ನವದೆಹಲಿ: ಎಸ್‌ಬಿಐ ಕಾರ್ಡ್ಸ್‌ ಆ್ಯಂಡ್‌ ಪೇಮೆಂಟ್ಸ್‌ನ ಆರಂಭಿಕ ಸಾರ್ವಜನಿಕ ಕೊಡುಗೆಯಲ್ಲಿ (ಐಪಿಒ) ಹಣ ತೊಡಗಿಸಿದವರಲ್ಲಿ ಈಗ ನಿರಾಶೆ ಮನೆ ಮಾಡಿದೆ.
ಷೇರುಪೇಟೆಗಳಲ್ಲಿ ಕಂಡು ಬಂದಿರುವ ಭಾರಿ ಕುಸಿತ ಮತ್ತು ಷೇರುಪೇಟೆಯಲ್ಲಿ ವಹಿವಾಟು ನಡೆಸುವುದಕ್ಕೂ ಮೊದಲು ನಡೆದಿರುವ ಎಸ್‌ಬಿಐ ಕಾರ್ಡ್ಸ್‌ ಷೇರುಗಳ ಅನಧಿಕೃತ ಖರೀದಿ ಮತ್ತು ಮಾರಾಟ ವಹಿವಾಟಿನ ಬೆಲೆಯಲ್ಲಿ ಕುಸಿತ ಕಂಡು ಬಂದಿರುವುದು ‘ಐಪಿಒ’ ಹೂಡಿಕೆದಾರರಲ್ಲಿ ಚಿಂತೆ ಮೂಡಿಸಿದೆ.
₹ 750ರಿಂದ ₹ 755ರ ಬೆಲೆಮಟ್ಟದಲ್ಲಿದ್ದ ಐಪಿಒ, ಅನಧಿಕೃತ ಮಾರುಕಟ್ಟೆಯಲ್ಲಿ ಕಡಿಮೆ ಬೆಲೆಗೆ (₹ 755 ರಿಂದ ₹ 775) ವಹಿವಾಟು ನಡೆಸಿದೆ.
ಹೂಡಿಕೆದಾರರು ದೊಡ್ಡ ಮೊತ್ತಕ್ಕೆ ‘ಐಪಿಒ’ ಖರೀದಿಸಲು ಮುಂದಾಗಿ ಕೈತುಂಬ ಲಾಭ ಬಾಚಿಕೊಳ್ಳುವ ನಿರೀಕ್ಷೆಯಲ್ಲಿದ್ದರು. ಅನೇಕರು ತಮಗೆ ‘ಐಪಿಒ’ ಹಂಚಿಕೆಯಾಗದೆ ಹಣ ಮರಳಿದರೆ ಸಾಕು ಎಂದು ಹಂಬಲಿಸುತ್ತಿದ್ದಾರೆ. ಇದೇ 16ಕ್ಕೆ ಷೇರುಪೇಟೆಯಲ್ಲಿ ವಹಿವಾಟಿಗೆ ಚಾಲನೆ ಸಿಗುವ ನಿರೀಕ್ಷೆ ಇದೆ. ಈಗಾಗಲೇ ಹಂಚಿಕೆ ಪ್ರಕ್ರಿಯೆಯು ಪೂರ್ಣಗೊಂಡಿದೆ.
