ಬೆಂಗಳೂರು: ಅಣ್ಣಾ ಹಜಾರೆ ಅವರ ನೇತೃತ್ವದ ಭ್ರಷ್ಟಾಚಾರ ವಿರುದ್ಧದ ಚಳವಳಿಗೆ ಬೆಂಬಲ ಸೂಚಿಸಿ, ಜನ ಜಾಗೃತಿ ಉಂಟುಮಾಡಲು ಬೆಂಗಳೂರಿನಿಂದ ಭ್ರಷ್ಟಾಚಾರ ವಿರುದ್ಧ ಭಾರತದ ಸ್ವಯಂಸೇವಕರ ತಂಡ ಸೌರ ಚಾಲಿತ ವಾಹನದಲ್ಲಿ ಬೆಂಗಳೂರಿನಿಂದ ಕೊಚ್ಚಿವರೆಗೆ ಪಯಣ ಬೆಳೆಸಲಿದೆ.
`ಭ್ರಷ್ಟಾಚಾರ ನಿಲ್ಲಿಸಿ ಹಾಗೂ ಪರಿಸರ ಮಾಲಿನ್ಯ ತಪ್ಪಿಸಿ~ ಎಂಬ ಸಂದೇಶದೊಂದಿಗೆ ಜನರಲ್ಲಿ ಜಾಗೃತಿ ಮೂಡಿಸಲಿದ್ದಾರೆ~ ಎಂದು ಸೊಮವಾರ ಪತ್ರಿಕಾಗೋಷ್ಠಿಯಲ್ಲಿ ಕಾರ್ಯಕರ್ತ ಚಂದ್ರಕಾಂತ ಮಾಹಿತಿ ನೀಡಿದರು.
`ತಂಡವು ಫೆಬ್ರುವರಿ 6 ರಂದು ಬೆಂಗಳೂರಿನಿಂದ ಹೊರಟು ತಮಿಳುನಾಡು ಹಾಗೂ ಕೇರಳದ ಸುಮಾರು 200 ಗ್ರಾಮಗಳನ್ನು ತಲುಪುವ ನಿರೀಕ್ಷೆಯಿದೆ. ತಂಡವು ಸುಮಾರು 1,000 ಕಿಮೀ ದೂರದ ರಸ್ತೆ ಪ್ರಯಾಣ ಮಾಡಲಿದೆ~ ಎಂದು ತಿಳಿಸಿದರು.
`ಸರ್ಕಾರ ಮತ್ತು ರಾಜ್ಯಪಾಲರು ಲೋಕಾಯುಕ್ತ ನೇಮಿಸುವಲ್ಲಿ ವಿಳಂಬ ನೀತಿಯನ್ನು ಅನುಸರಿಸುತ್ತಿದ್ದಾರೆ. ಇವರಿಬ್ಬರ ಕಿತ್ತಾಟದಲ್ಲಿ ಜನರು ಬಡವಾಗುತ್ತಿದ್ದಾರೆ. ಲೋಕಾಯುಕ್ತ ನೇಮಕದಲ್ಲಿ ವಿನಾ ಕಾರಣ ಮೀನಮೇಷವನ್ನು ಎಣಿಸಲಾಗುತ್ತಿದೆ~ ಎಂದು ಸ್ವಾತಂತ್ರ್ಯ ಹೋರಾಟಗಾರ ಎಚ್.ಎಸ್.ದೊರೆಸ್ವಾಮಿ ಹೇಳಿದರು.`ಲೋಕಾಯುಕ್ತಕ್ಕೆ ಮುಖ್ಯಸ್ಥನನ್ನೇ ನೇಮಿಸದೆ, ವಿಳಂಬ ನೀತಿ ಅನುಸರಿಸಲಾಗುತ್ತಿದೆ. ಇಂತಹ ಕಾರ್ಯಗಳಿಂದ ಜನರೆಲ್ಲ ರೋಸಿ ಹೋಗುತ್ತಾರೆ. ತಕ್ಷಣ ಲೋಕಾಯುಕ್ತರನ್ನು ನೇಮಿಸಬೇಕು~ ಎಂದು ಒತ್ತಾಯಿಸಿದರು.
