‘ಬಿಬಿಎಂಪಿ ವಿಭಜನೆ ಚಿಂತನೆ ಕೈಬಿಡಿ’

ಬೆಂಗಳೂರು: ‘ಬಿಬಿಎಂಪಿ ವಿಭಜನೆ ಚಿಂತನೆ ಕೈಬಿಟ್ಟು ಅಧಿಕಾರ ವಿಕೇಂದ್ರೀ­ಕರಣ ಮಾಡುವ ಮೂಲಕ ನಗರದ ಅಭಿವೃದ್ಧಿಗೆ ಸರ್ಕಾರ ಮುಂದಾಗ­ಬೇಕು’ ಎಂದು ಬಿಬಿಎಂಪಿಯ ಜೆಡಿ­ಎಸ್‌ ಪಕ್ಷದ ನಾಯಕ ಆರ್‌.ಪ್ರಕಾಶ್‌ ಹೇಳಿದರು.



ಶುಕ್ರವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತ­ನಾಡಿದ ಅವರು, ‘ವಿಭಜನೆ ಮಾಡು­ವುದರಿಂದ ಪಾಲಿಕೆಯ ಅಭಿ­ವೃದ್ಧಿ ಸಾಧ್ಯ

ವಿಲ್ಲ. ಬದಲಿಗೆ   ಆರ್ಥಿಕ, ಭೌಗೋಳಿಕ ಸಮಸ್ಯೆಗಳು ಹೆಚ್ಚಾಗು­ತ್ತವೆ. ವಲಯ ಮಟ್ಟದಲ್ಲಿ ಕೆಎಎಸ್‌ ಅಧಿ­ಕಾರಿಗಳ ಬದಲಿಗೆ ಐಎಎಸ್‌ ಅಧಿಕಾರಿ­ಗಳನ್ನು ನೇಮಕ ಮಾಡಿಕೊ­ಳ್ಳುವ ಮೂಲಕ ಅಧಿಕಾರ ವಿಕೇಂದ್ರೀ­ಕರಣ­ಗೊಳಿಸಬೇಕು’ ಎಂದರು.



‘ಪಾಲಿಕೆಯ ವೈದ್ಯಕೀಯ ಪರಿಹಾರ ನಿಧಿಗೆ ಬಂದಿರುವ 4 ಸಾವಿರಕ್ಕೂ ಹೆಚ್ಚು ಅರ್ಜಿಗಳನ್ನು ಶೀಘ್ರವೇ ವಿಲೇ­ವಾರಿ ಮಾಡು­ವುದಾಗಿ ಕಳೆದ ಬಾರಿ ಪಾಲಿ­ಕೆಯ ಕೌನ್ಸಿಲ್‌ ಸಭೆಯಲ್ಲಿ ಮೇಯರ್‌ ಭರವಸೆ ನೀಡಿದ್ದರು. ಆದರೆ, ಈವರೆಗೂ ಅರ್ಜಿಗಳ ವಿಲೇ­ವಾರಿಗೆ ಕ್ರಮ ಕೈಗೊಂಡಿಲ್ಲ’ ಎಂದು ಆರೋಪಿಸಿದರು.



‘ಈಗ ಹಳೆಯ ಅರ್ಜಿಗಳ ಜತೆಗೆ ಒಂದು ಸಾವಿರಕ್ಕೂ ಹೆಚ್ಚು ಅರ್ಜಿಗಳು ಬಂದಿವೆ. ಆದ್ದರಿಂದ ತ್ವರಿತವಾಗಿ ಅರ್ಜಿ­ಗಳ ವಿಲೇವಾರಿಗೆ ಕ್ರಮ ಕೈಗೊಳ್ಳ­ಬೇಕು. ಇಲ್ಲದಿದ್ದರೆ ಉಪವಾಸ ಸತ್ಯಾ­ಗ್ರಹ ಕೈಗೊಳ್ಳ­ಲಾಗುವುದು’ ಎಂದರು.



ನಗರದ ಅಭಿವೃದ್ಧಿಗಾಗಿ ಮತ್ತು ಪಾಲಿಕೆಯಿಂದ ಗುತ್ತಿಗೆದಾರರಿಗೆ ಬಾಕಿ ಇರುವ ಹಣವನ್ನು ಪಾವತಿಸಲು ₨ 1,600 ಕೋಟಿ ಬಿಡುಗಡೆ ಮಾಡಲಾ­ಗು­ವುದು ಎಂದು ಮುಖ್ಯಮಂತ್ರಿಗಳು ಭರವಸೆ ನೀಡಿದ್ದಾರೆ. ಇದು ಪಾಲಿಕೆ ಆರ್ಥಿಕವಾಗಿ ದುರ್ಬಲವಾಗಿರುವು­ದಕ್ಕೆ ಸಾಕ್ಷಿ ಎಂದು ದೂರಿದರು.