ಜಿ. ಎಂ. ಹೆಗಡೆ ಅವರ ಸಂಪಾದಕತ್ವದಲ್ಲಿ ಪ್ರಕಟವಾಗಿರುವ ಈ ಕೃತಿಯಲ್ಲಿ ಮೂರು ಭಾಗಗಳಿವೆ. ಮೊದಲನೆಯದರಲ್ಲಿ ಶ್ರೀಯವರ ‘ಇಂಗ್ಲಿಷ್‌ ಗೀತಗಳು, ‘ಹೊಂಗನಸುಗಳು’ ಕುರಿತು ಲೇಖನಗಳಿವೆ; ಎರಡನೆಯ ಭಾಗದಲ್ಲಿ ಅವರ ನಾಟಕಸಾಹಿತ್ಯದ ವಿಮರ್ಶೆಯಿದ್ದರೆ, ಮೂರನೆಯ ಭಾಗದಲ್ಲಿ, ಕನ್ನಡ ಸಾರಸ್ವತಲೋಕಕ್ಕೆ ಬಿ.ಎಂ.ಶ್ರೀ.ಯವರ ಕೊಡುಗೆಯ ಬಗ್ಗೆ ವಿಮರ್ಶಾತ್ಮಕ ಲೇಖನಗಳಿವೆ. ಹಲವು ಗ್ರಂಥಗಳಲ್ಲಿ ನಾಲ್ಕಾರು ದಶಕಗಳಿಂದ ಪ್ರಕಟವಾಗಿದ್ದ ಲೇಖನಗಳ ಸಂಗ್ರಹವಾಗಿರುವ ಈ ಹೆಬ್ಬೊತ್ತಗೆ ಕನ್ನಡ ಸಾಹಿತ್ಯಚರಿತ್ರೆಯಲ್ಲೂ ಕಾವ್ಯಮೀಮಾಂಸೆಯಲ್ಲೂ ಆಕರಗ್ರಂಥವಾಗಿ ಒದಗುತ್ತದೆ ಎಂಬುದು ದಿಟ. ಮಾಸ್ತಿ, ಬೇಂದ್ರೆ, ತೀನಂಶ್ರೀ, ಕುರ್ತಕೋಟಿ, ಎ.ಆರ್‌.ಕೃ., – ಹೀಗೆ ಹಲವರ 43 ಲೇಖನಗಳು‘ಶ್ರೀಕೌಸ್ತಭ’ದಲ್ಲಿವೆ.
