ರೈತರಿಗೂ ತಟ್ಟಿದ ಟೋಲ್‌ ಬಿಸಿ

ಬೆಂಗಳೂರು: ರಾಷ್ಟ್ರೀಯ ಹೆದ್ದಾರಿ 7ರ ಟೋಲ್‌ ಶುಲ್ಕ ಹೆಚ್ಚಿಸಿರುವುದರಿಂದ ಕೆಂಪೇ­­ಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ ಸುತ್ತಮುತ್ತಲ ಹಳ್ಳಿಗಳ ಕೃಷಿಕರಿಗೆ ಆರ್ಥಿಕವಾಗಿ  ಹೊರೆಯಾಗಿದೆ.



ದೇವನಹಳ್ಳಿ ಅಕ್ಕಪಕ್ಕದ ಗ್ರಾಮಗಳ ರೈತರು ತರಕಾರಿ, ಹೂವು, ಹಣ್ಣು ಮತ್ತಿತರ ಕೃಷಿ ಪದಾರ್ಥಗಳನ್ನು ಎನ್‌ಎಚ್‌­–7ರ ಮೂಲಕವೇ ನಗರಕ್ಕೆ ಸಾಗಿಸಿಕೊಂಡು ಬಂದು ಮಾರಾಟ ಮಾಡಬೇಕಿದೆ.



ಟೋಲ್‌ ಕೇಂದ್ರದಿಂದ 20 ಕಿ.ಮೀ ವ್ಯಾಪ್ತಿಯಲ್ಲಿ ಸಾದರಹಳ್ಳಿ, ದೇವನಹಳ್ಳಿ, ಕನ್ನಮಂಗಲ, ಭುವನಹಳ್ಳಿ, ಎರ್ತಿಗಾನ­ಹಳ್ಳಿ, ಅಣ್ಣೇಶ್ವರ, ಬೊಮ್ಮವಾರ, ವಿಶ್ವ­ನಾಥಪುರ, ಪಾಳ್ಯ ಸೇರಿದಂತೆ ಸುಮಾರು 252 ಹಳ್ಳಿಗಳಿವೆ. 



ಆ ಹಳ್ಳಿಗಳ ರೈತರು ಮುಖ್ಯವಾಗಿ ಕ್ಯಾರೆಟ್‌, ಆಲೂಗೆಡ್ಡೆ, ಬದನೆಕಾಯಿ ಮತ್ತಿತರ ತರಕಾರಿಗಳು ಹಾಗೂ ಸೊಪ್ಪು­ಗಳನ್ನು ಬೆಳೆಯುತ್ತಾರೆ. ಅಲ್ಲದೆ ಕನ­ಕಾಂಬರ, ಸುಗಂಧರಾಜ, ಮಲ್ಲಿಗೆ ಹೂ ಬೆಳೆಯುವ ಅವರು ಎನ್‌ಎಚ್‌–7ರಲ್ಲಿ ಪ್ರತಿನಿತ್ಯ ಟೋಲ್‌ ಶುಲ್ಕ ಪಾವತಿಸಿಯೇ ಕೃಷಿ ಪದಾರ್ಥಗಳನ್ನು ವಾಹನಗಳಲ್ಲಿ ನಗರಕ್ಕೆ ತರುತ್ತಿದ್ದಾರೆ.



ಈ ಹಿಂದೆ ಸರಕು ಸಾಗಣೆ ಟೆಂಪೊಗೆ ಎರಡು ಕಡೆಯ ಪ್ರಯಾಣಕ್ಕೆ ರೂ. 45 ಟೋಲ್‌ ಶುಲ್ಕವಿತ್ತು. ಇದೀಗ ಶುಲ್ಕದ ಪ್ರಮಾಣ ರೂ. 175ಕ್ಕೆ ಹೆಚ್ಚಳವಾಗಿದೆ. ಈ ಹೊರೆಯನ್ನು ವಾಹನ ಮಾಲೀಕರು ರೈತರ ಮೇಲೆಯೇ ಹೇರುತ್ತಿದ್ದಾರೆ.



