ಬಂಡವಾಳ ಮಾರುಕಟ್ಟೆ | ಚಿನ್ನ: 10 ಗ್ರಾಂಗೆ ₹3 ಲಕ್ಷ ಆಗುವುದೇ?

ಮಾರುಕಟ್ಟೆ ವಿಶ್ಲೇಷಕರ ಪ್ರಕಾರ, ಭಾರತದಲ್ಲಿ ಚಿನ್ನದ ಬೆಲೆ 2030ರ ವೇಳೆಗೆ 10 ಗ್ರಾಂಗೆ ₹1.8 ಲಕ್ಷದಿಂದ ₹2.25 ಲಕ್ಷದವರೆಗೆ ಮತ್ತು 2035ರ ವೇಳೆಗೆ ₹2.5 ಲಕ್ಷದವರೆಗೆ ಏರಿಕೆ ಕಾಣುವ ಸಾಧ್ಯತೆಯಿದೆ. ಆದರೆ ಬೆಲೆ ಏರಿಕೆಯು, ಹಣದುಬ್ಬರ ಪ್ರಮಾಣ, ವಾರ್ಷಿಕ ರೂಪಾಯಿ ಮೌಲ್ಯ ಕುಸಿತ, ಕೇಂದ್ರೀಯ ಬ್ಯಾಂಕ್‌ಗಳಿಂದ ಚಿನ್ನದ ಖರೀದಿ ಭರಾಟೆ ಮುಂತಾದ ಅಂಶಗಳನ್ನು ಅವಲಂಬಿಸಿದೆ.

ಹಣದುಬ್ಬರ (ಬೆಲೆ ಏರಿಕೆ) ಮತ್ತು ರೂಪಾಯಿ ಮೌಲ್ಯ ಕುಸಿತದಂತಹ ಸಮಸ್ಯೆಗಳಿಂದ ನಮ್ಮನ್ನು ಕಾಪಾಡಿಕೊಳ್ಳಲು, ಚಿನ್ನವು ದೀರ್ಘಾವಧಿಯಲ್ಲಿ ಒಂದು ಉತ್ತಮ ಹೂಡಿಕೆ. ಆದರೆ ಯಾವುದೇ ಒಂದು ಹೂಡಿಕೆಯನ್ನು ನೆಚ್ಚಿಕೊಂಡು ಅತಿಯಾಗಿ ಅದರಲ್ಲಿ ಹಣ ತೊಡಗಿಸುವುದು ಸರಿಯಲ್ಲ. ಹೂಡಿಕೆಯಲ್ಲಿ ವೈವಿಧ್ಯ ಕಾಯ್ದುಕೊಳ್ಳುವುದು ಬಹಳ ಮುಖ್ಯ. ಒಂದು ವೇಳೆ ರೂಪಾಯಿ ಮೌಲ್ಯದಲ್ಲಿ ಭಾರಿ ಕುಸಿತವಾದರೆ ಅಥವಾ ಹಣದುಬ್ಬರ ನಿರಂತರವಾಗಿ ತೀವ್ರವಾಗಿಯೇ ಉಳಿದರೆ ಮಾತ್ರ ಚಿನ್ನದ ಬೆಲೆ ಪ್ರತಿ 10 ಗ್ರಾಂಗೆ ₹3 ಲಕ್ಷದ ಮಟ್ಟಕ್ಕೆ ಏರಬಹುದು. ಇಲ್ಲದಿದ್ದರೆ, 2038–2040ಕ್ಕಿಂತ ಮೊದಲು 10 ಗ್ರಾಂ ಚಿನ್ನದ ಬೆಲೆ ₹3 ಲಕ್ಷ ತಲುಪುವ ಸಾಧ್ಯತೆ ಕಡಿಮೆ.