ಪೌರತ್ವ ಮಸೂದೆ ಚರ್ಚೆ

ವಾಷಿಂಗ್ಟನ್ (ಪಿಟಿಐ, ಐಎಎನ್‌ಎಸ್): ಸುಮಾರು 2.60 ಲಕ್ಷ ಭಾರತೀಯರು ಸೇರಿದಂತೆ 1.1 ಕೋಟಿಗೂ ಅಧಿಕ ವಿದೇಶಿಯರಿಗೆ ಅಮೆರಿಕದ ಪೌರತ್ವ ಒದಗಿಸುವ ಐತಿಹಾಸಿಕ ವಲಸೆ ಮಸೂದೆ ಮೇಲಿನ ಚರ್ಚೆಗೆ ಸೆನೆಟ್ ಅಭೂತಪೂರ್ವ ಬೆಂಬಲ ವ್ಯಕ್ತಪಡಿಸಿದೆ.



ಈ ಮಸೂದೆಯನ್ನು ಕಾನೂನು ಆಗಿ ಪರಿವರ್ತಿಸುವ ಸಂಬಂಧ ಪೂರ್ವಭಾವಿ ಚರ್ಚೆ ನಡೆಸಲು ಅಮೆರಿಕದ ಅಧ್ಯಕ್ಷ ಬರಾಕ್ ಒಬಾಮ ಸಂಪೂರ್ಣ ಸಹಕಾರ ಘೋಷಿಸಿದ್ದಾರೆ. ಶ್ವೇತಭವನದಲ್ಲಿ ವಲಸೆ ಸುಧಾರಣಾ ಬೆಂಬಲಿಗರನ್ನುದ್ದೇಶಿಸಿ ಅವರು ಮಂಗಳವಾರ ಮಾತನಾಡಿದರು.



`ನಮ್ಮ ಎಲ್ಲ ನಾಗರಿಕರಿಗೂ ಉದ್ಯೋಗ ಮತ್ತು ಅಭಿವೃದ್ಧಿಯನ್ನು ಸೃಷ್ಟಿಸುವ ಆರ್ಥಿಕತೆಗೆ ಈ ಮಸೂದೆ ಚಾಲನಾ ಶಕ್ತಿಯಾಗಿದೆ' ಎಂದರು.



`ಇತ್ತೀಚಿನ ವರ್ಷಗಳಲ್ಲಿ ವಲಸಿಗರ ಪ್ರಭಾವ ಹೆಚ್ಚಿದ್ದು, ಅಮೆರಿಕನ್ನರು ನಿರ್ಗತಿಕರಾಗುತ್ತಿದ್ದಾರೆ' ಎಂದೂ ಒಬಾಮ ಆತಂಕ ವ್ಯಕ್ತಪಡಿಸಿದರು.



ಸಭೆಯಲ್ಲಿ  84-15 ಮತಗಳ ಅಂತರದಿಂದ ವಲಸೆ ಸುಧಾರಣಾ ಮಸೂದೆ ಮೇಲಿನ ಚರ್ಚೆಗೆ ಸೆನೆಟ್ ಬೆಂಬಲ ನೀಡಿತು.



ಈ ಮಹತ್ವದ ಮಸೂದೆಯಲ್ಲಿ ಕೆಲವು ತಿದ್ದುಪಡಿಗಳನ್ನು ಮಾಡಲು ಸೆನೆಟ್ ನ್ಯಾಯಾಂಗ ಸಮಿತಿ ಅಧ್ಯಕ್ಷ ಪ್ಯಾಟ್ರಿಕ್ ಲೇಹಿ ಸೂಚಿಸಿದರು.



ಮಸೂದೆಯನ್ನು ಕಾನೂನಾಗಿ ಪರಿವರ್ತಿಸಲು ಮುಂದಿನ ಮೂರು ವಾರಗಳಲ್ಲಿ ಜನಪ್ರತಿನಿಧಿಗಳು ಹಲವಾರು ಸಲಹೆಗಳನ್ನು ನೀಡಲಿದ್ದಾರೆ.