ಸವಾಲಿನ ಪಾತ್ರದಲ್ಲಿ ಚಾರ್ಮಿ

`ಪ್ರೇಮ ಒಕ ಮೈಕಂ~ ಚಿತ್ರ ವೇಶ್ಯೆಯೊಬ್ಬಳ ಪ್ರೇಮ ಕಥೆಯನ್ನು ಆಧರಿಸಿದ್ದು ಎನ್ನುತ್ತಿದ್ದಾರೆ ತೆಲುಗು ಚಿತ್ರ ನಿರ್ದೇಶಕ ಚಂದ್ರು. ವೇಶ್ಯಾವಾಟಿಕೆ ಸಮಸ್ಯೆ ಮೇಲೆ ಬೆಳಕು ಚೆಲ್ಲುವ ಚಿತ್ರಗಳು ಈಗಾಗಲೇ ಸಾಕಷ್ಟು ಬಂದಿವೆ.



ಹಾಗಾಗಿ ನಾವು ಈ ಚಿತ್ರದಲ್ಲಿ ಮತ್ತೆ ಕಾಮವನ್ನು ವಿಜೃಂಭಿಸುವ ಕೆಲಸ ಮಾಡುವುದಿಲ್ಲ. ಕಾಲನ ಕೈಗೆ ಸಿಕ್ಕಿ ಈ ವೃತ್ತಿಗೆ ಒತ್ತಾಯಪೂರ್ವಕವಾಗಿ ತಳ್ಳಲಾದ ಹುಡುಗಿಯೊಬ್ಬಳ ಹೃದಯದಲ್ಲಿ ಅಚ್ಚಳಿಯದೇ ಉಳಿದಿರುವ ಪ್ರೀತಿಯನ್ನು ಈ ಚಿತ್ರದಲ್ಲಿ ತೋರಿಸುವ ಪ್ರಯತ್ನ ಮಾಡಿದ್ದೇವೆ ಎನ್ನುತ್ತಾರೆ ನಿರ್ದೇಶಕರು.



ತೆಲುಗು ಚಿತ್ರರಂಗದ ಜನಪ್ರಿಯ ನಟಿ ಚಾರ್ಮಿ ಕೌರ್ ಈ ಚಿತ್ರದಲ್ಲಿ ವೇಶ್ಯೆಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರಂತೆ. ರಾಹುಲ್ ಮತ್ತು ಶರಣ್ಯ ಮುಖ್ಯ ಪಾತ್ರದಲ್ಲಿದ್ದಾರೆ.



ಡಿ.ವೆಂಕಟ್ ಸುರೇಶ್ ಮತ್ತು ಕೆ.ಸೂರ್ಯ ಶ್ರೀಕಾಂತ್ ಚಿತ್ರದ ನಿರ್ಮಾಪಕರು. ವಿವೇಕ್ ಸಾಗರ್ ಚಿತ್ರಕ್ಕೆ ಸಂಗೀತದ ಮಟ್ಟುಗಳನ್ನು ಹಾಕಿದ್ದರೆ, ಪ್ರವೀಣ್ ಬಂಗಾರಿ ಸಿನಿಮಾಟೋಗ್ರಫಿಯಲ್ಲಿ ತಮ್ಮ ಚಮತ್ಕಾರ ತೋರಲಿದ್ದಾರೆ.