ನಗರ ದರ್ಶನಕ್ಕೆ ಒಂದೇ ಟಿಕೆಟ್

ಬೆಂಗಳೂರು: ಒಂದೇ ಟಿಕೆಟ್‌ನಲ್ಲಿ ನಗರದ  ಪಾರಂಪರಿಕ ಮತ್ತು ವಾಣಿಜ್ಯ ಸ್ಥಳಗಳಿಗೆ ಪ್ರಯಾಣಿಕರನ್ನು ಮತ್ತು ಪ್ರವಾಸಿಗರನ್ನು ಕೊಂಡೊಯ್ಯುವ ಬೆಂಗಳೂರು ರೌಂಡ್ಸ್ – ಹಾಪ್ ಆನ್, ಹಾಪ್ ಆಫ್’ ಸರಣಿ ಹವಾ­ನಿಯಂತ್ರಿತ ವೋಲ್ವೊ ಬಸ್ ಸೇವೆಗೆ ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ ಶುಕ್ರವಾರ ಚಾಲನೆ ನೀಡಿದೆ.



ಪ್ರತಿ ದಿನ ಬೆಳಿಗ್ಗೆ ೮.೩೦ಕ್ಕೆ ನಗರದ ವಿವಿಧ ಬಸ್‌ ನಿಲ್ದಾಣದಿಂದ ಹೊರ­ಡುವ ೭ ಹವಾನಿಯಂತ್ರಿತ ವೋಲ್ವೊ ಬಸ್‌ಗಳು ರಾತ್ರಿ ೧೦ ಗಂಟೆಯವರೆಗೂ ೩೦ ರಿಂದ ೪೫ ನಿಮಿಷಗಳಿಗೆ ಒಂದರಂತೆ  ನಿಗದಿತ ಮಾರ್ಗಗಳಲ್ಲಿ ಸಂಚರಿಸಲಿವೆ. ಒಂದು ದಿನದ ಬೆಂಗಳೂರು ರೌಂಡ್ಸ್ ಟಿಕೆಟ್ ಖರೀದಿಸಿದವರು ನಿಗದಿತ  ಸ್ಥಳಗಳನ್ನು ವೀಕ್ಷಿಸಿ ಬೇರೊಂದು ಬೆಂಗಳೂರು ರೌಂಡ್ಸ್ ಬಸ್‌ನಲ್ಲಿ ನಗರ ದರ್ಶನ ಮುಂದುವರೆಸಬಹುದು.



ಈ ಟಿಕೆಟ್ ಖರೀದಿಸಿರುವವರು ವಾಯು ವಜ್ರ ಬಸ್‌ಗಳನ್ನು ಹೊರತುಪಡಿಸಿ ಬಿಎಂಟಿಸಿಯ ಎಲ್ಲಾ ಬಸ್‌ಗಳಲ್ಲೂ ಸಂಚರಿಸಬಹುದು. ಮುಂಗಡ­ವಾಗಿ ಟಿಕೆಟ್ ಕಾಯ್ದಿರಿಸುವ ಸೌಲಭ್ಯವನ್ನೂ ಈ ಸೇವೆ ಒಳ­ಗೊಂಡಿದ್ದು, ಮುಂದಿನ ನಾಲ್ಕು ದಿನ­ಗಳಲ್ಲಿ ಮುಂಗಡ ಟಿಕೆಟ್ ಕಾಯ್ದಿರಿ­ಸುವ ಸೇವೆ ಆರಂಭವಾಗಲಿದೆ.



ನಗರದರ್ಶನ ಬಸ್ ಸೇವೆಗೆ ಶುಕ್ರವಾರ ಚಾಲನೆ ನೀಡಿ ಮಾತ­ನಾಡಿದ ಸಾರಿಗೆ ಸಚಿವ ರಾಮಲಿಂಗಾ­ರೆಡ್ಡಿ, ‘ಪ್ರವಾಸಿಗರಿಗೆ ವಿಶ್ವದರ್ಜೆಯ ಸೇವೆ ಒದಗಿಸುವುದು ನಮ್ಮ ಉದ್ದೇಶ. ಸಾರ್ವಜನಿಕರ ಮತ್ತು ಪ್ರವಾಸಿಗರ ಪ್ರತಿಕ್ರಿಯೆ ಉತ್ತಮವಾಗಿದ್ದಲ್ಲಿ ನಗರ­ದರ್ಶನ ಬಸ್‌ಗಳ ಸಂಖ್ಯೆಯನ್ನು ಹೆಚ್ಚಿಸ­ಲಾಗುತ್ತದೆ. ಇಲ್ಲದಿದ್ದರೆ ನಗರದರ್ಶನ ಟ್ರಿಪ್‌ಗಳ ಸಂಖ್ಯೆಯನ್ನು ಕಡಿಮೆ ಮಾಡುತ್ತೇವೆ’ ಎಂದರು.



ಬಿಎಂಟಿಸಿ ವ್ಯವಸ್ಥಾಪಕ ನಿರ್ದೇಶಕ ಅಂಜುಂ ಫರ್ವೇಜ್‌, ಸಾರಿಗೆ ಇಲಾಖೆ ಪ್ರಧಾನ ಕಾರ್ಯದರ್ಶಿ ಪಿ.ಎನ್. ಶ್ರೀನಿ­ವಾಸಾ­ಚಾರಿ, ಶಾಸಕ ಆರ್.ವಿ. ದೇವ­ರಾಜ್,  ಬಿಬಿಎಂಪಿ ಉಪ ಮೇಯರ್ ಕೆ.ಇಂದಿರಾ ಉಪಸ್ಥಿತರಿದ್ದರು.



ಟಿಕೆಟ್‌ ಎಲ್ಲೆಡೆ ದೊರೆಯಲಿ

ಈಗ ಬೆಂಗಳೂರು ರೌಂಡ್ಸ್ ಬಸ್‌­ಗಳಲ್ಲಿ ಮಾತ್ರ ಟಿಕೆಟ್ ಲಭ್ಯವಿದೆ. ಈ ಒಂದೇ ಟಿಕೆಟ್‌ನಲ್ಲಿ ಎಲ್ಲಾ ಬಸ್‌ಗಳಲ್ಲಿ ಸಂಚರಿಸಬಹು­ದಾದರೂ, ಪ್ರತ್ಯೇಕ ಟಿಕೆಟ್ ಖರೀದಿಸಿ ನಗರದ ಬೇರೆ ಬೇರೆ ಭಾಗಗಳಿಂದ ನಿಗದಿತ ಬಸ್‌ ನಿಲ್ದಾಣ­ಗಳಿಗೆ ಬಂದು ಬೆಂಗ­ಳೂರು ರೌಂಡ್ಸ್ ಟಿಕೆಟ್ ಪಡೆಯ­ಬೇಕು. ಹೀಗೆ ಹೆಚ್ಚುವರಿ ಟಿಕೆಟ್ ಪಡೆಯುವುದನ್ನು ತಪ್ಪಿಸಲು ನಗರದ ಎಲ್ಲಾ ಪ್ರಮುಖ ಬಸ್‌ ನಿಲ್ದಾಣಗಳಲ್ಲಿ ಟಿಕೆಟ್ ಮಾರಾ­ಟಕ್ಕೆ ವ್ಯವಸ್ಥೆ ಮಾಡಬೇಕು.

–ಪುಟ್ಟಹೊನ್ನೇಗೌಡ ಎಚ್, ಕನ್ನಡ ಗ್ರಾಹಕರ ಕೂಟ.