ಭಾನುವಾರ, ಮಾರ್ಚ್ 7, 2021
22 °C

ಮಾನಸ ವಾರಣಾಸಿ ಫೆಮಿನಾ ಮಿಸ್ ಇಂಡಿಯಾ-2020: ಯಾರು ಈ ಸುಂದರಿ?

ಏಜೆನ್ಸೀಸ್‌ Updated:

ಅಕ್ಷರ ಗಾತ್ರ : | |

ಮುಂಬೈ: ನಗರದಲ್ಲಿ ಫೆಬ್ರುವರಿ 10ರಂದು (ಬುಧವಾರ) ರಾತ್ರಿ ನಡೆದ ಫೆಮಿನಾ ಮಿಸ್ ಇಂಡಿಯಾ-2020 ಸೌಂದರ್ಯ ಸ್ಪರ್ಧೆಯಲ್ಲಿ ಮಾನಸ ವಾರಣಾಸಿ ಅವರು ʼಮಿಸ್ ಇಂಡಿಯಾ-2020ʼ ಕಿರೀಟ ಮುಡಿಗೇರಿಸಿಕೊಂಡರು. 

ಸುಂದರಿ ಮಾನಸ, ಅಂತಿಮ ಸುತ್ತಿನಲ್ಲಿದ್ದ ವಿವಿಧ ರಾಜ್ಯಗಳ ಒಟ್ಟು 14 ಪ್ರತಿಸ್ಪರ್ಧಿಗಳ ಸವಾಲನ್ನು ಮೀರಿ ಪ್ರಶಸ್ತಿ ಜಯಿಸಿದರು. ಹರಿಯಾಣದ ಮಣಿಕಾ ಶಿಯೋಕಂದ್‌ ಅವರು ಮಿಸ್‌ ಗ್ರ್ಯಾಂಡ್‌ ಇಂಡಿಯಾ-2020 ಹಾಗೂ ಉತ್ತರ ಪ್ರದೇಶದ ಮಾನ್ಯ ಸಿಂಗ್‌ ಅವರು ಮಿಸ್‌ ಇಂಡಿಯಾ-2020 ರನ್ನರ್ಸ್‌ ಅಪ್‌ ಆಗಿ ಹೊರಹೊಮ್ಮಿದರು. ಈ ಮೂವರ ಚಿತ್ರಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡುತ್ತಿವೆ.

ಬಾಲಿವುಡ್‌ ನಟಿ-ನಟರಾದ, ನೇಹಾ ಧೂಪಿಯಾ, ಚಿತ್ರಾಂಗದಾ ಸಿಂಗ್‌, ಪುಲ್ಕಿತ್‌ ಸಾಮ್ರಾಟ್‌ ಹಾಗೂ ವಸ್ತ್ರವಿನ್ಯಾಸಕ ಜೋಡಿ ಫಲ್ಗುಣಿ ಮತ್ತು ಶೇನ್‌ ಪೀಕಾಕ್‌ ಅವರು ಸ್ಪರ್ಧೆಯ ತೀರ್ಪುಗಾರರಾಗಿದ್ದರು.

ಸದ್ಯ ಮಾನಸ, ಈ ವರ್ಷಾಂತ್ಯದಲ್ಲಿ ನಡೆಯಲಿರುವ ಮಿಸ್‌ ವರ್ಲ್ಡ್‌-2020 ಸ್ಪರ್ಧೆಯಲ್ಲಿ ಭಾರತವನ್ನು ಪ್ರತಿನಿದಿಸಲು ಸಜ್ಜಾಗುತ್ತಿದ್ದಾರೆ.

ಯಾರು ಈ ಮಾನಸ ವಾರಣಾಸಿ?
ಮಾನಸ ಹುಟ್ಟಿದ್ದು, ತೆಲಂಗಾಣ ರಾಜಧಾನಿ ಹೈದರಾಬಾದ್‌ನಲ್ಲಿ. ಇಲ್ಲಿನ ವಾಸವಿ ಎಂಜಿನಿಯರಿಂಗ್‌ ಕಾಲೇಜಿನಲ್ಲಿ ಎಂಜಿನಿಯರಿಂಗ್‌ ಓದಿಕೊಂಡಿರುವ ಅವರು ಸದ್ಯ ಹಣಕಾಸು ಮಾಹಿತಿ ವಿನಿಮಯ ವಿಶ್ಲೇಷಕಿಯಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಪುಸ್ತಕ ಓದುವುದು, ಸಂಗೀತ ಕೇಳುವುದು, ಯೋಗ ಹವ್ಯಾಸ ರೂಢಿಸಿಕೊಂಡಿರುವ ಆಕೆಗೆ ಭರತನಾಟ್ಯ ಮತ್ತು ಸಂಗೀತವೆಂದರೆ ಅಚ್ಚುಮೆಚ್ಚು.

