ವೃತ್ತಿಪರ ಪಠ್ಯಕ್ರಮ ಯೋಜನೆ-ಮೇನಲ್ಲಿ ಜಾರಿ

ನವದೆಹಲಿ (ಪಿಟಿಐ): ಉನ್ನತ ವಿದ್ಯಾಭ್ಯಾಸ ಪಡೆಯಲು ಸಾಧ್ಯವಾಗದ ವಿದ್ಯಾರ್ಥಿಗಳಿಗೆ ಉದ್ಯೋಗ ಗಳಿಸಲು ಸಹಾಯಕವಾಗುವಂತೆ ತಯಾರಿಸಲಾಗುತ್ತಿರುವ ವೃತ್ತಿಪರ ಪಠ್ಯಕ್ರಮದ ರಚನೆಯು ಅಂತಿಮ ಹಂತದಲ್ಲಿದ್ದು, ಮೇ ತಿಂಗಳಿನಲ್ಲಿ ಇದು ಪೂರ್ಣಗೊಳ್ಳಲಿದೆ ಎಂದು ಮಾನವ ಸಂಪನ್ಮೂಲ ಸಚಿವ ಕಪಿಲ್ ಸಿಬಲ್ ಹೇಳಿದ್ದಾರೆ. ಎಂಟನೆಯ ತರಗತಿಯಿಂದ ವಿದ್ಯಾರ್ಥಿಗಳು ಈ ವೃತ್ತಿಪರ ಕೋರ್ಸ್‌ಗಳನ್ನು ತೆಗೆದುಕೊಳ್ಳಬಹುದಾಗಿದೆ. ಮರಗೆಲಸ, ವೈದ್ಯಸಹಾಯಕ ಮುಂತಾದ ಕೋರ್ಸ್‌ಗಳನ್ನು 12ನೆಯ ತರಗತಿಯವರೆಗೂ ಓದಿನ ಜೊತೆಯಲ್ಲಿಯೇ ಪೂರೈಸಬಹುದು. ವಿವಿಧ ಕೈಗಾರಿಕೆಗಳ ಸಲಹೆ ಸೂಚನೆಗಳಿಗೆ ಅನುಗುಣವಾಗಿ ಇದನ್ನು ತಯಾರಿಸಲಾಗುತ್ತಿದ್ದು, ಮೇನಲ್ಲಿ ಕಾರ್ಯಕ್ರಮ ಜಾರಿಗೆ ಬರಲಿದೆ ಎಂದು ತಿಳಿಸಿದರು.