ನರ್ಸರಿ ವಿದ್ಯಾರ್ಥಿಗೆ ಮೋದಿ ಹೋಲಿಸಿದ ಖುರ್ಷಿದ್

ಫರೂಖಾಬಾದ್/ಉತ್ತರಪ್ರದೇಶ (ಪಿಟಿಐ): 2002ರ ಗುಜರಾತ್‌ ಗಲಭೆಗೆ ಸಂಬಂಧಿಸಿ­ದಂತೆ ಮ್ಯಾಜಿಸ್ಟ್ರೇಟ್ ಕೋರ್ಟ್ ಬಿಜೆಪಿ ಪ್ರಧಾನಿ ಅಭ್ಯರ್ಥಿ ನರೇಂದ್ರ ಮೋದಿ ಅವರನ್ನು ನಿರ್ದೋಷಿ ಎಂದಿರುವುದು ನರ್ಸರಿ ವಿದ್ಯಾರ್ಥಿಗೆ ಒಳ್ಳೆಯ ಅಂಕ ನೀಡಿ­ದಂತೆ ಎಂದು ವಿದೇಶಾಂಗ ಸಚಿವ ಸಲ್ಮಾನ್‌ ಖುರ್ಷಿದ್‌ ಟೀಕಿಸಿದ್ದಾರೆ.



ಮ್ಯಾಜಿಸ್ಟ್ರೇಟ್‌ ನ್ಯಾಯಾಲಯ ನಿರ್ದೋಷಿ ಎಂದು ಹೇಳಿದ್ದನ್ನೇ ಪಿಎಚ್‌ಡಿ ಎಂದು ಭಾವಿಸಿರುವ ಮೋದಿ, ಅದನ್ನೇ ದೊಡ್ಡದಾಗಿ ಪ್ರಚಾರ ಮಾಡು­ತ್ತಿ­­ದ್ದಾರೆ ಎಂದು ಖುರ್ಷಿದ್ ವ್ಯಂಗ್ಯವಾಡಿದ್ದಾರೆ.



ಗುಜರಾತ್‌ನಲ್ಲಿ ಕೋಮು ಗಲಭೆ ನಡೆ­ದಾಗ ಮೋದಿ ಮುಖ್ಯಮಂತ್ರಿ ಆಗಿ­ದ್ದರು. ಅವರ ಸಂಪುಟ ಸಹೋದ್ಯೋಗಿ ಆಗಿದ್ದ ಮಾಯಾ ಕೊಡ್ನಾನಿ ಸೇರಿದಂತೆ 170 ಜನರಿಗೆ ಜೀವಾವಧಿ ಶಿಕ್ಷೆ ಆಗಿದೆ ಎನ್ನುವುದನ್ನು ಮರೆಯಬಾರದು ಎಂದು ಸಚಿವರು ಹೇಳಿದ್ದಾರೆ.



ವಿಕಿಲೀಕ್‌್ಸ ಸ್ಥಾಪಕ ಜೂಲಿಯನ್‌ ಅಸಾಂಜ್‌ ಅವರು ಮೋದಿ ಭ್ರಷ್ಟರಲ್ಲ ಎಂದು ಹೇಳಿರುವುದನ್ನು ಪ್ರಸ್ತಾಪಿಸಿದ ಖುರ್ಷಿದ್‌, ‘ಅಷ್ಟೊಂದು ಆತ್ಮವಿಶ್ವಾಸ­ವಿರುವವರು (ಮೋದಿ) ಎಲ್ಲರಿಂದಲೂ ಏಕೆ ಬೆಂಬಲ ಯಾಚಿಸುತ್ತಿ­ದ್ದಾರೆ ಎಂಬುದು ಅರ್ಥವಾಗುತ್ತಿಲ್ಲ’ ಎಂದು ಹೇಳಿದ್ದಾರೆ.



ಎಂಟು ವರ್ಷಗಳ ಹಿಂದೆ ಇದೇ ವಿಕಿ­ಲೀಕ್‌್ಸ, ‘ಮೋದಿ ನಂಬಿಕೆಗೆ ಅನರ್ಹ ವ್ಯಕ್ತಿ ಮತ್ತು ಬೆದರಿಕೆಯ ಮೂಲಕ ಆಡ­ಳಿತ ನಡೆಸುತ್ತಿದ್ದಾರೆ’ ಎಂದಾಗ

ಮೋದಿ, ತಮಗೆ ಯಾರೂ ಪ್ರಮಾಣ­ಪತ್ರ ನೀಡು­ವುದು ಬೇಡ ಎಂದಿದ್ದನ್ನು ಖುರ್ಷಿದ್‌ ಇಲ್ಲಿ ಉಲ್ಲೇಖಿಸಿದ್ದಾರೆ.



