ಟಿ.ಜಿ.ಹಳ್ಳಿಗೆ ಹೇಮಾವತಿ ನೀರು

ಪೀಣ್ಯ ದಾಸರಹಳ್ಳಿ: ಹೇಮಾವತಿ ಜಲಾಶಯದ ನೀರನ್ನು ತಿಪ್ಪಗೊಂಡನಹಳ್ಳಿ ಕೆರೆಗೆ ತರಲು ಚಿಂತಿಸಲಾಗಿದ್ದು, ಪೂರ್ವಭಾವಿಯಾಗಿ ಸಂಬಂಧಪಟ್ಟ ಸಚಿವರು ಹಾಗೂ ಅಧಿಕಾರಿಗಳ ಜತೆ ಚರ್ಚಿಸಲಾಗಿದೆ ಎಂದು ಶಾಸಕ ಎಸ್.ಮುನಿರಾಜು ತಿಳಿಸಿದರು.



ದಾಸರಹಳ್ಳಿ ವಲಯದ ರಾಜಗೋಪಾಲನಗರ ವಾರ್ಡ್‌ನ ಅನ್ನಪೂರ್ಣೇಶ್ವರಿನಗರದ ಪಿಳ್ಳಪ್ಪನ ಕಟ್ಟೆ ಸಮೀಪ 55 ಲಕ್ಷ ರೂಪಾಯಿ ವೆಚ್ಚದಲ್ಲಿ ನಿರ್ಮಿಸಿರುವ ಕಸ ವಿಂಗಡಣೆ ಕಟ್ಟಡವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಇದರಿಂದ ದಾಸರಹಳ್ಳಿ, ಹೆಗ್ಗನಹಳ್ಳಿ, ಸುಂಕದಕಟ್ಟೆ, ಮಾಗಡಿ ರಸ್ತೆ ಮತ್ತು ಸುತ್ತಮುತ್ತಲಿನ ಅನೇಕ ಬಡಾವಣೆಗಳ ಜನರಿಗೆ ಅನುಕೂಲವಾಗಲಿದೆ. ಕಾವೇರಿ ಯೋಜನೆಯ 4ನೇ ಹಂತದ 2ನೇ ಘಟ್ಟದ ಕಾಮಗಾರಿ ಮುಗಿದು ಮಾರ್ಚ್‌ನಲ್ಲಿ ಜನತೆಗೆ ನೀರು ಪೂರೈಸಬೇಕಿತ್ತು.

 

ಆದರೆ, ಕನಕಪುರ ಬಳಿ ಕಾಮಗಾರಿಗೆ ಬಂಡೆ ಅಡ್ಡಿಯಾಗಿರುವುದರಿಂದ ಎರಡು-ಮೂರು ತಿಂಗಳು ವಿಳಂಬವಾಗಲಿದೆ. ಈ ಹಿನ್ನೆಲೆಯಲ್ಲಿ ಕುಡಿಯುವ ನೀರಿಗೆ ತೊಂದರೆಯಾಗಲಿದ್ದು, ನಾಗರಿಕರು ಸಹಕರಿಸಬೇಕು ಎಂದು ಕೋರಿದರು.ಪಾಲಿಕೆ ಸದಸ್ಯರಾದ ಎಚ್.ಎನ್.ಗಂಗಾಧರ್, ಚಂದ್ರಶೇಖರ್ ಇದ್ದರು.