ಕಳ್ಳಾಟ: ಅಶ್ರಫುಲ್ ಅಮಾನತು
ಅಕ್ಷರ ಗಾತ್ರ :ಆ |ಆ |ಆ
ಢಾಕಾ (ಐಎಎನ್‌ಎಸ್): ರಾಷ್ಟ್ರೀಯ ತಂಡದ ಮಾಜಿ ನಾಯಕ ಮೊಹಮ್ಮದ್ ಅಶ್ರಫುಲ್ ಅವರನ್ನು ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿ (ಬಿಸಿಬಿ) ಮಂಗಳವಾರ ಅಮಾನತು ಮಾಡಿದೆ. ಬಾಂಗ್ಲಾದೇಶ ಪ್ರೀಮಿಯರ್ ಲೀಗ್ (ಬಿಪಿಎಲ್) ವೇಳೆ ಮೋಸದಾಟದಲ್ಲಿ ತಾವು ಪಾಲ್ಗೊಂಡಿರುವುದಾಗಿ ಅಶ್ರಫುಲ್ ತಪ್ಪು ಒಪ್ಪಿಕೊಂಡ ಬಳಿಕ ಈ ಬೆಳವಣಿಗೆ ನಡೆದಿದೆ.
28 ವರ್ಷದ ಅಶ್ರಫುಲ್, ಐಪಿಎಲ್‌ನಲ್ಲಿ ಮುಂಬೈ ಇಂಡಿಯನ್ಸ್ ತಂಡವನ್ನು ಪ್ರತಿನಿಧಿಸುತ್ತಿದ್ದರು.
ಬಿಪಿಎಲ್‌ನಲ್ಲಿ ಮ್ಯಾಚ್ ಫಿಕ್ಸಿಂಗ್‌ನಲ್ಲಿ ಅಶ್ರಫುಲ್ ಪಾತ್ರವಿರುವ ಬಗ್ಗೆ ಅಂತರರಾಷ್ಟ್ರೀಯ ಕ್ರಿಕೆಟ್ ಸಮಿತಿಯ (ಐಸಿಸಿ) ಭ್ರಷ್ಟಾಚಾರ ವಿರೋಧಿ ಹಾಗೂ ಭದ್ರತಾ ವಿಭಾಗ (ಎಸಿಎಸ್‌ಯು) ಪತ್ತೆ ಹಚ್ಚಿತ್ತು.
`ಮೋಸದಾಟದಲ್ಲಿ ತಮ್ಮ ಪಾತ್ರದ ಬಗ್ಗೆ ಅಶ್ರಫುಲ್, ಎಸಿಎಸ್‌ಯು ತಂಡದ ಎದುರು ತಪ್ಪು ಒಪ್ಪಿಕೊಂಡರು. ಆದ್ದರಿಂದ ತನಿಖೆಯ ಸಂಪೂರ್ಣ ವರದಿ ದೊರೆಯುವ ತನಕ, ಅವರನ್ನು ಯಾವುದೇ ದರ್ಜೆಯ ಕ್ರಿಕೆಟ್‌ನಲ್ಲಿ ಆಡಲು ಅನುಮತಿ ನೀಡುವುದಿಲ್ಲ. ನಾವು ಅವರನ್ನು ಶಿಕ್ಷಿಸುತ್ತಿಲ್ಲ' ಎಂದು ಬಿಸಿಬಿ ಅಧ್ಯಕ್ಷ ನಜ್ಮುಲ್ ಹಸನ್ ಪಪೊನ್ ತಿಳಿಸಿದ್ದಾರೆ.
ಬಿಪಿಎಲ್‌ನ ದ್ವಿತೀಯ ಆವೃತ್ತಿಯಲ್ಲಿ ಢಾಕಾ ಗ್ಲಾಡಿಯೇಟರ್ಸ್ ಹಾಗೂ ಚಿತ್ತಗಾಂಗ್ ಕಿಂಗ್ಸ್ ನಡುವಿನ ಪಂದ್ಯದ ವೇಳೆ ಮೋಸದಾಟ ನಡೆದಿತ್ತು. ಚಿತ್ತಗಾಂಗ್ ಕಿಂಗ್ಸ್ ವಿರುದ್ಧ ಸೋಲಲು ಅಶ್ರಫುಲ್‌ಗೆ ಸುಮಾರು ಏಳು ಲಕ್ಷ ರೂಪಾಯಿ ನೀಡಲಾಗಿತ್ತು ಎನ್ನಲಾಗಿದೆ.
ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ
ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.