ಅಸಂಬದ್ಧ ಹೇಳಿಕೆ– ಬಿಜೆಪಿ (ನವದೆಹಲಿ ವರದಿ): ಮೋದಿ ಅವರ ಬಗ್ಗೆ ವಿದೇಶಾಂಗ ಸಚಿವ ಸಲ್ಮಾನ್‌ ಖುರ್ಷಿದ್‌ ನೀಡಿ­ದ ಹೇಳಿ­ಕೆ ಸಂಪೂರ್ಣ ಅಸಂಬದ್ಧದಿಂದ ಕೂಡಿದೆ ಎಂದು ಬಿಜೆಪಿ ವಕ್ತಾರ ಪ್ರಕಾಶ್‌ ಜಾವಡೇಕರ್‌ ತಿಳಿಸಿದ್ದಾರೆ.



ನ್ಯಾಯಾಂಗ ವ್ಯವಸ್ಥೆ ಬಗ್ಗೆ ಖುರ್ಷಿದ್‌ ಅಸಂಬದ್ಧ­ವಾಗಿ ಮಾತನಾಡಿದ್ದಾರೆ. ನ್ಯಾಯಾಂಗ ವ್ಯವಸ್ಥೆಯಲ್ಲಿ ಕೆಳ ಹಂತದ ಮತ್ತು ಉನ್ನತ ಮಟ್ಟದ ನ್ಯಾಯಾಲಯ­ಗಳಿಗೆ ಅವುಗಳದೇ ಆದಘನತೆ ಗೌರವ­ಗಳಿವೆ. ಆದ್ದರಿಂದ ಅವುಗಳ ಬಗ್ಗೆ ಅಗೌರ­ವ­ದಿಂದ ಮಾತನಾಡುವುದು ಅಸಂಬದ್ಧ­ವಾಗುತ್ತದೆ ಎಂದು ಜಾವಡೇಕರ್‌ ಹೇಳಿದ್ದಾರೆ.



2002ರ ಕೋಮು ಗಲಭೆಯಲ್ಲಿ ಮೋದಿ ಅವರ ಪಾತ್ರವಿಲ್ಲ ಎಂದು ನ್ಯಾಯಾ­ಲಯ ಮತ್ತು ಸುಪ್ರೀಂ­ಕೋರ್ಟ್‌ ನೇಮಿಸಿದ್ದ ವಿಶೇಷ ತನಿಖಾ ತಂಡ ಹೇಳಿದ್ದರೂ ತೀವ್ರ ಹತಾಶೆಗೆ ಒಳ­ಗಾಗಿರುವ ಕಾಂಗ್ರೆಸ್‌, ಗುಜರಾತ್ ಗಲ­ಭೆಯ ವಿಚಾರವನ್ನು ಜೀವಂತವಾಗಿರಲು ಸದಾ ಅದನ್ನೇ ಜಪಿಸುತ್ತಿದೆ ಎಂದು ಜಾವಡೇಕರ್‌ ಟೀಕಿಸಿದ್ದಾರೆ.



ಗುಜರಾತ್ ಮುಸ್ಲಿಮರು ಮತ್ತು ಇತ­ರರು ಕೋಮು ಗಲಭೆಯನ್ನು ಮರೆತಿ­ದ್ದಾರೆ. ಆದರೆ ಖುರ್ಷಿದ್‌ ಹತಾಶರಾಗಿ ನ್ಯಾಯಾಂಗದ ಘನತೆಗೆ ಚ್ಯುತಿ ತರುವ ರೀತಿ ಮಾತನಾಡುತ್ತಿದ್ದಾರೆ ಎಂದು ಅವರು ಹೇಳಿದ್ದಾರೆ.



ರಾಹುಲ್‌ ಗಾಂಧಿ ಮತ್ತು ಕಾಂಗ್ರೆಸ್‌ನ ­ಇತರ ಮುಖಂಡರು ಹಾಗೂ ಆಮ್‌ ಆದ್ಮಿ ಪಕ್ಷದ ಕೇಜ್ರಿ­ವಾಲ್, ಗುಜ­ರಾತ್‌ ಗಲಭೆಯನ್ನು ಜೀವಂತವಾಗಿ ಇರಿಸುವ ಮೂಲಕ ರಾಜಕೀಯ ಮಾಡುತ್ತಿದ್ದಾರೆ ಎಂದು ಅವರು ಟೀಕಿಸಿದ್ದಾರೆ.