ಚುನಾವಣೆಯಲ್ಲಿ ಸೋಲು: ಹೈಕಮಾಂಡ್‌ಗೆ ರಮ್ಯಾ ದೂರು

ಬೆಂಗಳೂರು: ವಸತಿ ಸಚಿವ ಎಂ.ಎಚ್‌.­ಅಂಬರೀಷ್ ಮತ್ತು ರಾಜ್ಯಸಭಾ ಸದಸ್ಯ ಎಸ್‌.ಎಂ.ಕೃಷ್ಣ ಬಣಗಳ ನಡುವಿನ ಕಿತ್ತಾ­ಟವೇ ಮಂಡ್ಯ ಲೋಕಸಭಾ ಕ್ಷೇತ್ರದಲ್ಲಿ ತಮ್ಮ ಸೋಲಿಗೆ ಕಾರಣ ಎಂದು ಆರೋ­ಪಿಸಿ ಕಾಂಗ್ರೆಸ್‌ ಹೈಕಮಾಂಡ್‌ಗೆ ದೂರು ನೀಡಿರುವ ಮಾಜಿ ಸಂಸದೆ ರಮ್ಯಾ, ಈ ಬಗ್ಗೆ ತನಿಖೆ ನಡೆಸುವಂತೆ ಆಗ್ರಹಿಸಿದ್ದಾರೆ.



ಮೇ 19ರಂದು ದೆಹಲಿಗೆ ತೆರಳಿದ್ದ ಅವರು ಎಐ­ಸಿಸಿ ಉಪಾಧ್ಯಕ್ಷ ರಾಹುಲ್ ಗಾಂಧಿ ಅವರನ್ನು ಭೇಟಿ­ಮಾಡಿ ಚುನಾ­ವಣೆ­ಯಲ್ಲಿ ಸೋತಿರುವ ಕುರಿತು ವಿವರ ನೀಡಿದ್ದಾರೆ. ಅಂಬ­ರೀಷ್‌ ಬಣ ವಿರುದ್ಧ ನೇರ­ವಾಗಿ ಆರೋಪ ಮಾಡಿ ದೂರು ಸಲ್ಲಿಸಿದ್ದಾರೆ ಎಂದು ಕಾಂಗ್ರೆಸ್‌ ಮೂಲಗಳು ತಿಳಿಸಿವೆ.



‘ಚುನಾವಣೆಯಲ್ಲಿ ಸಮ­ಯ­­­ದಲ್ಲಿ ಅಂಬರೀಷ್‌ ಮತ್ತು ಕೃಷ್ಣ ಬಣಗಳ ನಡುವೆ ನಿರಂತರ ಕಿತ್ತಾಟ ನಡೆ­ಯಿತು. ಜಿಲ್ಲಾ ಉಸ್ತುವಾರಿ ಸಚಿವರು ಪಕ್ಷದ ಮುಖಂಡ­ರನ್ನು ಒಗ್ಗೂಡಿ­ಸುವ ಪ್ರಯತ್ನ ಮಾಡ­ಲಿಲ್ಲ. ನನ್ನನ್ನು ಸೋಲಿಸುವ ಏಕೈಕ ಉದ್ದೇಶ­ದಿಂದ ಸಚಿವರ ಬೆಂಬಲಿಗರು ಪದೇ ಪದೇ ಪಕ್ಷದಲ್ಲಿ ಗೊಂದಲ ಸೃಷ್ಟಿಸಿ­ದರು. ಈ ಅಂಶಗಳು ಚುನಾವಣೆ­ಯಲ್ಲಿ ಹಿನ್ನಡೆ ಅನುಭವಿಸಲು ಪ್ರಮುಖ ಕಾರಣ’ ಎಂದು ರಮ್ಯಾ ದೂರಿನಲ್ಲಿ ಉಲ್ಲೇಖಿ­ಸಿ­ದ್ದಾರೆ ಎಂದು ಗೊತ್ತಾಗಿದೆ.



ಚುನಾವಣೆ ಸಂದರ್ಭದಲ್ಲಿ ಕಾಂಗ್ರೆಸ್‌ ಮುಖಂಡರು ಪಕ್ಷ ವಿರೋಧಿ ಚಟುವ­ಟಿಕೆ ನಡೆಸಿದರು. ಅವರನ್ನು ನಿಯಂತ್ರಿ­ಸುವ ಕೆಲಸ ಮಾಡ­ಲಿಲ್ಲ. ಎರಡೂ ಬಣ­ಗಳ ಮುಖಂಡರು ಸ್ವಪ್ರತಿಷ್ಠೆ­ಗಾಗಿ ಕಿತ್ತಾಟ ಮುಂದುವರಿಸಿದ್ದರು ಎಂದು ದೂರಿ­ದ್ದಾರೆ ಎನ್ನಲಾಗಿದೆ.



ಅಂಬರೀಷ್‌ ಬೆಂಬಲಿಗರಾದ ಅಮರಾ­­ವತಿ ಚಂದ್ರಶೇಖರ್, ಲಿಂಗ­ರಾಜು, ಮಧು ಮಾದೇ­ಗೌಡ, ರಮೇಶ್ ರಾಜು, ಎಲ್‌.ಆರ್‌.­ಶಿವ­ರಾಮೇಗೌಡ, ಸಿದ್ದರಾಜು, ಬಿ.ವಿವೇಕಾನಂದ ಮತ್ತಿತರರ ಹೆಸರನ್ನು ಮಾಜಿ ಸಂಸದೆ ದೂರಿನಲ್ಲಿ ಉಲ್ಲೇಖಿ­ಸಿ­ದ್ದಾರೆ. ಈ ಎಲ್ಲರೂ ತಮ್ಮ ಸೋಲಿಗೆ ಕಾರಣ ಎಂಬುದಾಗಿ ಆರೋಪಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.



ತನಿಖೆಗೆ ಮನವಿ: ಮಂಡ್ಯ ಲೋಕಸಭಾ ಕ್ಷೇತ್ರದಲ್ಲಿ ಕಾಂಗ್ರೆಸ್‌ಗೆ ಹಿನ್ನಡೆ ಆಗಿರುವ ಕುರಿತು ತನಿಖೆ ನಡೆಸಲು ಎಐಸಿಸಿ ವಿಶೇಷ ಸಮಿತಿಯನ್ನು ಕಳುಹಿಸಬೇಕು. ತಪ್ಪು ಮಾಡಿರುವವರನ್ನು ಗುರುತಿಸಿ ಕ್ರಮ ಜರುಗಿಸಬೇಕು ಎಂಬ ಒತ್ತಾಯ ಮಾಡಿದ್ದಾರೆ ಎಂದು ತಿಳಿದುಬಂದಿದೆ.