ನವದೆಹಲಿ:ನಷ್ಟದಲ್ಲಿರುವ ಏರ್‌ ಇಂಡಿಯಾ ವಿಮಾನಯಾನ ಕಂಪನಿಗೆ ಕೇಂದ್ರ ಸರ್ಕಾರವೇ₹ 1,371 ಕೋಟಿ ಬಾಕಿ ಪಾವತಿಸಬೇಕಿದೆ.
ಮಾಹಿತಿ ಹಕ್ಕು ಕಾಯ್ದೆಯಡಿ (ಆರ್‌ಟಿಐ) ನಿವೃತ್ತ ಕಮಾಂಡರ್ ಲೋಕೇಶ್‌ ಬಾತ್ರಾ ಅವರು ಸಲ್ಲಿಸಿದ್ದ ಅರ್ಜಿಯಿಂದ ಈ ಮಾಹಿತಿ ಬಹಿರಂಗವಾಗಿದೆ.
ಒಟ್ಟಾರೆ ಬಾಕಿ ಮೊತ್ತದಲ್ಲಿ ವಿವಿಐಪಿ ಪ್ರಯಾಣಕ್ಕೆ ಆಗಿರುವ ಮೊತ್ತವೇ ₹ 845.04 ಕೋಟಿ ಇದೆ. ಇದರಲ್ಲಿ ಗೃಹ ಸಚಿವಾಲಯ ₹473.88 ಕೋಟಿ, ರಕ್ಷಣಾ ಸಚಿವಾಲಯ ₹ 261.76 ಕೋಟಿ ಹಾಗೂ ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ₹ 109.41 ಕೋಟಿ ಬಾಕಿ ಉಳಿಸಿಕೊಂಡಿವೆ.
ವಿವಿಐಪಿಗಳಲ್ಲದೆ ಸರ್ಕಾರದ ವಿವಿಧ ಇಲಾಖೆಗಳ ಅಧಿಕಾರಿಗಳ ಪ್ರಯಾಣದ ಮೊತ್ತ ₹ 526.14 ಕೋಟಿ ಬರಬೇಕಿದೆ.
ಬಾಕಿ ಪಾವತಿಯಾಗದೇ ಇರುವುದರಿಂದ ₹ 10 ಲಕ್ಷಕ್ಕಿಂತ ಅಧಿಕ ಮೊತ್ತ ಬಾಕಿ ಉಳಿಸಿಕೊಂಡಿರುವ ಇಲಾಖೆಗಳಿಗೆ ಸಾಲ ಕೊಡುವುದನ್ನು2019ರ ಡಿಸೆಂಬರ್‌ನಿಂದ ನಿಲ್ಲಿಸಲಾಗಿದೆ ಎಂದು ಏರ್‌ ಇಂಡಿಯಾ ತಿಳಿಸಿದೆ.
2019ರ ಡಿಸೆಂಬರ್‌ 5ರ ವರೆಗಿನ ಮಾಹಿತಿಯಂತೆ ಕಂಪನಿಯ ನಿವ್ವಳ ನಷ್ಟ ₹ 8,556 ಕೋಟಿ ಇದೆ. ಒಟ್ಟಾರೆ ಸಾಲದ ಮೊತ್ತ ₹ 60 ಸಾವಿರ ಕೋಟಿಗಳಷ್ಟಿದೆ.
