ಶುಕ್ರವಾರ, ಜೂನ್ 25, 2021
30 °C

ಮೋದಿ `ಕ್ಲೀನ್ ಚಿಟ್' ಪ್ರಶ್ನಿಸಿದ ಖುರ್ಷಿದ್

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಫರೂಕಾಬಾದ (ಉತ್ತರ ಪ್ರದೇಶ) (ಪಿಟಿಐ): ಗುಜರಾತ್‌ನಲ್ಲಿ 2002ರಲ್ಲಿ ನಡೆದ ಗಲಭೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬಿಜೆಪಿ ಪ್ರಧಾನಿ ಅಭ್ಯರ್ಥಿ ನರೇಂದ್ರ ಮೋದಿ ಅವರಿಗೆ ಕೆಳ ನ್ಯಾಯಾಲಯವು `ಕ್ಲೀನ್ ಚಿಟ್' ನೀಡಿರುವುದನ್ನು ಕೇಂದ್ರ ಸಚಿವ ಸಲ್ಮಾನ್ ಖುರ್ಷಿದ್ ಅವರು ಪ್ರಶ್ನಿಸುವ ಮೂಲಕ ಹೊಸ ವಿವಾದದ ತಿದಿಯೊತ್ತಿದ್ದಾರೆ.



ಮಂಗಳವಾರ ಪತ್ರಕರ್ತರ ಪ್ರಶ್ನೆಯೊಂದಕ್ಕೆ  ಪ್ರತಿಕ್ರಿಯಿಸಿದ ಖುರ್ಷಿದ್ ಅವರು `ಮ್ಯಾಜಿಸ್ಟ್ರೆಟ್ ನ್ಯಾಯಾಲಯವು ಅವರಿಗೆ ಸಮನ್ಸ್ ಕಳುಹಿಸಿಲ್ಲ... ಇದು ಸತ್ಯ... ಇದೊಂದು ರೀತಿ ನರ್ಸರಿ ವಿದ್ಯಾರ್ಥಿ ಉತ್ತಮ ಶ್ರೇಣಿ ಪಡೆದಂತಿದೆ. ನಾನೊಬ್ಬ ಡಾಕ್ಟರ್ ಎಂದು ಭಾವಿಸಿಕೊಂಡು ಆತ ಹೋದಲೆಲ್ಲಾ ಪಿಎಚ್‌ಡಿ ಪಡೆದಿರುವೆ ಎಂದು ಹೇಳಿಕೊಂಡಂತಿದೆ. ಇದು ಹೇಗೆ ಜರಗಿತು?' ಎಂದು ಪ್ರಶ್ನಿಸಿದರು.



`ಗುಜರಾತ್‌ನಲ್ಲಿ ಗಲಭೆ ಸಂಭವಿಸಿದಾಗ ಅವರು (ಮೋದಿ) ಮುಖ್ಯಮಂತ್ರಿಯಾಗಿದ್ದರು. ಪ್ರಕರಣಕ್ಕೆ ಸಂಬಂಧಿಸಿದಂತೆ ಸುಮಾರು 170 ಜನರು ಜೀವಾವಧಿ ಶಿಕ್ಷೆಗೆ ಗುರಿಯಾಗಿದ್ದಾರೆ. ಮಾಯಾ ಕೊಡ್ನಾನಿ ಆ ಸಮಯದಲ್ಲಿ ಮೋದಿ ಸಂಪುಟದಲ್ಲಿ ಸಚಿವರಾಗಿದ್ದರು' ಎಂದು ಖುರ್ಷಿದ್ ಹೇಳಿದರು.



ಕಳೆದ ತಿಂಗಳವಷ್ಟೇ ಮೋದಿ ಅವರನ್ನು `ಷಂಡ' ಎಂದು ಕರೆಯುವ ಮೂಲಕ ಖುರ್ಷಿದ್ ಅವರು ಕಾಂಗ್ರೆಸ್ ಉಪಾಧ್ಯಕ್ಷ ರಾಹುಲ್ ಗಾಂಧಿ ಅವರು ಕೆಂಗಣ್ಣಿಗೆ ಗುರಿಯಾಗಿದ್ದರು.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.