ಚಂದಾ: ಪ್ರಭಾವಿ ಮಹಿಳೆ

ನವದೆಹಲಿ (ಪಿಟಿಐ): `ಐಸಿಐಸಿಐ~ ಬ್ಯಾಂಕಿನ ವ್ಯವಸ್ಥಾಪಕ ನಿರ್ದೇಶಕಿ ಮತ್ತು ಮುಖ್ಯಕಾರ್ಯನಿರ್ವಾಹಕ ಅಧಿಕಾರಿ ಚಂದಾ ಕೊಚ್ಚಾರ್, ಭಾರತದ ಅತ್ಯಂತ ಪ್ರಭಾವಿ ಮಹಿಳಾ ಉದ್ಯಮಿ ಎಂದು   `ಫಾರ್ಚೂನ್~ ನಿಯತಕಾಲಿಕೆ ಹೇಳಿದೆ.



ಸತತ ಎರಡನೇ ವರ್ಷವೂ ಕೊಚ್ಚಾರ್ ಮೊದಲ     ಸ್ಥಾನದಲ್ಲಿದ್ದಾರೆ. `ಟಿಎಎಫ್‌ಇ~ನ ಮಲ್ಲಿಕಾ ಶ್ರೀನಿವಾಸನ್, `ಕ್ಯಾಪ್ ಜೆಮಿನಿ ಇಂಡಿಯಾ~ದ ಅರುಣಾ ಜಯಂತಿ ನಂತರದ ಸ್ಥಾನಗಳಲ್ಲಿದ್ದಾರೆ.  `ಫಾರ್ಚೂನ್~ ಭಾರತದ 50 ಪ್ರಭಾವಿ ಮಹಿಳಾ ಉದ್ಯಮಿಗಳ ಪಟ್ಟಿ ಬಿಡುಗಡೆ ಮಾಡಿದ್ದು, ಇದರಲ್ಲಿ `ಕ್ರಿಸಿಲ್~ನ ಮುಖ್ಯಕಾರ್ಯನಿರ್ವಾಹಕ ಅಧಿಕಾರಿ ರೂಪ ಕುಡ್ವಾ ಕೂಡ ಸೇರಿದ್ದಾರೆ.



`ಈ ವರ್ಷ ಪಟ್ಟಿಗೆ 6 ಜನ ಹೊಸದಾಗಿ ಸೇರ್ಪಡೆಗೊಂಡಿದ್ದಾರೆ. 17 ಜನರು ತಮ್ಮ ಶ್ರೇಣಿಯಲ್ಲಿ ಕುಸಿತ ಕಂಡಿದ್ದಾರೆ~ ಎಂದು ಫಾರ್ಚೂನ್  ಇಂಡಿಯಾ ಸಂಪಾದಕ ದಿಬಯೇಂದ್ರ ನಾಥ್ ಮುಖರ್ಜಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.



ಆರು ಹೊಸ ಸೇರ್ಪಡೆಯಲ್ಲಿ `ಕೋಲ್ಗೇಟ್~ ವ್ಯವಸ್ಥಾಪಕ ನಿರ್ದೇಶಕಿ ಪ್ರಭಾ ಪರಮೇಶ್ವರಿ, ಮೋರ್ಗನ್ ಸ್ಟಾನ್ಲಿ ಇಂಡಿಯಾದ ಐಶಾ ಡಿ.ಸಕರಿಯಾ, ಇಂಟೆಲ್ ದಕ್ಷಿಣ ಏಷ್ಯಾ ಎಂ.ಡಿ ದೇಬ್‌ಜಾನಿ ಘೋಷ್, ಟಪ್ಪರ್‌ವೇರ್ ಇಂಡಿಯಾ ವ್ಯವಸ್ಥಾಪಕ ನಿರ್ದೇಶಕಿ ಆಶಾ ಗುಪ್ತಾ ಇದ್ದಾರೆ.



`ಸನ್ ಟಿವಿ~ ಸಮೂಹದ ಕಾರ್ಯನಿರ್ವಾಹಕ ನಿರ್ದೇಶಕಿ ಕಾವೇರಿ ಕಲಾನಿಧಿ ಅತ್ಯಂತ ಹೆಚ್ಚು ವೇತನ ಪಡೆಯುತ್ತಿರುವ ಭಾರತದ ಮಹಿಳಾ ಉದ್ಯಮಿ. ಕಾವೇರಿ ಅವರ ವಾರ್ಷಿಕ ವೇತನ ರೂ 57 ಕೋಟಿ ಎಂದೂ ಫಾರ್ಚೂನ್ ಹೇಳಿದೆ.