ಹಾಯ್ಕುಗಳು

ಈ ಎಲೆಗೆ
ಮುಟ್ಟುವ ತವಕ
ಎಂದೂ ಕಾಣದ ಬೇರು

ನದಿಯಲ್ಲಿ ಒಂದು
ಲಂಟಾನದ ಹೂ
ಹಿಂಬಾಲಿಸಿವೆ ಮಲ್ಲಿಗೆಯ ಕಂಪು

ಒಂದು ಹೂವು ನನ್ನನ್ನು
ಕಿತ್ತು ಹಾಕಿತು
ಎಲೆಯೊಂದು ಎತ್ತಿಕೊಂಡಿತು

ಹಿಂಬಾಲಿಸಿ ಬರುತ್ತಿದೆ
ಅದೆಲ್ಲಿಂದ?
ಒಂದು ಮಂದಹಾಸ

ಈ ಬಾಗಿದ ಸಂಜೆಗೆಂಪು
ವಿಷಾದದ ಕಿರಣ ಎದೆ ಸೇರುತ್ತದೆ
ಮೌನ

ಹೆಕ್ಕಿ ತಂದ
ಪ್ರೀತಿಯ ಕಣ ಕಣ
ಈ ಮಗು

ಹನಿ ನೀರು
ಹಸಿರು ಗರಿಕೆಯ ನಡುವೆ
ಏನನ್ನೂ ಬಯಸಿದ ಮರಳ ಕಣ

ಎಲ್ಲ ಋತುಗಳು
ಮಾತು ಕೇಳುತ್ತಿವೆ
ಈ ದಿನದ ಹೊರತಾಗಿ
ತಿಳಿಗೊಳದಲ್ಲಿ
ಬೆರಳಾಡಿಸಿದೆ
ಮನ ಕದಡಿತು

ಕಚಗುಳಿಯ ಕಾಡು ಮುಂಜಾವು
ರೆಕ್ಕೆ ಬಿಚ್ಚಿ ಚಿಮ್ಮಿದ ಹಕ್ಕಿ
ರೆಕ್ಕೆ ಮುಚ್ಚಿ ಜಾರುತ್ತಿದೆ

ಮಗುವಿನ ಮುಖದಲ್ಲಿ
ತಿಳಿ ಮಂದಹಾಸ
ನೀರೆರೆಯಬೇಕು

ಅರಳಿಯ ಬುಡದಲ್ಲಿ
ಮಿತ್ರನ ಜೊತೆ ತತ್ವಶಾಸ್ತ್ರ
ಚಿಟ್ಟೆ ಹಾರುತ್ತಿದೆ

ಪರೀಕ್ಷೆ ನಡೆಯುತ್ತಿದೆ
ಕಿಟಕಿಯಲ್ಲಿ
ಬೆಳೆದು ನಿಂತ ಮರ

ಪುಟ್ಟ ಮಗು ಉಸುರಿತು
ಶ್! ಸುಮ್ಮನಿರಿ
ಇರುವೆಗೆ ನಿದ್ದೆ

ಎಲೆಯಿಂದ ಎಲೆಗೆ
ಜಾರಿದ ಮಳೆ ಹನಿ
ಬೇರಿಗೆ ವಿಷಯ ಮುಟ್ಟಿಸಿತು

ಹಾರಿ ಬಂದಿದೆ ಕಾರಿನಲ್ಲಿ
ಅರಳಿ ಎಲೆ
ದಾರಿ ತೋರಿಸಬಹುದು

ಪುಟ್ಟ ತಲೆ ಬಾಗಿಲು
ಕಾಲ ಬಾಗುತ್ತದೆ
ದಾಸವಾಳದ ಹೂಗಳು ಹೊರಬರುತ್ತವೆ

ಹರಿದಾಡುವ
ಮಣ್ಣು
ಎರೆ ಹುಳು

ಮೊರದಲ್ಲಿಟ್ಟು ತೂರುತ್ತಿದ್ದಾಳೆ
ಮಾತು
ಹಾರಿ ಹೋಗುತ್ತಿವೆ