ಇ-ಐಪಿಒಗೆ ಚಿಂತನೆ

ನವದೆಹಲಿ(ಪಿಟಿಐ):ಆರಂಭಿಕ ಸಾರ್ವಜನಿಕ ಕೊಡುಗೆ(ಐಪಿಒ)ಗಳ ವಿತರಣೆ ಪ್ರಕ್ರಿಯೆಯನ್ನು ಚುರುಕುಗೊಳಿಸಲು ಆಲೋಚಿಸಿರುವ `ಭಾರತೀಯ ಸಾಲಪತ್ರ ಮತ್ತು ವಿನಿಮಯ ಮಂಡಳಿ~        (ಸೆಬಿ), ಇನ್ನು ಮುಂದೆ `ಎಲೆಕ್ಟ್ರಾನಿಕ್-ಐಪಿಒ~ ಆಗಿ ಪರಿವರ್ತಿಸಲಿದೆ.



ಐಪಿಒ ಹಂಚಿಕೆಯ ಇಡೀ ಪ್ರಕ್ರಿಯೆಯಲ್ಲಿಯೇ ಸುಧಾರಣೆ ತರಲು ಯೋಜಿಸಲಾಗಿದ್ದು, ಇ-ಐಪಿಒ ಕುರಿತ ಹೊಸ ಮಾರ್ಗಸೂಚಿಗಳನ್ನು ಶೀಘ್ರವೇ ಪ್ರಕಟಿಸಲಾಗುವುದು ಎಂದು `ಸೆಬಿ~ ಪೂರ್ಣಾವಧಿ ಸದಸ್ಯ ರಾಜೀವ್ ಕುಮಾರ್ ಅಗರ್‌ವಾಲ್ ಹೇಳಿದರು.



`ಅಸೊಚಾಂ~ ಶುಕ್ರವಾರ ಇಲ್ಲಿ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಇ-ಐಪಿಒ ಚಾಲ್ತಿಗೆ ಬಂದಲ್ಲಿ ವಿತರಣೆ ಕೆಲಸ ಮತ್ತು ಆಸಕ್ತರನ್ನು ತಲುಪುವುದು ಬಹಳ ಸುಲಭವಾಗಲಿದೆ ಎಂದು ಹೇಳಿದರು.



ಇ-ಐಪಿಒ ಅನುಕೂಲವೆಂದರೆ ಆನ್‌ಲೈನ್ ಮೂಲಕವೇ ಬಹಳ ಸರಳವಾಗಿ, ಯಾವುದೇ ಹೆಚ್ಚುವರಿ ವೆಚ್ಚವಿಲ್ಲದೆ ಹಾಗೂ ಕ್ಷಿಪ್ರಗತಿಯಲ್ಲಿ ಅರ್ಜಿ ಸಲ್ಲಿಸುವುದು. ಇಲ್ಲಿ ಯಾವುದೇ ಅರ್ಜಿ-ಕಾಗದಕ್ಕೆ ಸಹಿ ಹಾಕುವ, ರವಾನೆ ಮಾಡುವ ಅಗತ್ಯವಿರುವುದಿಲ್ಲ ಎಂದರು.