ಲಿಬಿಯಾ: ಸತ್ತವರ ಸಂಖ್ಯೆ 6000 !

ಪ್ಯಾರಿಸ್ (ಎಎಫ್‌ಪಿ): ಲಿಬಿಯಾ ಅಧ್ಯಕ್ಷ ಮುಅಮ್ಮರ್ ಗಡಾಫಿ ಅವರ ಪದಚ್ಯುತಿಗೆ ಆಗ್ರಹಿಸಿ ನಾಗರಿಕರು 15 ದಿನಗಳಿಂದ ನಡೆಸುತ್ತಿರುವ ಭಾರಿ ಪ್ರತಿಭಟನೆ ಮತ್ತು ಪ್ರತಿಭಟನೆ ಹತ್ತಿಕ್ಕಲು ಸರ್ಕಾರ ನಡೆಸಿದ ಕಾರ್ಯಾಚರಣೆಯಲ್ಲಿ ಸುಮಾರು 6000 ಮಂದಿ ಮೃತಪಟ್ಟಿದ್ದಾರೆ ಎಂದು ‘ಲಿಬಿಯನ್ ಹ್ಯೂಮನ್‌ರೈಟ್ಸ್ ಲೀಗ್’ ವಕ್ತಾರ ಅಲಿಜೆಡಾನ್ ಹೇಳಿದರು. ಲಿಬಿಯಾ ರಾಜಧಾನಿ ಟ್ರಿಪೊಲಿಯಲ್ಲಿ 3000, ಬೆಂಗಾಜಿಯಲ್ಲಿ 2000 ಮತ್ತಿತರ ನಗರಗಳಲ್ಲಿ 1000 ಮಂದಿ ಮೃತಪಟ್ಟಿದ್ದಾರೆ ಎಂದು ಅವರು ವರದಿಗಾರರಿಗೆ ತಿಳಿಸಿದರು. ‘ಇದು ಅಲ್ಲಿನ ನಾಗರಿಕರು ನಮಗೆ ನೀಡಿರುವ ಮಾಹಿತಿ. ಆದರೆ ರಾಯಭಾರ ಕಚೇರಿ ಅಧಿಕಾರಿಗಳ ಪ್ರಕಾರ 1000- 2000 ಮಂದಿ ಮೃತಪಟ್ಟಿದ್ದಾರೆ’ ಎಂದು ಅವರು ಅಂತರರಾಷ್ಟ್ರೀಯ ಮಾನವಹಕ್ಕು ಒಕ್ಕೂಟ ಏರ್ಪಡಿಸಿದ್ದ ಪತ್ರಿಕಾಗೋಷ್ಠಿಯಲ್ಲಿ ವಿವರ ನೀಡಿದರು.