ನವದೆಹಲಿ: ಸಿಂಗಪುರದಲ್ಲಿ ಕೇಂದ್ರ ಕಚೇರಿ ಹೊಂದಿರುವ ‘ಗ್ರೇಟ್‌ ಲರ್ನಿಂಗ್’ ಕಂಪನಿಯನ್ನು ₹ 4,466 ಕೋಟಿಗೆ ಸ್ವಾಧೀನಕ್ಕೆ ತೆಗೆದುಕೊಂಡಿರುವುದಾಗಿ ಇ–ಕಲಿಕೆ ಕ್ಷೇತ್ರದ ಬೈಜುಸ್‌ ಕಂಪನಿಯು ಸೋಮವಾರ ತಿಳಿಸಿದೆ.
ಅಲ್ಲದೆ, ಉನ್ನತ ಹಾಗೂ ವೃತ್ತಿಶಿಕ್ಷಣ ವಿಭಾಗದಲ್ಲಿ ತನ್ನ ಸ್ಥಾನ ಗಟ್ಟಿ ಮಾಡಿಕೊಳ್ಳಲು ಹೆಚ್ಚುವರಿಯಾಗಿ ₹2,960 ಕೋಟಿ ಹೂಡಿಕೆ ಮಾಡುವುದಾಗಿಯೂ ತಿಳಿಸಿದೆ.
ಅಮೆರಿಕದ ಡಿಜಿಟಲ್‌ ರೀಡಿಂಗ್ ಪ್ಲಾಟ್‌ಫಾರಂ ಆಗಿರುವ ಎಪಿಕ್‌ ಅನ್ನು ₹ 7,459 ಕೋಟಿಗೆ ಸ್ವಾಧೀನಪಡಿಸಿಕೊಳ್ಳುವುದಾಗಿ ಘೋಷಿಸಿದ ಕೆಲವೇ ದಿನಗಳಲ್ಲಿ ಕಂಪನಿಯು ಮತ್ತೊಂದು ಸ್ವಾಧೀನಕ್ಕೆ ಮುಂದಾಗಿದೆ. ಗ್ರೇಟ್‌ ಲರ್ನಿಂಗ್ ಕಂಪನಿಯು ಬೈಜುಸ್‌ ಸಮೂಹದಲ್ಲಿ ಸ್ವತಂತ್ರ ಕಂಪನಿಯಾಗಿಯೇ ಮುಂದುವರಿಯಲಿದೆ.
