ನ್ಯೂಯಾರ್ಕ್ (ಪಿಟಿಐ): ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯಲ್ಲಿ ಶುಕ್ರವಾರ ನಡೆದ ಚರ್ಚೆಯ ಸಂದರ್ಭದಲ್ಲಿ ತಾವು ಪೋರ್ಚುಗೀಸ್ ವಿದೇಶಾಂಗ ಸಚಿವರ ಭಾಷಣವನ್ನು ಓದಿದ್ದು ದೊಡ್ಡ ತಪ್ಪೇ ನಲ್ಲ ಎಂದು ವಿದೇಶಾಂಗ ವ್ಯವಹಾರ ಸಚಿವ ಎಸ್. ಎಂ. ಕೃಷ್ಣ ಸಮರ್ಥಿಸಿಕೊಂಡಿದ್ದಾರೆ.
ಇಂತಹ ತಪ್ಪುಗಳು ನಡೆಯುವುದು ಸಹಜ, ಯಾಕೆಂದರೆ ಎಲ್ಲಾ ಭಾಷಣಗಳ ಆರಂಭದಲ್ಲಿ ಇಂತಹ ವಾಕ್ಯಗಳೇ ಇರುತ್ತವೆ, ಹೀಗಾಗಿ ತಾವು ಓದಿದ್ದರಲ್ಲಿ ತಪ್ಪೇನಿಲ್ಲ ಎಂದು ಅವರು ಹೇಳಿದ್ದಾರೆ.
‘ನನ್ನ ಮುಂದೆ ಹಲವಾರು ಕಾಗದಗಳು ಹರಡಿಕೊಂಡಿದ್ದವು. ಕಣ್ತಪ್ಪಿನಿಂದ ನಾನು ಇನ್ನೊಬ್ಬರ ಭಾಷಣದ ಪ್ರತಿಯನ್ನು ತೆಗೆದುಕೊಂಡು ಓದಲಾರಂಭಿಸಿದೆ ಅಷ್ಟೆ’ ಎಂದು ಹೇಳಿದ್ದಾರೆ.
ಶುಕ್ರವಾರ ಭದ್ರತಾ ಮಂಡಳಿಯಲ್ಲಿ ಅಭಿವೃದ್ಧಿ ಮತ್ತು ಭದ್ರತೆ ವಿಚಾರದ ಮೇಲೆ ಚರ್ಚೆ ನಡೆಯುತ್ತಿದ್ದಾಗ ಈ ಪ್ರಮಾದ ನಡೆದಿತ್ತು. ಪೋರ್ಚುಗಲ್ ಸಚಿವರ ಭಾಷಣವನ್ನು ಅವರು 3 ನಿಮಿಷ ಓದಿದ್ದಾಗ ಭಾರತದ ಪ್ರತಿನಿಧಿ ಹರದೀಪ್‌ಸಿಂಗ್ ಪುರಿ ಅವರು ಅರ್ಧಕ್ಕೇ ತಡೆದಿದ್ದರು.
