‘ಯುವ ಮತದಾರರ ಜವಾಬ್ದಾರಿ ಹೆಚ್ಚಾಗಿದೆ’

ಬೆಂಗಳೂರು: ‘ಭಾರತದ ಪ್ರಗತಿಯನ್ನು ನಿರ್ಧರಿಸುವ ಉತ್ತರದಾಯಿತ್ವ ಯುವ ಮತದಾರರ ಮೇಲಿದೆ. ಜಾಗೃತ, ಸಕ್ರಿಯ, ಮಾಹಿತಿಯುಳ್ಳ ಮತ್ತು ಯೋಗ್ಯ ನಿರ್ಣಯ ತೆಗೆದುಕೊಳ್ಳಬಲ್ಲ ಯುವ­ಶಕ್ತಿಯೇ ಭಾರತಕ್ಕೆ ಬದ­ಲಾವಣೆ ತರಬಲ್ಲವರು’ ಎಂದು ರಾಜ್ಯಸಭಾ ಸದಸ್ಯ ರಾಜೀವ್‌ ಚಂದ್ರಶೇಖರ್‌ ಹೇಳಿದರು.



ನಗರದ ಪಿ.ಇ.ಎಸ್ ಇನ್ಸ್‌­ಟಿಟ್ಯೂಟ್‌ ಆಫ್‌ ಟೆಕ್ನಾಲಜಿ ಕಾಲೇಜಿನಲ್ಲಿ ಮಂಗಳವಾರ ನಡೆದ ಕಾರ್ಯಕ್ರಮದಲ್ಲಿ ಮುಂಬರುವ ಲೋಕಸಭಾ ಚುನಾವಣೆಯಲ್ಲಿ ಯುವಶಕ್ತಿಯ ಪಾತ್ರ ಮತ್ತು ಮಹತ್ವದ ಕುರಿತು ಹಾಗೂ ಮೊದಲ ಬಾರಿಗೆ ಮತದಾನ ಮಾಡುತ್ತಿರುವ  ಯುವ ಸಮುದಾಯವನ್ನು ಉದ್ದೇಶಿಸಿ ಅವರು ಮಾತನಾಡಿದರು.



‘ಕಲುಷಿತಗೊಳ್ಳದ ಯುವ ಸಮು­ದಾಯದ ಮನಸ್ಸುಗಳು ಯೋಗ್ಯ ನಿರ್ಧಾರ ತೆಗೆದುಕೊಳ್ಳಲು ಇದು ಒಳ್ಳೆಯ ಸಮಯ. ಭ್ರಷ್ಟಾಚಾರ, ಹಗರಣ­ಗಳ ವಿರುದ್ದ ಸೆಣಸಲು ಯುವ­ಸಮುದಾಯ ಟೊಂಕ ಕಟ್ಟಿ ನಿಲ್ಲ­ಬೇಕು. ಯುವ­ಸಮುದಾಯ­ದಿಂದಲೇ ದೇಶದ ನಿಜವಾದ ಬದಲಾವಣೆ ಸಾಧ್ಯ. ಆದ್ದರಿಂದ, ಯುವ ಸಮುದಾಯ ಯೋಚಿಸಿ, ವಿಶ್ಲೇಷಿಸಿ, ನಿರ್ಧಾರ ತೆಗೆದು­ಕೊಳ್ಳ­ಬೇಕು. ಅದು ಖಂಡಿತ ಪರಿ­ಣಾಮ ಬೀರುತ್ತದೆ’ ಎಂದು ಹೇಳಿದರು.



‘ಪ್ರಾದೇಶಿಕ ಆಕಾಂಕ್ಷೆಗಳನ್ನು ನಿಭಾ­ಯಿಸಿಕೊಂಡು ರಾಷ್ಟ್ರೀಯ ಆಲೋ­ಚನೆಗಳನ್ನು ಜಾರಿಗೆ ತರಬಲ್ಲ ಮುನ್ನೋಟ­ವಿರುವ ನಾಯಕನನ್ನು ಆರಿಸಬೇಕಾಗಿದೆ. ಅಭ್ಯರ್ಥಿಗಳಿಗೆ ನಿಮ್ಮ ಅಗತ್ಯಗಳ ಬಗ್ಗೆ ಪ್ರಶ್ನೆಗಳನ್ನು ಕೇಳಿ ನಂತರ ನಿರ್ಣಯಿಸಿ. ಇಂದಿನ ಆಧುನಿಕ ಯುಗದಲ್ಲಿ ಸಾಮಾಜಿಕ ತಾಣಗಳಿಂದ ಎಲ್ಲ ನಾಯಕರು ಎಟಕುತ್ತಾರೆ. ನಿಮ್ಮ ನಿರ್ಣಯ ನಿಮ್ಮ ಭವಿಷ್ಯವನ್ನು ರೂಪಿಸುತ್ತದೆ’ ಎಂದು ಕಿವಿ ಮಾತು ಹೇಳಿದರು.