‘ಕನ್ನಮಂಗಲದಿಂದ ನಗರದ ಸಿಟಿ ಮಾರುಕಟ್ಟೆಗೆ ಒಂದು ಮೂಟೆ ತರಕಾರಿ  ಸರಕಿಗೆ ಟೆಂಪೊ ಮಾಲೀಕರು ಈ ಹಿಂದೆ ರೂ. 30 ಬಾಡಿಗೆ ಪಡೆಯುತ್ತಿದ್ದರು. ಟೋಲ್‌ ಶುಲ್ಕ ಹೆಚ್ಚಳವಾದ ನಂತರ ರೂ. 40 ಬಾಡಿಗೆ ಕೇಳುತ್ತಿದ್ದಾರೆ’ ಎಂದು ರೈತ ಉಮೇಶ್‌ ‘ಪ್ರಜಾವಾಣಿ’ಗೆ ತಿಳಿಸಿದರು.



‘ಸಾಗಣೆ ವೆಚ್ಚ ಹೆಚ್ಚಳವಾಗಿದೆ ಎಂಬ ಕಾರಣಕ್ಕೆ ತರಕಾರಿ ಬೆಲೆ ಏರಿಸಲು ಸಾಧ್ಯ­ವಿಲ್ಲ. ಸಾಗಣೆ ವೆಚ್ಚಕ್ಕೆ ಅನುಗುಣ­ವಾಗಿ ತರಕಾರಿ ಬೆಲೆ ಹೆಚ್ಚಿಸಿದರೆ ವ್ಯಾಪಾರದ ಮೇಲೆ ಪ್ರತಿಕೂಲ ಪರಿಣಾಮ ಉಂಟಾ­ಗುತ್ತದೆ. ಬೆಲೆ ಹೆಚ್ಚಿಸದಿದ್ದರೆ ಲಾಭದ ಪ್ರಮಾಣ ಕಡಿಮೆಯಾಗುತ್ತದೆ’ ಎಂದು ಅವರು ಅಳಲು ತೋಡಿಕೊಂಡರು.



‘ತುಮಕೂರಿನ ಕ್ಯಾತಸಂದ್ರದಿಂದ ನೆಲ­ಮಂಗಲದವರೆಗಿನ 33 ಕಿ.ಮೀ ದೂರದ ಪ್ರಯಾಣಕ್ಕೆ ಸಣ್ಣ ಸರಕು ಸಾಗಣೆ ವಾಹನಕ್ಕೆ ರೂ. 17 ಟೋಲ್‌ ಶುಲ್ಕ­ವಿದೆ. ಆದರೆ, ಅದೇ ವಾಹನಕ್ಕೆ ಕೆಐಎಎಲ್‌ ರಸ್ತೆ­ಯಲ್ಲಿ 22 ಕಿ.ಮೀಗೆ ರೂ. 175 ಟೋಲ್‌ ಶುಲ್ಕವಿದೆ’ ಎಂದು ಕನ್ನಮಂಗಲದ ಕೃಷಿಕ ತಿಮ್ಮೇಗೌಡ ಹೇಳಿದರು.



‘ಟೋಲ್‌ ಶುಲ್ಕ ಏರಿಕೆಯಾಗಿ­ರುವು­ದರಿಂದ ರೈತರಿಗೆ ಹೆಚ್ಚಿನ ಬಾಡಿಗೆ ಕೊಡಿ ಎಂದು ಕೇಳಲು ಆಗುವುದಿಲ್ಲ. ಬಾಡಿಗೆ ಹೆಚ್ಚಿ­ಸಿದರೆ ರೈತರಿಗೆ ತೊಂದರೆಯಾ­ಗುತ್ತದೆ’ ಎಂದು ಟೆಂಪೊ ಮಾಲೀಕ ರಮೇಶ್‌ ಹೇಳಿದರು.



