ಮಂಗಳವಾರ, ಅಕ್ಟೋಬರ್ 4, 2022
26 °C

ಮುಳುಗಿದ ವಾಹನ: ‘ಎಂಜಿನ್ ಪ್ರೊಟೆಕ್ಟರ್’ ವಿಮೆ ನೆರವು

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಬೆಂಗಳೂರು: ಮಳೆಯಲ್ಲಿ ವಾಹನ ಮುಳುಗಿ, ಅದರಿಂದ ಎಂಜಿನ್‌ಗೆ ಹಾನಿ ಆದಾಗ ವಿಮಾ ಪರಿಹಾರ ಪಡೆಯಲು ‘ಎಂಜಿನ್ ಪ್ರೊಟೆಕ್ಟರ್’ ಆ್ಯಡ್‌ ಆನ್ ಇದ್ದರೆ ಒಳಿತು ಎಂದು ವಿಮಾ ತಜ್ಞರು ಹೇಳುತ್ತಾರೆ.

ವಾಹನಕ್ಕೆ ಆಕಸ್ಮಿಕವಾಗಿ ಆಗುವ ಹಾನಿಗೆ ಪರಿಹಾರ ಪಡೆಯಲು ವಾಹನ ಮಾಲೀಕರು ಓನ್ ಡ್ಯಾಮೇಜ್‌ ವಿಮೆ ಪಡೆದಿರುತ್ತಾರೆ. ಇದಕ್ಕೆ ಹೆಚ್ಚುವರಿಯಾಗಿ ‘ಎಂಜಿನ್ ಪ್ರೊಟೆಕ್ಟರ್’ ಸೌಲಭ್ಯ ಪಡೆಯಲು ಅವಕಾಶ
ಇದೆ.

ವಾಹನವನ್ನು ಮನೆಯಲ್ಲಿ ಪಾರ್ಕ್‌ ಮಾಡಿದ್ದಾಗ ಭಾರಿ ಮಳೆ ಸುರಿದು, ಎಂಜಿನ್‌ಗೆ ನೀರು ನುಗ್ಗಿ ಹಾನಿ ಉಂಟಾದರೆ ಎಂಜಿನ್‌ ಪ್ರೊಟೆಕ್ಟರ್ ಆ್ಯಡ್‌ ಆನ್‌ ಸೌಲಭ್ಯ ಇಲ್ಲದಿದ್ದರೂ ವಿಮೆ ಪರಿಹಾರ ಪಡೆಯಬಹುದು. ಆದರೆ, ಇಂತಹ ಸಂದರ್ಭದಲ್ಲಿ ವಾಹನ ಚಾಲಕರು ವಾಹನ ಸ್ಟಾರ್ಟ್‌ ಮಾಡಲು ಯತ್ನಿಸಬಾರದು ಎಂದು ಮೂಲಗಳು ವಿವರಿಸಿವೆ.

‘ಎಂಜಿನ್‌ಗೆ ನೀರು ನುಗ್ಗಿದ್ದಾಗಲೂ ವಾಹನ ಸ್ಟಾರ್ಟ್‌ ಮಾಡಲು ಯತ್ನಿಸಿದಾಗ ಆಗುವ ಹಾನಿಗೆ ವಿಮಾ ಪರಿಹಾರ ಸಿಗಬೇಕು ಎಂದಾದರೆ, ಎಂಜಿನ್ ಪ್ರೊಟೆಕ್ಟರ್ ಸೌಲಭ್ಯ ಪಡೆದಿರಬೇಕಾಗುತ್ತದೆ’ ಎಂದು ಮೂಲಗಳು ವಿವರಿಸಿವೆ.

‘ಎಂಜಿನ್ ಪ್ರೊಟೆಕ್ಟರ್’ ಆ್ಯಡ್ ಆನ್ ಸೌಲಭ್ಯ ಪಡೆಯದವರು, ಇಂತಹ
ಸಂದರ್ಭಗಳಲ್ಲಿ ಎಂಜಿನ್‌ಗೆ ಆಗುವ ಹಾನಿಯ ರಿಪೇರಿಗೆ ತಾವೇ ಹಣ ಪಾವತಿಸಬೇಕು.

ಎಂಜಿನ್‌ಗೆ ನೀರು ನುಗ್ಗಿದೆ ಎಂದಾ
ದಲ್ಲಿ ವಾಹನ ಸ್ಟಾರ್ಟ್‌ ಮಾಡಲು ಮುಂದಾಗಬಾರದು. ವಾಹನದ ಡೀಲರ್ ಕಂಪನಿ ಅಥವಾ ವಿಮಾ ಕಂಪನಿಗೆ ಕರೆ ಮಾಡಿ ವಾಹನವನ್ನು ಟೋ ಮಾಡಿಕೊಂಡು ಹೋಗಲು ಮನವಿ ಮಾಡಬೇಕು. ಆಗ ಅವರು ವಾಹನಕ್ಕೆ ಆಗಿರುವ ನಷ್ಟ ಯಾವ ಬಗೆಯದ್ದು ಎಂಬುದನ್ನೂ ಗಮನಿಸುತ್ತಾರೆ ಎಂದು ಬಜಾಜ್ ಅಲಯನ್ಸ್ ಜನರಲ್ ಇನ್ಶುರೆನ್ಸ್ ಕಂಪನಿಯ ಮೋಟರ್ ಬ್ಯುಸಿನೆಸ್ ವಿಭಾಗದ ರಾಷ್ಟ್ರೀಯ ಮುಖ್ಯಸ್ಥ ಸುಭಾಶಿಷ್ ಮಜುಮ್ದಾರ್ ಹೇಳಿದ್ದಾರೆ.

ಎಂಜಿನ್ ಪ್ರೊಟೆಕ್ಟರ್ ಸೌಲಭ್ಯವನ್ನು ಸಾಮಾನ್ಯವಾಗಿ ಇತರ ಆ್ಯಡ್‌ ಆನ್‌ಗಳ ಜೊತೆಯಲ್ಲಿಯೇ ಮಾರಾಟ ಮಾಡಲಾಗುತ್ತದೆ. ವಿಮೆ ಖರೀದಿಸುವಾಗ ಅಥವಾ ವಿಮೆ ನವೀಕರಿಸುವಾಗ ಇದನ್ನು ಖರೀದಿಸಬೇಕು. ಅವಧಿ ಮಧ್ಯದಲ್ಲಿ ಈ ಸೌಲಭ್ಯ ಪಡೆಯಲಾಗದು ಎಂದು ಮಜುಮ್ದಾರ್ ತಿಳಿಸಿದ್ದಾರೆ.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು