ಸಿಪಿಎಂ ಅಭ್ಯರ್ಥಿಗೆ ಆಟೊರಿಕ್ಷಾ ಚಾಲಕರಿಂದ ಠೇವಣಿ

ಚಿಕ್ಕಬಳ್ಳಾಪುರ: ಇಲ್ಲಿನ ಲೋಕಸಭಾ ಕ್ಷೇತ್ರದಿಂದ ಸಿಪಿಎಂ ಅಭ್ಯರ್ಥಿಯಾಗಿ ಕಣ­ಕ್ಕಿಳಿದಿರುವ ಜಿ.ವಿ.ಶ್ರೀರಾಮರೆಡ್ಡಿ ಭದ್ರತಾ ಠೇವಣಿಗಾಗಿ ಸ್ವಂತ ಹಣ ಬಳ­ಸಿಲ್ಲ. ಅವರ ಮೇಲಿನ ಅಭಿಮಾನದಿಂದ ಆಟೊರಿಕ್ಷಾ ಚಾಲಕರೇ ಹಣ ಸಂಗ್ರಹಿಸಿ ಭದ್ರತಾ ಠೇವಣಿ ಪಾವತಿಸಿದ್ದಾರೆ.



ನಗರದಲ್ಲಿ ಶನಿವಾರ ಜಿ.ವಿ.­ಶ್ರೀರಾಮ­ರೆಡ್ಡಿ ನಾಮಪತ್ರ ಸಲ್ಲಿಸಿದ ಬಳಿಕ ನಡೆದ ಪಕ್ಷದ ಬಹಿರಂಗ ಸಭೆ­ಯಲ್ಲಿ ಈ ವಿಷಯ ತಿಳಿಸಿದ ಸಿಪಿಎಂ ನಾಯಕ ಮೀನಾಕ್ಷಿ ಸುಂದರಂ, ‘ಆಟೊರಿಕ್ಷಾ ಚಾಲಕರೇ ಹಣ ಸಂಗ್ರಹಿಸಿ ₨ 25 ಸಾವಿರ ಭದ್ರತಾ ಠೇವಣಿ ಪಾವತಿಸಿ­ದ್ದಾರೆ’ ಎಂದರು.



‘ಚುನಾವಣೆ ಪೂರ್ವಸಿದ್ಧತೆ ಹಿನ್ನೆಲೆ­ಯಲ್ಲಿ ಕೆಲ ದಿನಗಳ ಹಿಂದೆ ಯಲಹಂಕ­ದಲ್ಲಿ ಸಭೆ ನಡೆಸುತ್ತಿದ್ದ ವೇಳೆ ಹೆಚ್ಚಿನ ಆಸಕ್ತಿ ತೋರಿಸಿದ ಆಟೊರಿಕ್ಷಾ ಚಾಲ­ಕರು ಚುನಾವಣೆಯಲ್ಲಿ ಸಂಪೂರ್ಣ ಸಹಕಾರ ನೀಡುವುದಾಗಿ ಹೇಳಿದರು. ನಂತರ ಅವರೇ ಭದ್ರತಾ ಠೇವಣಿ ನೀಡಲು ಮುಂದಾದರು’ ಎಂದು ಅವರು ತಿಳಿಸಿದರು.