ನವದೆಹಲಿ (ಪಿಟಿಐ): ಗೌತಮ್ ಅದಾನಿ ಮಾಲೀಕತ್ವದ ಅಂಬುಜಾ ಸಿಮೆಂಟ್ಸ್, ಸಂಘಿ ಇಂಡಸ್ಟ್ರೀಸ್‌ನ ಬಹುಪಾಲು ಷೇರುಗಳನ್ನು ₹5,000 ಕೋಟಿಗೆ ಖರೀದಿಸಿದೆ. ಅದಾನಿ ಸಮೂಹದ ವಿರುದ್ಧ ಹಿಂಡನ್‌ಬರ್ಗ್‌ ರಿಸರ್ಚ್‌ ಕೆಲವು ಆರೋಪಗಳನ್ನು ಹೊರಿಸಿದ ನಂತರದಲ್ಲಿ, ಅದಾನಿ ಸಮೂಹದ ಪ್ರಮುಖ ಸ್ವಾಧೀನ ಪ್ರಕ್ರಿಯೆ ಇದಾಗಿದೆ.
ಈ ಖರೀದಿಯ ನಂತರದಲ್ಲಿ ಸಂಘಿ ಇಂಡಸ್ಟ್ರೀಸ್ ಲಿಮಿಟೆಡ್‌ನಲ್ಲಿ ಅಂಬುಜಾ ಸಿಮೆಂಟ್ಸ್‌ನ ಪಾಲು ಶೇ 56.74 ಆಗಲಿದೆ. ಇದಲ್ಲದೆ, ಸಂಘಿ ಇಂಡಸ್ಟ್ರೀಸ್‌ನ ಷೇರುದಾರರಿಂದ ಒಟ್ಟು 6.71 ಕೋಟಿ ಷೇರುಗಳ ಖರೀದಿಗೆ ಅಂಬುಜಾ ಸಿಮೆಂಟ್ಸ್ ಮುಂದಾಗಲಿದೆ. ಈ ಷೇರುಗಳನ್ನು ಮುಕ್ತ ಮಾರುಕಟ್ಟೆಯಿಂದ ಖರೀದಿಸಲಿದೆ. ಸಂಘಿ ಇಂಡಸ್ಟ್ರೀಸ್ ಲಿಮಿಟೆಡ್‌ ಸಿಮೆಂಟ್‌ ತಯಾರಿಕೆಯಲ್ಲಿ ತೊಡಗಿದೆ.
