆಂಗಿನ ತೋಟದಲ್ಲಿ ಅದಕ್ಕೆ ಹೊಂದಿಕೊಳ್ಳುವ ಮಧ್ಯಂತರ ಬೆಳೆಗಳನ್ನು ಬೆಳೆದು ಅಧಿಕ ಆದಾಯ ಪಡೆಯಬಹುದು. ಅಷ್ಟೇ ಅಲ್ಲದೆ ಉತ್ತಮ ರೀತಿಯಲ್ಲಿ ಸಂಪನ್ಮೂಲಗಳ ಬಳಕೆ, ಸೂರ್ಯನ ಬೆಳಕು, ಕೂಲಿ ಆಳುಗಳು ಮತ್ತು ಮುಖ್ಯವಾಗಿ ಸಮಯದ ಸದ್ಬಳಕೆ ಈ ವಿಧಾನದಲ್ಲಿ ಸಾಧ್ಯ.

 ಸಾಂಬಾರುಗಳ ರಾಜ ಕರಿಮೆಣಸನ್ನು ಕೇರಳ ಮತ್ತು ಕರ್ನಾಟಕಗಳಲ್ಲಿ ಮಿಶ್ರಬೆಳೆಯಾಗಿ ತೆಂಗು ಮತ್ತು ಅಡಿಕೆ ಬೆಳೆಯ ಆಸರೆಯಲ್ಲಿ ಬೆಳೆಯಲಾಗುತ್ತಿದೆ. ಇತ್ತೀಚಿನ ದಿನಗಳಲ್ಲಿ ತೆಂಗು ಮತ್ತು ಕರಿಮೆಣಸು ಈ ಎರಡೂ ಉತ್ಪನ್ನಗಳಿಗೆ ಬೆಲೆ ಹೆಚ್ಚಾಗುತ್ತಿರುವುದರಿಂದ ರೈತರ ಗಮನ ಈ ಬೆಳೆಗಳತ್ತ ಕೇಂದ್ರಿಕೃತವಾಗುತ್ತಿದೆ.

ಕಾಸರಗೋಡಿನ ಕೇಂದ್ರಿಯ ತೋಟದ ಬೆಳೆಗಳ ಸಂಶೋಧನಾ ಸಂಸ್ಥೆಯಲ್ಲಿ ನಡೆಸಲಾದ ಪ್ರಯೋಗದಲ್ಲಿ ತೆಂಗು ಬೇಸಾಯದಲ್ಲಿ ಕರಿಮೆಣಸಿನ ಮಿಶ್ರಬೆಳೆ ಯಶಸ್ವಿಯಾಗಿದೆ.

ನಾಟಿ ವಿಧಾನ: ಬೇರು ಬಿಟ್ಟ ಕರಿಮೆಣಸಿನ ಕಾಂಡದ ತುಂಡುಗಳನ್ನು ತೆಂಗಿನ ಬುಡದಿಂದ 1 ಮೀ ಅಂತರ ಬಿಟ್ಟು 50 ಘನ ಸೆಂ.ಮೀ ಆಳತೆಯ ಗುಂಡಿಗಳಲ್ಲಿ ನಾಟಿ ಮಾಡಬೇಕು. ನಾಟಿಗೆ 15 ದಿನ ಮೊದಲು ಗುಂಡಿಗಳಿಗೆ ಎರೆಹುಳು ಗೊಬ್ಬರ ಅಥವಾ ಕೊಟ್ಟಿಗೆ ಗೊಬ್ಬರ ಹಾಕಬೇಕು.
 
ನಾಟಿ ಮಾಡಿದ ಒಂದು ವರ್ಷದವರೆಗೆ ಸಸಿಗಳಿಗೆ ಹೆಚ್ಚಿನ ಆರೈಕೆ ಮತ್ತು ಪೋಷಣೆ ಅತ್ಯಗತ್ಯ. ಬಳ್ಳಿಗಳಿಗೆ ಆಸರೆ ಒದಗಿಸುವಿಕೆ, ರೋಗ ನಿಯಂತ್ರಣ ಇತ್ಯಾದಿ ಕ್ರಮಗಳು ಭವಿಷ್ಯದ ಇಳುವರಿಯನ್ನು ನಿರ್ಧರಿಸಬಲ್ಲವು.

ಬೆಳೆ ನಿರ್ವಹಣೆ: ಕರಿ ಮೆಣಸನ್ನು ತೆಂಗಿನ ಜತೆ ಮಿಶ್ರ ಬೆಳೆಯಾಗಿ ಬೆಳೆದಾಗ ಎರಡು ಬೆಳೆಗಳಿಗೂ ಪ್ರತ್ಯೇಕವಾದ ಆರೈಕೆ ಅವಶ್ಯಕ.