ಕನ್ನಡಕ್ಕಾಗಿ ಹೊಲಿದುಕೊಂಡ ದಿರಿಸುಗಳು: ಅನುವಾದ ಸಾಹಿತ್ಯದ ಮೌಲಿಕ ವಿಶ್ಲೇಷಣೆ

ಕನ್ನಡದಲ್ಲಿ ಅನುವಾದ ಸಾಹಿತ್ಯವನ್ನು ಮೂರು ಘಟ್ಟಗಳಲ್ಲಿ ವಿವರಿಸಲಾಗಿದೆ. ಒಂದು ಶೇಕ್ಸ್‌ಪಿಯರ್‌ ಕಾಲ. ಆಗ ಇಂಗ್ಲಿಷ್‌ನಿಂದ ನಾಟಕಗಳಷ್ಟೇ ಅಲ್ಲ, ಸುನೀತಗಳು, ಕಾದಂಬರಿಗಳೂ ಬಂದವು. ಸಂಸ್ಕೃತದ ಮಹಾಕಾವ್ಯಗಳು ಕನ್ನಡಕ್ಕೆ ಬಂದವು. ರಷ್ಯನ್‌ ಮತ್ತು ಜರ್ಮನ್‌ ಸಾಹಿತ್ಯ ಕನ್ನಡಕ್ಕೆ ಬಂದಿರುವುದಕ್ಕೂ ಭಾರತದ ದೇಸಿ ಭಾಷೆಗಳ ಸಾಹಿತ್ಯವು ನಮ್ಮ ಭಾಷೆಗೆ ಅನುವಾದಗೊಂಡಿರುವುದಕ್ಕೂ ಸಂಬಂಧವಿದೆ. ಮರಾಠಿ, ಮಲಯಾಳಂ ಜೊತೆಗೆ ಬಂಗಾಲಿ ಭಾಷೆಯ ಸಾಹಿತ್ಯದ ಅನುವಾದವೂ ಇಲ್ಲಿ ಹೇರಳವಾಗಿದೆ. ಈ ಭಾಷೆಗಳನ್ನು ಹೊರತುಪಡಿಸಿದರೆ ಅನ್ಯ ದೇಸಿ ಭಾಷೆಗಳ ಅನುವಾದ ನಮ್ಮಲ್ಲಿ ಕಡಿಮೆ ಇದೆ. ಮರಾಠಿಯಲ್ಲಿ ಆತ್ಮಚರಿತ್ರೆ, ಆತ್ಮಕಥನಗಳ ಸಾಹಿತ್ಯ ಪ್ರಕಾರ, ಮಲಯಾಳಂನಲ್ಲಿ ಸ್ತ್ರೀ ಸಾಹಿತ್ಯ ಸಂಸ್ಕೃತದಿಂದ ಕಾವ್ಯಪ್ರಕಾರ ಹೆಚ್ಚು ಹೆಚ್ಚು ಕನ್ನಡಕ್ಕೆ ಬಂದಿವೆ.

ಕನ್ನಡ ನವೋದಯ ಸಾಹಿತ್ಯ ಪ್ರಕಾರದ ಜೊತೆಗೆ ಮತ್ತೆ ಮತ್ತೆ ಟಾಲ್‌ಸ್ಟಾಯ್‌ ಹಾಗೂ ಗಾಂಧೀಜಿಯವರ ನೈತಿಕ ಸಿದ್ಧಾಂತಗಳು, ಧೋರಣೆಗಳು ಅನುಸಂಧಾನವಾಗುವ ಬಗೆಯನ್ನು ಲೇಖಕಿ ಪ್ರತಿಪಾದಿಸುತ್ತ ಹೋಗುತ್ತಾರೆ. ಕನ್ನಡದ ಜಾಯಮಾನಕ್ಕೆ ಒಗ್ಗುವ ಅನುವಾದ, ಕನ್ನಡತನದೊಂದಿಗೆ ಅನುಸಂಧಾನವಾಗುವ ಬಗೆಯನ್ನು ಪುಸ್ತಕ ಸರಳವಾಗಿ, ಉದಾಹರಣೆಗಳೊಂದಿಗೆ ವಿವರಿಸುತ್ತ ಹೋಗುತ್ತದೆ. ಸಾಹಿತ್ಯ ಸಂಶೋಧಕರಿಗೆ ಒಂದು ಆಕರ ಗ್ರಂಥದಂತೆ ಇರುವ ಕೃತಿಯಲ್ಲಿ ಪ್ರತಿ ಲೇಖನದೊಂದಿಗೆ ನೀಡಿರುವ ಆಕರಗ್ರಂಥಗಳ ಪಟ್ಟಿಯೂ ಅಧ್ಯಯನಕ್ಕೆ ಸಹಾಯಕವಾಗಿದೆ.