ಹಾಕಿ: ಚಂಡೀಗಡಕ್ಕೆ ಮಣಿದ ಪಂಜಾಬ್

ಚಂಡೀಗಡ (ಪಿಟಿಐ): ಆರಂಭದಿಂದ ಪ್ರಭುತ್ವ ಮೆರೆದ ಆತಿಥೇಯ ಚಂಡೀಗಡ ತಂಡದವರು ಇಲ್ಲಿ ನಡೆದ ವಿಶ್ವ ಹಾಕಿ ಸರಣಿಯ ಪಂದ್ಯದಲ್ಲಿ ಭರ್ಜರಿ ಗೆಲುವು ದಾಖಲಿಸಿದರು.



ಗುರುವಾರ ನಡೆದ ಪಂದ್ಯದಲ್ಲಿ ಚಂಡೀಗಡ 3-1ಗೋಲುಗಳಿಂದ ಶೇರ್-ಎ-ಪಂಜಾಬ್ ತಂಡವನ್ನು ಸೋಲಿಸಿತು.



ವಿಜಯಿ ತಂಡದ ಗುರ್ಜಿಂದರ್ ಸಿಂಗ್ ಪೆನಾಲ್ಟಿ ಕಾರ್ನರ್ ಮೂಲಕ 2ನೇ ನಿಮಿಷದಲ್ಲಿ ಗೋಲಿನ ಖಾತೆ ತೆರೆದರು. ಇದಾದ ಏಳು ನಿಮಿಷಗಳ ಅಂತರದಲ್ಲಿ ಸುಕ್ವಿಂದರ್ ಸಿಂಗ್ ಗಬ್ಬರ್ ಗೋಲು ಕಲೆ ಹಾಕಿದರು. ಇದರಿಂದ ಚಂಡೀಗಡ ವಿರಾಮದ ವೇಳೆಗೆ 2-0ರಲ್ಲಿ ಮುನ್ನಡೆ ಸಾಧಿಸಿತ್ತು.



ನಂತರ ತಿರುಗೇಟು ನೀಡಿದ ಪಂಜಾಬ್ ತಂಡದ ಎಚ್. ಮ್ಯಾಥೂ 59ನೇ ನಿಮಿಷದಲ್ಲಿ ಗೋಲು ಗಳಿಸಿದರು. ಈ ವೇಳೆ ಪಂದ್ಯ ಸಾಕಷ್ಟು ಕುತೂಹಲಕ್ಕೆ ಕಾರಣವಾಯಿತು. ಆದರೆ, ಗುರ್ಜಿಂದರ್ 65ನೇ ನಿಮಿಷದಲ್ಲಿ ಪೆನಾಲ್ಟಿ ಕಾರ್ನರ್ ಮೂಲಕ ಇನ್ನೊಂದು ಸಲ ಚೆಂಡನ್ನು ಗೋಲು ಪೆಟ್ಟಿಗೆ ಸೇರಿಸಿದರು. ಆಗ ಚಂಡೀಗಡ ಪಾಳೆಯದಲ್ಲಿ ವಿಜಯದ ಸಂಭ್ರಮ!.