`ಡೆಂಗೆ ಜ್ವರ ತಡೆಯಲು ಮುಂಜಾಗ್ರತಾ ಕ್ರಮ'

ಕೃಷ್ಣರಾಜಪುರ: `ವಿಜನಾಪುರ ವಾರ್ಡ್ ವ್ಯಾಪ್ತಿಯಲ್ಲಿ ಕಳೆದ ವರ್ಷ ಡೆಂಗೆ ಜ್ವರದಿಂದ ಇಬ್ಬರು ಮೃತಪಟ್ಟಿದ್ದರು. ಈ ಬಾರಿ ಇಂತಹ ದುರ್ಘಟನೆ ನಡೆಯದಂತೆ ತಡೆಯಲು ರಾಜರಾಜೇಶ್ವರಿ ಬಡಾವಣೆ ಸೇರಿದಂತೆ ಇನ್ನಿತರ ಬಡಾವಣೆಗಳ ಚರಂಡಿಗಳನ್ನು ಸ್ವಚ್ಛಗೊಳಿಸಲಾಗಿದೆ' ಎಂದು ಬಿಬಿಎಂಪಿ ಸದಸ್ಯ ಪಿ.ಸುಕುಮಾರ್ ತಿಳಿಸಿದರು.



ಬಿಬಿಎಂಪಿ ಕಚೇರಿಯಲ್ಲಿ ಈಚೆಗೆ ಏರ್ಪಡಿಸಿದ ಕಾರ್ಯಕ್ರಮದಲ್ಲಿ ಮಾತನಾಡಿ, `ಶುಚಿತ್ವ, ನೈರ್ಮಲ್ಯ ಕಾಪಾಡಲು ನಿವಾಸಿಗಳು ಜಾಗರೂಕತೆ ವಹಿಸಬೇಕು. ಮುಂಜಾಗ್ರತಾ ಕ್ರಮದಿಂದ ಜ್ವರ ತಡೆಗಟ್ಟಲು ಸಾಧ್ಯ' ಎಂದರು.



`ವಿಜನಾಪುರ ಪ್ರಮುಖ ರಸ್ತೆಯೂ ಸೇರಿದಂತೆ ಉಳಿದ ಬಡಾವಣೆಗಳ ಒಳಚರಂಡಿ ಕಾಮಗಾರಿಯನ್ನು ಕಾಲಮಿತಿಯೊಳಗೆ ಪೂರೈಸಲು ಅಧಿಕಾರಿಗಳಲ್ಲಿ ವಿನಂತಿ ಮಾಡಲಾಗಿದೆ' ಎಂದು ಅವರು ತಿಳಿಸಿದರು. ಜಲಮಂಡಳಿಯ ಕಾರ್ಯನಿರ್ವಾಹಕ ಎಂಜಿನಿಯರ್ ಮಹದೇವೇಗೌಡ ಇದ್ದರು.