ಕೆನರಾ ಬ್ಯಾಂಕ್‌ಗೆಎಫ್‌ಕೆಸಿಸಿಐ ಪ್ರಶಸ್ತಿ

ಬೆಂಗಳೂರು: ಕರ್ನಾಟಕ ವಾಣಿಜ್ಯೋದ್ಯಮ ಮಹಾಸಂಘವು (ಎಫ್‌ಕೆಸಿಸಿಐ) ಬುಧವಾರ ಇಲ್ಲಿ ಏರ್ಪಡಿಸಿದ್ದ ವಾರ್ಷಿಕ ರಫ್ತು ಶ್ರೇಷ್ಠತೆ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ, ರಾಷ್ಟ್ರೀಕೃತ ಕೆನರಾ ಬ್ಯಾಂಕ್, `ಅತ್ಯುತ್ತಮ ಹಣಕಾಸು ಸಂಸ್ಥೆ~ ವಿಭಾಗದಲ್ಲಿ ಸುವರ್ಣ ಪ್ರಶಸ್ತಿ ಪಡೆದುಕೊಂಡಿದೆ.



ರಾಜ್ಯದಲ್ಲಿ ರಫ್ತು ವಹಿವಾಟು ಗಮನಾರ್ಹವಾಗಿ ಬೆಳವಣಿಗೆ ಕಾಣಲು ಬ್ಯಾಂಕ್ ನೀಡಿದ ಕೊಡುಗೆಗಾಗಿ ಈ ಪ್ರಶಸ್ತಿ ನೀಡಲಾಗಿದೆ.ದೇಶದಲ್ಲಿ ವಿದೇಶ ವಿನಿಮಯ ವಹಿವಾಟು ಆರಂಭಿಸಿದ ಮೊದಲ ಬ್ಯಾಂಕ್‌ಗಳಲ್ಲಿ  ಕೆನರಾ ಬ್ಯಾಂಕ್ ಕೂಡ ಒಂದಾಗಿದೆ. ಮುಂಬೈನಲ್ಲಿ 1953ರಲ್ಲಿ  ತನ್ನ ಮೊದಲ ವಿದೇಶ ವಿಭಾಗದ ಆರಂಭಿಸಿತ್ತು.

 

ಬ್ಯಾಂಕ್ ಅಂದಿನಿಂದ ದೇಶದ ವಿದೇಶಿ ವಿನಿಮಯ ವಹಿವಾಟಿನಲ್ಲಿ ಪ್ರಮುಖ ಪಾತ್ರ ನಿರ್ವಹಿಸುತ್ತಿದೆ. 2010-11ನೇ ಹಣಕಾಸು ವರ್ಷದಲ್ಲಿ ಬ್ಯಾಂಕ್, ರೂ 1,24,094 ಕೋಟಿಗಳಷ್ಟು ವಿದೇಶಿ ವಿನಿಮಯ ವಹಿವಾಟು ನಡೆಸಿದ್ದು,  ರಫ್ತು ವಹಿವಾಟು ರೂ  45,657 ಕೋಟಿಗಳಷ್ಟಿದೆ.