300 ಪುಟಗಳ ಕೃತಿಯಲ್ಲಿ ಅರ್ಧದಷ್ಟು ಜಾಗವನ್ನು ಬಂಜಾರರ ಸಂಸ್ಕೃತಿ, ಆಚರಣೆ, ಉಡುಪುಗಳನ್ನು ಪ್ರತಿಬಿಂಬಿಸುವ ಚಿತ್ರಗಳಿಗೆ ನೀಡಲಾಗಿದೆ. ಲೇಖಕರು ಅದರ ಜೊತೆಜೊತೆಗೆ ಇತಿಹಾಸವನ್ನು ವಿವರಿಸುತ್ತ ಹೋಗುತ್ತಾರೆ. ‘ನಾನು ಬಂಜಾರ. ನಾವು ಸಂಚಾರಿಗಳು. ಅಲೆಮಾರಿಗಳು’ ಎಂದು ಕೃತಿಯ ಪ್ರಾರಂಭದಲ್ಲಿಯೇ ಹೇಳುವ ಲೇಖಕರು ದೇಶ, ವಿದೇಶಗಳಲ್ಲಿನ ತಮ್ಮ ಸಮುದಾಯದ ಜನರನ್ನು ಹುಡುಕಿಕೊಂಡು ಹೋಗಿದ್ದಾರೆ. ಭಾರತದಿಂದ ವಲಸೆ ಹೋದ ‘ರೋಮಾ’ ಸಮುದಾಯದ ಕುರಿತು ಕೃತಿಯಲ್ಲಿ ದಾಖಲಿಸಿರುವುದು ಕೃತಿಯ ಹಿಂದಿನ ಸಂಶೋಧನೆ–ಅಧ್ಯಯನಕ್ಕೆ ಹಿಡಿದ ಕೈಗನ್ನಡಿಯಂತಿದೆ.