ಶುಕ್ರವಾರ, ಜೂನ್ 18, 2021
28 °C

ಸಂಭ್ರಮದ ಚಂಪಕಧಾಮ ರಥೋತ್ಸವ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಆನೇಕಲ್: ಬನ್ನೇರುಘಟ್ಟದ ಶ್ರೀ ಚಂಪಕಧಾಮ ಸ್ವಾಮಿ ಬ್ರಹ್ಮರಥೋತ್ಸವ ಬುಧವಾರ ಸಂಭ್ರಮ ಸಡಗರಗಳಿಂದ ನೆರವೇರಿತು.



ಮಧ್ಯಾಹ್ನದ ವೇಳೆಗೆ ಶ್ರೀ ಚಂಪಕಧಾಮ ಸ್ವಾಮಿ ಉತ್ಸವ ಮೂರ್ತಿಯನ್ನು ರಥದಲ್ಲಿ ತಂದು ಕೂರಿಸಲಾಯಿತು. ಅಲಂಕೃತಗೊಂಡಿದ್ದ ರಥಕ್ಕೆ ಸಾಂಪ್ರದಾಯಿಕ ಪೂಜೆಗಳನ್ನು ಸಲ್ಲಿಸಿದ ನಂತರ ಉತ್ಸವಕ್ಕೆ ಚಾಲನೆ ನೀಡಲಾಯಿತು. ರಥವು ದೇವಾಲಯದಿಂದ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಸಾಗಿತು.



ರಥವು ದೇವಾಲಯದ ಆವರಣದಿಂದ ಸಾಗುತ್ತಿದ್ದಂತೆ ಸಾವಿರಾರು ಭಕ್ತರು ಜಯಘೋಷ ಮಾಡಿ ಸಂಭ್ರಮಿಸಿದರು. ದವನ ಚುಚ್ಚಿದ ಬಾಳೆಹಣ್ಣುಗಳನ್ನು ತೇರಿನೆಡೆಗೆ ಎಸೆಯುವ ಮೂಲಕ ತಮ್ಮ ಭಕ್ತಿ ಸಮರ್ಪಿಸಿದರು.



ಹಿನ್ನೆಲೆ: ಈ ಚಂಪಕಧಾಮ ಸ್ವಾಮಿಗೆ ಸುಮಾರು ಸಾವಿರ ವರ್ಷಗಳಿಗೂ ಪ್ರಾಚೀನ ಇತಿಹಾಸವಿದೆ.

ಪಾಂಡವರು ಅಜ್ಞಾತ ವಾಸದಲ್ಲಿದ್ದಾಗ ವಹ್ನಿಗಿರಿಯ ಪಕ್ಕದಲ್ಲಿಯ ಈ ದೇವಾಲಯವನ್ನು ಕಟ್ಟಿದರೆಂದು ಪೌರಾಣಿಕ ಹಿನ್ನೆಲೆಯಿದೆ. ಬೆಟ್ಟದ ಮೇಲ್ಭಾಗದಲ್ಲಿ ಲಕ್ಷ್ಮೀ ನರಸಿಂಹಸ್ವಾಮಿ ದೇವಾಲಯವಿದೆ.



ಕ್ರಿ.ಶ 1295ರ ತಮಿಳು ದಾಖಲೆಗಳಲ್ಲಿ ಬನ್ನೇರುಘಟ್ಟದ ಬಗ್ಗೆ ಉಲ್ಲೇಖವಿದೆ. ವರದರಾಜ ಪುರವೆಂದೂ ಸಹ ಬನ್ನೇರುಘಟ್ಟವನ್ನು ಈ ದಾಖಲೆಯಲ್ಲಿ ಕರೆಯಲಾಗಿದೆ.



ದೇವಾಲಯದಲ್ಲಿ ಚಂಪಕಧಾಮ ಸ್ವಾಮಿಯು ಶ್ರೀದೇವಿ, ಭೂದೇವಿ ಸಮೇತರಾಗಿರುವ ಮೂಲ ಮೂರ್ತಿ ಇದೆ. ಈ ದೇವಾಲಯದ ಸುತ್ತಲೂ ಸಂಪಿಗೆ (ಚಂಪಕ) ಮರಗಳು ಹೆಚ್ಚಾಗಿದ್ದುದರಿಂದ ಈ ದೇವರನ್ನು ಚಂಪಕಧಾಮ ಸ್ವಾಮಿ ದೇವರೆಂದು ಕರೆಯಲಾಗಿದೆ.



ಶಾಸಕ ಎಂ.ಕೃಷ್ಣಪ್ಪ, ಜಿಲ್ಲಾ ಪಂಚಾಯಿತಿ ಸದಸ್ಯ ಜಯರಾಮ್, ತಹಶೀಲ್ದಾರ್ ಎಚ್.ಎನ್.ಶಿವೇಗೌಡ, ದೇವಾಲಯದ ಕಾರ್ಯ ನಿರ್ವಾಹಣಾಧಿಕಾರಿ ಓಂಕಾರಪ್ಪ ಮತ್ತಿತರರು ರಥೋತ್ಸವದಲ್ಲಿ ಪಾಲ್ಗೊಂಡಿದ್ದರು. 

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.