‘ಕೃಷಿ ಪದಾರ್ಥ ಕೊಂಡೊ­ಯ್ಯುವ ವಾಹನಗಳಿಗೆ ಶುಲ್ಕ­ದಿಂದ ವಿನಾಯಿತಿ ನೀಡಬೇಕು. ರೈತರ ಅನುಕೂಲಕ್ಕಾಗಿ ಟೋಲ್‌ ರಹಿತ ರಸ್ತೆ ನಿರ್ಮಾಣ ಮಾಡಬೇಕು’ ಎಂದು ಸಾದರ­ಹಳ್ಳಿಯ ಲೋಕೇಶ್‌ ಮನವಿ ಮಾಡಿದರು.



ಪರ್ಯಾಯ ರಸ್ತೆ

‘ಟೋಲ್‌ ಶುಲ್ಕ ಉಳಿಸುವ ಉದ್ದೇಶಕ್ಕಾಗಿ ಕೆ.ಆರ್‌.ಪುರ, ರಾಜಾನುಕುಂಟೆ ಅಥವಾ ಹಳ್ಳಿಗಳ ಅಂತರಸಂಪರ್ಕ (ಐವಿಸಿ) ರಸ್ತೆಯ ಮೂಲಕ ನಗರಕ್ಕೆ ಹೋಗಬ­ಹುದು. ಆದರೆ, ಆ ಪರ್ಯಾಯ ರಸ್ತೆಗಳ ಮೂಲಕ ಹೋದರೆ ಸುಮಾರು 30 ಕಿ.ಮೀ ದೂರ ಹೆಚ್ಚು ಕ್ರಮಿಸಬೇಕಾಗುತ್ತದೆ. ಇದರಿಂದ ಇಂಧನ ಹೆಚ್ಚು ವ್ಯಯವಾಗುತ್ತದೆ’ ಎಂದು ಸ್ಥಳೀಯರು ಹೇಳುತ್ತಾರೆ.

ಸರ್ವಿಸ್‌ ರಸ್ತೆಗೆ ಒಪ್ಪಂದ

ಸಾದರಹಳ್ಳಿ ಟೋಲ್‌ ಕೇಂದ್ರದಿಂದ 20 ಕಿ.ಮೀ ವ್ಯಾಪ್ತಿಯ ಗ್ರಾಮಗಳ ಜನರ ವಾಹನ­ಗಳ ಓಡಾಟಕ್ಕೆ ಸರ್ವಿಸ್‌ ರಸ್ತೆ ನಿರ್ಮಿಸಿ ಕೊಡುವುದಾಗಿ ನವಯುಗ ಕಂಪೆನಿಯು ರಸ್ತೆ ನಿರ್ಮಾಣಕ್ಕೂ ಮುನ್ನ ಸರ್ಕಾರದೊಂದಿಗೆ ಒಪ್ಪಂದ ಮಾಡಿ­ಕೊಂಡಿತ್ತು (ಒಪ್ಪಂದದ 27/4ನೇ ನಿಯಮ). ಆ ಒಪ್ಪಂದದಂತೆ ಕಂಪೆನಿಯು ಸರ್ವಿಸ್‌ ರಸ್ತೆಯನ್ನು ನಿರ್ಮಿಸಿದೆ.



ಆದರೆ, ಸರ್ವಿಸ್‌ ರಸ್ತೆಯ ನಿರ್ಗಮನ ಭಾಗವನ್ನು ಮುಖ್ಯರಸ್ತೆಗೆ ಸಂಪರ್ಕಿಸಿ ಟೋಲ್‌ ಕೇಂದ್ರಗಳ ಮೂಲಕವೇ ವಾಹನ­ಗಳು ಹಾದು ಹೋಗುವಂತೆ ವ್ಯವಸ್ಥೆ ಮಾಡಲಾಗಿದೆ. ಇದರಿಂದಾಗಿ ಸರ್ವಿಸ್‌ ರಸ್ತೆ­ಯಲ್ಲಿ ಬರುವ ವಾಹನಗಳ ಮಾಲೀಕರು ಸಹ ಟೋಲ್‌ ಶುಲ್ಕ ಪಾವತಿಸಬೇಕಿದೆ.