ಗುರುವಾರ , ಮೇ 19, 2022
21 °C

ಆರ್‌ಆರ್‌ಬಿ: ರೂ 632 ಕೋಟಿ ನೆರವು

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ನವದೆಹಲಿ (ಪಿಟಿಐ): ತೀವ್ರ ಆರ್ಥಿಕ ಮುಗ್ಗಟ್ಟು ಎದುರಿಸುತ್ತಿರುವ ಪ್ರಾದೇಶಿಕ ಗ್ರಾಮೀಣ ಬ್ಯಾಂಕುಗಳಿಗೆ (ಆರ್‌ಆರ್‌ಬಿ) ರೂ 632 ಕೋಟಿಗಳಷ್ಟು ಬಂಡವಾಳ ನೆರವು ಒದಗಿಸಲು ಕೇಂದ್ರ ಸರ್ಕಾರ ಗುರುವಾರ ಅನುಮೋದನೆ ನೀಡಿದೆ.



`ಆರ್‌ಆರ್‌ಬಿ~ಗಳಿಗೆ ಅಗತ್ಯವಿರುವಷ್ಟು ಮೂಲಧನ ಒದಗಿಸುವುದು ಮತ್ತು ಬ್ಯಾಂಕುಗಳ ಕೃಷಿ ಸಾಲ ಸಾಮರ್ಥ್ಯ ಹೆಚ್ಚಿಸಲು ಈ ನೆರವು ನೀಡಲಾಗುತ್ತಿದೆ~ ಎಂದು ಸಚಿವರೊಬ್ಬರು ಸಂಪುಟ ಸಭೆಯ ಬಳಿಕ ಸುದ್ದಿಗಾರರಿಗೆ ತಿಳಿಸಿದರು.



ಭಾರತೀಯ ರಿಸರ್ವ್ ಬ್ಯಾಂಕ್‌ನ (ಆರ್‌ಬಿಐ) ಡೆಪ್ಯುಟಿ ಗವರ್ನರ್ ಕೆ.ಸಿ ಚಕ್ರವರ್ತಿ ಅಧ್ಯಕ್ಷತೆಯಲ್ಲಿನ ಸಮಿತಿ ನೀಡಿದ ಶಿಫಾರಸು ಆಧರಿಸಿ ಈ ನೆರವು ನೀಡಲಾಗುತ್ತಿದೆ.



ಕೇಂದ್ರ ಸರ್ಕಾರ 2009-10ನೇ ಸಾಲಿನಿಂದಲೂ ನಷ್ಟಪೀಡಿತ 40 ಪ್ರಾದೇಶೀಕ ಗ್ರಾಮೀಣ ಬ್ಯಾಂಕುಗಳಿಗೆ ಅಗತ್ಯವಿರುವ ಮೂಲಧನ ಒದಗಿಸುತ್ತಾ ಬಂದಿದೆ. ಈ ಬ್ಯಾಂಕುಗಳು ಮುಖ್ಯವಾಗಿ ಗ್ರಾಮೀಣ ಮತ್ತು ಕೃಷಿ ವಲಯಗಳಿಗೆ ಸಾಲ ನೀಡುತ್ತವೆ.



ಕಳೆದ ಮಾರ್ಚ್ 2012ರ ವರೆಗೆ ಕೇಂದ್ರ ಸರ್ಕಾರ 16 `ಆರ್‌ಆರ್‌ಬಿ~ಗಳಿಗೆ ಬಂಡವಾಳ ನೆರವು ಒದಗಿಸಿದೆ. ಆದರೆ, ರಾಜ್ಯಗಳು ಇದುವರೆಗೆ ತಮ್ಮ ಪಾಲಿನ ಬಂಡವಾಳ ಬಿಡುಗಡೆ ಮಾಡಿಲ್ಲ .ಒಂದು ವೇಳೆ ರಾಜ್ಯಗಳು ಮತ್ತು ಷೇರುದಾರರು ತಮ್ಮ  ಪಾಲಿನ ಕೊಡುಗೆ ನೀಡಿದರೆ ಈ ಬ್ಯಾಂಕುಗಳು ಸುಮಾರು ರೂ 1,264 ಕೋಟಿಗಳಷ್ಟು ಬಂಡವಾಳ ನೆರವು ಪಡೆದುಕೊಳ್ಳಲಿವೆ ಎಂದು ಮೂಲಗಳು ತಿಳಿಸಿವೆ.



ನಷ್ಟಪೀಡಿತ `ಆರ್‌ಆರ್‌ಬಿ~ಗಳಿಗೆ ಮೂಲಧನ ಒದಗಿಸುವಿಕೆಯಲ್ಲಿ ಕೇಂದ್ರದ ಪಾಲು ಶೇ 50ರಷ್ಟಿದ್ದರೆ, ರಾಜ್ಯದ ಪಾಲು ಶೇ 15.  ಇನ್ನುಳಿದ ಶೇ 35ರಷ್ಟು ಬಂಡವಾಳವನ್ನು ಪ್ರಾಯೋಜಿತ ಬ್ಯಾಂಕ್ ನೀಡುತ್ತದೆ. ಸದ್ಯ ದೇಶದಲ್ಲಿ 82 `ಆರ್‌ಆರ್‌ಬಿ~ಗಳಿದ್ದು, ಹೆಚ್ಚಿನ ಬ್ಯಾಂಕುಗಳು `ಕೋರ್~ ಬ್ಯಾಂಕಿಂಗ್ ತಂತ್ರಜ್ಞಾನ ಅಳವಡಿಸಿಕೊಂಡಿವೆ. 



 ಮೂಲಧನ ಒದಗಿಸುವ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲು  ಬಂಡವಾಳ ನೆರವು ಯೋಜನೆಯನ್ನು ಇನ್ನೂ ಎರಡು ವರ್ಷಗಳ ಕಾಲ ವಿಸ್ತರಿಸಲು ಸಚಿವ ಸಂಪುಟ ಒಪ್ಪಿಗೆ ನೀಡಿದೆ.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.