ಟಾಟಾ ನ್ಯಾನೊ: 2019ರಲ್ಲಿ ಶೂನ್ಯ ತಯಾರಿಕೆ, ಕೇವಲ 1 ಕಾರು ಮಾರಾಟ

2019ರ ಡಿಸೆಂಬರ್‌ನಲ್ಲಿ ಟಾಟಾ ಮೋಟಾರ್ಸ್‌ ಒಂದೂ ನ್ಯಾನೊ ಕಾರು ತಯಾರಿಸಿಲ್ಲ. 2018 ಡಿಸೆಂಬರ್‌ನಲ್ಲಿ 82 ನ್ಯಾನೊ ಕಾರು ತಯಾರಿಸಿದ್ದ ಕಂಪನಿ 88 ಕಾರುಗಳನ್ನು ಮಾರಾಟ ಮಾಡಿತ್ತು. 2019ರ ಯಾವುದೇ ತಿಂಗಳಲ್ಲೂ ನ್ಯಾನೊ ಕಾರು ತಯಾರಿಸಿಲ್ಲ ಹಾಗೂ ಫೆಬ್ರುವರಿಯಲ್ಲಿ ಮಾತ್ರ ಒಂದೇ ಒಂದು ಕಾರು ಮಾರಾಟ ಮಾಡಿದೆ.

ಪ್ರಸ್ತುತ ನ್ಯಾನೊ ಕಾರು ಬಿಎಸ್‌–6 ಗುಣಮಟ್ಟವನ್ನು ಹಾಗೂ ಸುರಕ್ಷತಾ ನಿಯಮಗಳನ್ನು ಪೂರೈಸಲು ಸಾಧ್ಯವಾಗಿಲ್ಲ ಎಂದು ಟಾಟಾ ಮೋಟಾರ್ಸ್‌ ಒಪ್ಪಿಕೊಂಡಿದೆ. 2020ರ ಏಪ್ರಿಲ್‌ನಲ್ಲಿ ಅಧಿಕೃತವಾಗಿ ನ್ಯಾನೊ ತಯಾರಿಕೆ ನಿಲ್ಲಿಸುವ ಸುಳಿವುಗಳನ್ನು ಕಂಪನಿ ನೀಡಿದೆ.

ಇದನ್ನೂ ಓದಿ:ಜನವರಿಯಿಂದ ತಯಾರಾಗಿಲ್ಲ ನ್ಯಾನೊ | ದಶಕದಲ್ಲೇ ಕಮರಿದ ಕನಸಿನ ಕೂಸು

'ಜನರ ಕಾರು', '₹ 1 ಲಕ್ಷದ ಕಾರು',..ಎಂದೆಲ್ಲ ಕರೆಸಿಕೊಂಡ ನ್ಯಾನೊ 2008ರ ಜನವರಿಯಲ್ಲಿ ಮೊದಲ ಬಾರಿಗೆ ಅನಾವರಣಗೊಂಡಿತು. ಹಲವು ಅಡೆತಡೆಗಳ ನಡುವೆ 2009ರ ಮಾರ್ಚ್‌ನಲ್ಲಿ ನ್ಯಾನೊ ಬಿಡುಗಡೆಯಾಯಿತು. ಪಶ್ಚಿಮ ಬಂಗಾಳದ ಸಿಂಗೂರ್‌ ಬದಲು ಗುಜರಾತ್‌ನ ಸಾನಂದದಲ್ಲಿ ಟಾಟಾ 'ನ್ಯಾನೊ' ಉತ್ಪಾದನೆ ನಡೆಸಿತು. 10 ವರ್ಷಗಳಲ್ಲೇ ನ್ಯಾನೊ ಮಾರುಕಟ್ಟೆಯಿಂದ ದೂರ ಸರಿದಂತಾಗಿದೆ.