ನಮಸ್ಕಾರ ಶ್ರೀಕೃಷ್ಣನಿಗೆ...

ಗುಡಿಸಲಲ್ಲೂ ಮಹಲಿನಲ್ಲೂ ಅಮ್ಮಂದಿರಿಗೆ ತಮ್ಮ ಕಂದರಲ್ಲಿ ಇಂದಿಗೂ ಕಾಣುವ ಏಕೈಕ ಬಿಂಬ ಮುದ್ದು ಗೋವಿಂದನೆಂಬ ಕಣ್ಣಗೊಂಬೆಗೆ- ನಮಸ್ಕಾರ ಶ್ರೀಕೃಷ್ಣನಿಗೆ.

. ಎರೆಮಣ್ಣಿನ ಬಣ್ಣದಲ್ಲೂ ಸೌಂದರ್ಯದ ಸೂಜಿಗಲ್ಲು ಉಂಟು ಎಂದು ತೋರಿದ ಅನ್ವರ್ಥನಾಮನಿಗೆ- ನಮಸ್ಕಾರ ಶ್ರೀಕೃಷ್ಣನಿಗೆ.

. ಪಿಳ್ಳಂಗೋವಿಯ ಸ್ವಚ್ಛಂದ ಸಮ್ಮೋಹಕ ನುಡಿತದಿಂದ ಗೋಕುಲದೆದೆ ಸೂರೆಗೊಂಡ ಜನಪದ ಕಲೆಗಾರನಿಗೆ- ನಮಸ್ಕಾರ ಶ್ರೀಕೃಷ್ಣನಿಗೆ.

. ಅಡೆತಡೆಗಳ ಪರಿವೆಯಿರದ ಪ್ರೇಮವೆಂಬ ಹುಚ್ಚುಹೊಳೆಗೆ ಸ್ಫೂರ್ತಿಯ ಸೆಲೆ ತಾನಾದ ರಾಧಾಮಾಧವನಿಗೆ- ನಮಸ್ಕಾರ ಶ್ರೀಕೃಷ್ಣನಿಗೆ.

. ಹಳ್ಳಿಹೈದರಿಗೆ ದಿಲ್ಲಿಯನ್ನೂ ಗೆಲ್ಲಬಲ್ಲೆವೆಂಬ ಹುಮ್ಮಸ್ಸು ನೀಡಿದ ಪೋರ ಕಂಸಾರಿಗೆ- ನಮಸ್ಕಾರ ಶ್ರೀಕೃಷ್ಣನಿಗೆ.

. ಬೇಕಾದವರ ಎತ್ತರಿಸಿದ, ಬೇಡದವರ ಒತ್ತರಿಸಿದ, ನಿಗುರಿದವರ ಕತ್ತರಿಸಿದ ಚತುರ ತಂತ್ರಗಾರನಿಗೆ- ನಮಸ್ಕಾರ ಶ್ರೀಕೃಷ್ಣನಿಗೆ.

. ಉಪದೇಶದ ಕೊನೆಗೆ, ತನ್ನ ಆಯ್ಕೆಯ ಸ್ವಾತಂತ್ರ್ಯವನ್ನು ಶಿಷ್ಯನಿಗೇ ಬಿಟ್ಟುಕೊಟ್ಟ ಅನನ್ಯ ಗೀತಾಚಾರ್ಯನಿಗೆ- ನಮಸ್ಕಾರ ಶ್ರೀಕೃಷ್ಣನಿಗೆ.

. ತಾನು ಕಟ್ಟಿದ್ದೆಲ್ಲವೂ ತನ್ನ ಕಣ್ಣ ಮುಂದೆಯೇ ಕುಸಿದು ಬಿದ್ದದ್ದನ್ನು ಕಂಡು ಕೈಚೆಲ್ಲಿದ, ಕಣ್ಮುಚ್ಚಿದ ವೃದ್ಧ ಮುತ್ಸದ್ದಿಗೆ- ನಮಸ್ಕಾರ ಶ್ರೀಕೃಷ್ಣನಿಗೆ.

. ಎಲ್ಲರಿಗೂ ಸಲ್ಲಬಲ್ಲ, ಎಲ್ಲರ ಮನ ಗೆಲ್ಲಬಲ್ಲ, ಎಲ್ಲರಲ್ಲೂ ಕೊಂಚ ಉಳ್ಳ ವಿಶ್ವರೂಪಿಗೆ- ನಮಸ್ಕಾರ ನರೋತ್ತಮನಿಗೆ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.