ಬಾಲ್ಯದಲ್ಲಿ ನಾಚಿಕೆ ಸ್ವಭಾವದವರಾಗಿದ್ದ ಮಾನಸ ಅವರನ್ನು ಪ್ರಭಾವಿಸಿದ ಪ್ರಮುಖ ಮೂವರು ಮಹಿಳೆಯರೆಂದರೆ ಆಕೆಯ ತಾಯಿ, ಅಜ್ಜಿ ಮತ್ತು ಸಹೋದರು ಎಂಬುದನ್ನು ಮಿಸ್‌ ಇಂಡಿಯಾ ಅಧಿಕೃತ ವೆಬ್‌ಸೈಟ್‌ನಲ್ಲಿ ತಿಳಿಸಲಾಗಿದೆ.

ಬಾಲಿವುಡ್‌ ನಟಿ ಹಾಗೂ ಮಾಜಿ ವಿಶ್ವಸುಂದರಿ ಪ್ರಿಯಾಂಕಾ ಚೋಪ್ರಾ ಅವರಿಂದಲೂ ಸ್ಫೂರ್ತಿ ಪಡೆದಿರುವುದಾಗಿ ಹೇಳಿಕೊಳ್ಳುವ 23 ವರ್ಷದ ಈ ಸುಂದರಿ, 'ಪ್ರಿಯಾಂಕಾ ಚೋಪ್ರಾ ನನ್ನ ಕಣ್ಣಿಗೆ ಮುಂಚೂಣಿಯಲ್ಲಿ ಕಾಣುತ್ತಾರೆ. ಏಕೆಂದರೆ ಆಕೆ ಅನ್ವೇಷಕಿ. ತಮ್ಮ ಎಲ್ಲೆಗಳನ್ನು ವಿಸ್ತರಿಸಿಕೊಳ್ಳಲು ಪ್ರಯತ್ನಿಸುತ್ತಾರೆ. ಅವರು ಸಂಗೀತ, ಸಿನಿಮಾ, ಹೂಡಿಕೆ, ಸಾಮಾಜಿಕ ಕಾರ್ಯ ಮತ್ತು ಇನ್ನಿತರ ಹಲವು ಕ್ಷೇತ್ರಗಳಲ್ಲಿ ತಮ್ಮ ಗುರುತು ಮೂಡಿಸಿದ್ದಾರೆ. ಅವರ ಬಹುಮುಖತೆ ಮತ್ತು ಸಾಮರ್ಥ್ಯವೇ ನನಗೆ ಸ್ಫೂರ್ತಿʼ ಎಂದಿದ್ದಾರೆ.

ಸಂಕೇತ ಭಾಷೆಯನ್ನೂ ಕಲಿತಿರುವ ಮಾನಸ, 'ನಾನು ಸಂಕೇತ ಭಾಷೆಯನ್ನೂ ಕಲಿತಿದ್ದೇನೆ. ಏಕೆಂದರೆ ಕಲಿಯುವುದು ನನಗೆ ಸಂತಸ ನೀಡುತ್ತದೆ. ನಾನು ಈ ಭಾಷೆಯನ್ನು ಕಲಿಯಲಾರಂಭಿಸಾಗ ನನ್ನಲ್ಲಿ ಕುತೂಹಲ ಕೆರಳಿಸಿತು. ಆದರೆ ನನ್ನ ಕಣ್ಣುಗಳಲ್ಲಿ ಆಲಿಸುವುದನ್ನು ಕಲಿತಾಗ ಕಿವುಡುತನದ ಸೌಂದರ್ಯದ ಅರಿತುಕೊಂಡೆʼ ಎಂದು ಈ ಹಿಂದೆ ತಿಳಿಸಿದ್ದರು.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು