ಗುರುವಾರ , ಮೇ 13, 2021
16 °C

ಭಾರಿ ಮಳೆ: ಸೋಗಲಿ ಹಳ್ಳಕ್ಕೆ ಪ್ರವಾಹ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಭಾರಿ ಮಳೆ: ಸೋಗಲಿ ಹಳ್ಳಕ್ಕೆ ಪ್ರವಾಹ

ತಾಳಿಕೋಟೆ: ಪಟ್ಟಣದಲ್ಲಿ ಹಾಗೂ ಸುತ್ತಲಿನ ವಿವಿಧ ಗ್ರಾಮಗಳಲ್ಲಿ ಬುಧವಾರ ಭಾರಿ ಪ್ರಮಾಣದ ಮಳೆಯಾಗಿದೆ. ಇದರಿಂದಾಗಿ ಸಮೀಪದ ಮೂಕಿಹಾಳ ಬಳಿ ಹರಿಯುವ ಸೊಗಲಿ ಹಳ್ಳಕ್ಕೆ ಪ್ರವಾಹ ಬಂದು ಸುಮಾರು ಎರಡು ಗಂಟೆಗೂ ಅಧಿಕ ಕಾಲ ರಸ್ತೆ ಸಂಚಾರ ಅಸ್ತವ್ಯಸ್ತವಾಯಿತು.



ಸಂಜೆ ನಾಲ್ಕು ಗಂಟೆಗೆ ಆರಂಭವಾದ ಮಳೆ ಸುಮರು ಎರಡು ಗಂಟೆಗೂ ಅಧಿಕ ಕಾಲ ಸುರಿಯಿತು.  ಸೋಗಲಿ ಹಳ್ಳದ ಜಲಾನಯನ ಪ್ರದೇಶದಲ್ಲಿಯೂ ವ್ಯಾಪಕ ಮಳೆಯಾದ ಕಾರಣ ಸೋಗಲಿ ಹಳ್ಳಕ್ಕೆ ದೀಢೀರ್ ಪ್ರವಾಹ ಬಂದಿದೆ. ವಿಜಾಪುರ ಮಾರ್ಗದಲ್ಲಿ ಡೋಣಿ ನದಿಗೆ ಅಡ್ಡಲಾಗಿ ನಿರ್ಮಿಸಿರುವ ಡೋಣಿ ಸೇತುವೆ ಶಿಥಿಲಗೊಂಡಿದ್ದು ಕಳೆದ ಒಂದು ತಿಂಗಳಿಂದ ಮುದ್ದೇಬಿಹಾಳ, ವಿಜಾಪುರದತ್ತ ಹೋಗುವ ಬಾರಿ ವಾಹನಗಳು ಹಾಗೂ ಬಸ್‌ಗಳು ಹಡಗಿನಾಳ, ಮೂಕಿಹಾಳ ಮಾರ್ಗದಲ್ಲಿ ಸಂಚರಿಸುತ್ತಿವೆ. ಸೋಗಲಿ ಪ್ರವಾಹದಿಂದ ರಸ್ತೆ ಸಂಚಾರ ವ್ಯತ್ಯಯವಾದ್ದರಿಂದ  ಪ್ರಯಾಣಿಕರು ಪರದಾಡಬೇಕಾಯಿತು. ಕೆಲ ಬಸ್‌ಗಳು ಅಪಾಯಕಾರಿಯಾಗಿರುವ ಶಿಥಿಲಗೊಂಡ ಸೆತುವೆಯ ಮೇಲೆ ಮತ್ತೆ ಇಂದು ಸಂಚಾರ ಆರಂಭಿಸಿವೆ.



ಡೋಣಿ ಸೇತುವೆ ಶಿಥಿಗೊಂಡಿದ್ದು ಸೋಗಲಿ ಹಳ್ಳದ ರಸ್ತೆ ಮಳೆಗಾಲದಲ್ಲಿ ಸಂಚರಿಸಲು ಯೋಗ್ಯವಲ್ಲದ ರಸ್ತೆ ಎಂದು ತಿಳಿದಿದ್ದರೂ  ವಾಹನಗಳ ಸಂಚಾರಕ್ಕೆ  ಪರ್ಯಾಯ ವ್ಯವಸ್ಥೆ ಮಾಡದೇ, ಡೋಣಿ ನದಿ ಮೇಲಿನ ದೊಡ್ಡ ಸೇತುವೆಯನ್ನು ದುರಸ್ತಿ ಮಾಡದೇ, ನಿರ್ಲಕ್ಷ್ಯ ತೋರುತ್ತಿರುವ ಅಧಿಕಾರಿಗಳ ವಿರುದ್ಧ ಕ್ರಮ ಜರುಗಿಸುವಂತೆ ಪಟ್ಟಣದ ಕವೀ ಫೌಂಡೆಶನ್‌ನ ಸಂಸ್ಥಾಪಕ ವೀರೇಶ ಕೋರಿ ಆಗ್ರಹಿಸಿದ್ದಾರೆ.

ಪಟ್ಟಣ ಸೇರಿದಂತೆ ಸುತ್ತ ಭಾರಿ ಪ್ರಮಾಣದ ಮಳೆಯಿಂದ ಜಮೀನಿಗಳಲ್ಲಿ ನೀರು ಹರಿದಾಡಿತಲ್ಲದೇ ಒಡ್ಡು-ವಾರಿಗಳು ತುಂಬಿಕೊಂಡಿವೆ. ಬಿತ್ತನೆಗೆ ಅಗತ್ಯ ಮಳೆ ಬಂದಿರುವುದರಿಂದ ರೈತಾಪಿಗಳು ಹರ್ಷಗೊಂಡಿದ್ದಾರೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.